Ɩzayi 59 - A SƐB-SÕW

A bɩwra na be nyɩɩm nɩ a Naaŋmɩn cara pʋɔ a

¹ A Sore nũu bɛ ɩ ŋmãa zuo a nyɩ faafʋ ƴãw ɛ, a ʋ tobe bɛ wõw zuo a wob ƴãw ɛ.

² Ɛcɛ a nyɩ sãwna n'a ƴãw bɩwra nyɩɩm nɩ a nyɩ Naaŋmɩn cara pʋɔ. A nyɩ yel-bebe n'a so ʋ lɩɛbɩ a ʋ niwn bɛr zi-yoru, k'ʋʋ ta cãà nyɛrɛ nyɩ ɛ́ wone a nyɩ ƴɛ̀rʋ ɛ.

³ Bʋ̃ʋ n'ʋ vɛ̃, a nyɩ nuru ɩ n zɩ̃ɩ, ɛ́ ɩ-faar dɛw a nyɩ nobie. A nyɩ nɛ́ɛ ŋmarɛ nɩ ziri, a nyɩ zɛlɛ ɩ n zɛl-ɓɛrɩ.

⁴ A ƴɛ̀rʋ-dɩb zie a, nyɩ mɩ́ yel'ɩ sãwna na bɛ ɩ sɩza a. Nyɩ bɛ ƴɛ̀rɛ kpɩɛr a nɩbɛ tuur'ɩ yel-mɩŋa ɩ. Zi-vuo n'a nyɩ mɩ́ ƴãw a nyɩ tɩɛrʋ, nyɩ mɩ́ yere nɩ yele na ɩ ziri a, a yel-faa pʋɔ n'ʋ nyɩ mɩ́ tɛr wa dɔw a kpɩɛrʋ.

^5-6 A nyɩ tõ-toni ɩ na mɛ̃ dɔpan jɛlɛ a: nɩr wa 'wɔbr a a, ʋ kpiir a. Bɛlɛ wa ŋmɛrɛ a jɛl kãw wa báarɛ a, dɔpan mɩ́ yi na. A pɛnɛ nyɩ na wóbr a, ɩ na mɛ̃ mʋ̃dɛr cowr a. A bɛ sɩɛr bʋ̃-suuri ɛ, bɛ bɛ vaarɛ a ɩ. Kpɩɛrʋ tɛwr'a a waar'ɩ. Po-to-fãw tome tɛwr'a a nyɩ nuru tone.

⁷ A nyɩ gbɛ́ɛ zɔrɛ na wɩɛr a faa maalʋ, nyɩ zɔrɛ na páwr a nɩr na bɛ sãw a kʋb ƴãw. Faa maalʋ tɩɛrʋ tɛwr'a nyɩ tɩɛrɛ. Zie nɛ za nyɩ na tɔlɛ a, a mɩ́ ɩ n po-to-fãw-ɩb nɩ yel-sãwnɩ.

⁸ Nyɩ bɛ bãw a ƴã-ɓaarʋ sɔ́r ɛ, ɛ́ nɩr bɛ nyɛrɛ a yel na-tu-sɔr a be nyɩ na tɔlɛ a ɩ. Nyɩ mɩ́ ɩ n a nyɩ sɛ́ɛ a gɔ̃w gɔ̃w, ɛ́ sob nɛ na tuur a a kʋ̃ bãw a ƴã-ɓaarʋ towtow ɛ.

A Naaŋmɩn nɩ-bʋʋrɛ sàw nɩ a bɛ sãwna

⁹ Alɛ n'a so a Naaŋmɩn bɛ ɩrɛ bom a tɩ ƴãw ɛ, ɛ́ bɛ wule a tɩ mɩnʋ ɛ. Tɩ tɩ tɩɛrɛ nɩ a cãà, ɛ́ a wa ɩ a lige. Tɩ tɩ gùre nɩ a zi-cãà, ɛ́ wa cere lige pʋɔ.

¹⁰ Tɩ bɔblɛ na mɛ̃ zɔn na lanɛ dacin a, tɩ bɔblɛ na bɔbr a sɔ́r, mɛ̃ nɩbɛ na bɛ tɛr mimie a. Tɩ ŋmɩɛr'ɩ gbɛ́ɛ mʋ̃tɔ̃w-gbawl, mɛ̃ zi-sɔb-paala a. Tɩ kpɛmɛ nɩ vla, ɛ́ ɩ mɛ̃ kũuni a.

¹¹ Tɩ za, tɩ 'hʋ̃ʋnɛ na mɛ̃ wɛ-baar a, tɩ kone nɩ kʋralɛ mɛ̃ naŋmamɛ a. Tɩ tɩ tɩɛrɛ na k'aa Naaŋmɩn na ɩ n ɩb kãw, ɛcɛ zawla! Tɩ tɩ gùre nɩ a faafʋ, ɛcɛ ʋ zãá nɩ tɩ na!

¹² Sɩza n'a, Sore e, tɩ zawr'ɩ a fʋ nʋɔr gb'aa yaga. A tɩ yel-bebe wule na tɩ na sãw a. Tɩ tɛr'ɩ a tɩ gaarʋ ɩ-ɩrɩ tɩɛrʋ kʋralɛ, tɩ bãw nɩ a tɩ sãwna za vla.

¹³ Sore e, tɩ zawr'ɩ a fʋ nʋɔr, tɩ mɩl fʋ na, tɩ zawr'ɩ a fʋ tub, a fʋ̃ʋ tɩ Naaŋmɩn. A tɩ taabɛ dɔwrʋ nɩ gaarʋ tɛwr ƴɛ̀rʋ n'a tɩ tɛr. A tɩ socie nɩ a tɩ zuru paal'ɩ ziri tɛwr.

¹⁴ Alɛ n'a so a ɩb na ɩrɛ tu sɔ́r a síwre, a mɩnʋ zãá nɩ tɩ na. A nɩ-yaga tuor-taa zie a, a yel-mɩŋa ŋmɛ n gbɛ́r lo, ɛ́ a yel-mɩnʋ bɛ cãà tarɛ a be ɩ.

¹⁵ A yel-mɩŋa bɔr'a, ɛ́ sob nɛ na zawrɛ a faa maalʋ a, mɩ́ ɩ na bɛ fa a ʋ bome za. A Sore nyɛ̃ nɩ à á ŋá za. Ʋ nyɛ̃ na k'aa ɩrɛ a lɛ-na-tu-sɔr-a na bɛ ka be a, ʋ ɩ n yel-faa.

A Sore na ɩ n ɩb kãw

¹⁶ Ʋ nyɛ̃ na kɛ́ nɩr za bɛ tɩ damnɛ damnʋ ɛ, a tɩ ùr ʋ na, nɩr za na bɛ tɩ ɩrɛ bom a. Lɛ n'a ʋ tɩ yel k'aa ʋl mɩŋa na ɩ n ɩb kãw, ɛ́ a ʋ mɩnʋ n'a tɩ kʋ̀ ʋ a fãw a al ƴãw.

¹⁷ Ʋ su n a mɩnʋ mɛ̃ zɛbr-nyãa-kpale a, ʋ vɔbl'ɩ a faafʋ kpawɔ-kpow a ʋ zũú. Ʋ su n a san-yaafʋ kparʋ. A tʋlʋ ʋ na tʋlɛ a zɛbr ƴãw a n'ɩ a kpar-kpɛ̃ɛ ʋ na vaarɩ pàw ʋ tʋɔra a.

¹⁸ Ʋ na ya n a nɩbɛ man nɩ a bɛ ɩb. A ʋ suur a, a ʋ dɔ̃ dem ƴãw n'a, a dɔwrɩ yáa a san a, a nɩbɛ na zɛbr'ɩ ʋ a ƴãw n'a, tɩ lãwnɩ a tẽ-zãánɩ dem.

¹⁹ Lɛ n'a a mʋ̃tɔ̃w puru zie tɩ tɔ a kpɛb zie, a nɩbɛ za na zɔrɛ a Sore, bɛ za na zɔrɛ a ʋ yúor-vɩɛlʋ-danʋ. Bʋ̃ʋ n'ʋ vɛ̃, a Sore na wa na mɛ̃ man-fɩɩra kʋ̃ɔ saa-sɛsɛb na fure darɛ a.

²⁰ A Sore na wa na k'ʋʋ wa ya de a Zerizalɛm nɩ a Ɩsɩrayɛl nɩbɛ bɛl na bɛr a bɛ nɩ-gaarɩ ɩb a. A Sore n'ʋ yere.

²¹ A Sore yere na ƴãw pʋɔ: «Ɛ́ a mãa a, nyɛ̃ a wõ-taa ɩ̃ na maalɛ nɩ a nɩbɛ bɛ ŋa a: A ɩ̃ vʋʋrʋ be n a nyɩ zu, ɩ̃ɩ ƴãw nɩ a ɩ̃ ƴɛ̀rʋ a nyɩ nɛ̃ɛ́. Nyɩmɛ so a, a nyɩ bibiir so a, nɩ a bɛ bibiir mɩ̀ bibiir, a ƴɛrɛŋa nɩ kʋralɛ. Ɩ̃ bɛ lɛb dier a a nyɩ zie towtow ɛ. A mãa, a Sore, mãa n'ʋ yere.»