Ɩzayi 58 - A SƐB-SÕW

A mʋta-tuo a Naaŋmɩn na nɔnɛ a

¹ A Sore yere na: Cɩɩrɛ kpɛ̃w kpɛ̃w za, taa vɛnɛ ɩ. Ɩ a fʋ kɔkɔr ʋ yire mɛ̃ wɩ́ɛ na pɛblɛ a. Yel a ɩ̃ nɩbɛ sãwna kʋ̀ bɛ, yel a Zakɔb bʋʋrɛ yel-bebe kʋ̀ bɛ.

² Bibir za, bɛ mɩ́ bɔbr mɛ̃ na, bɛ mɩ́ bɔbr'a kɛ́ bɛ bãw a ʋlɩ bom nɛ ɩ̃ na gùre a bɛ zie a, mɛ̃ nɩ-bʋʋrɛ na tuur a mɩnʋ ɛ́ bɛ zawrɩ a lɛ a bɛ Naaŋmɩn na dɩ a ƴɛ̀rʋ bin a bɛr a. Bɛ bɔbr'ɩ ƴɛ̀rʋ na dɩ tu n mɩnʋ a, a ɩ̃ zie, bɛ bɔbr'a k'ɩ̃ɩ pɩɛlɩ bɛ.

³ Ɛcɛ bɛ yere nɩ a ɩ̃ zie: «Bʋnʋ ƴãw n'a tɩ na mɩ́ tɛr a mʋta-tuo fʋ̃ʋ bɛ mɩ́ wa nyɛ̃ a a? Tɩ na mɩ́ dɩ tuo síwre tɩ tʋɔra fʋ̃ʋ bɛ mɩ́ wa bãwnɩ a a?» Lɛ n'a ɩ̃ sɔwr à ŋá: A nyɩ mʋta-tuo tɛrʋ bibir a, nyɩ mɩ́ kaarɛ nɩ a nyɩ mɩŋa yele zie, ɛ́ dɔwrɛ a nyɩ tõ-tõ-biir.

⁴ Nyɩ mɩ́ tɛr'ɩ a mʋta-tuo ɛ́ zɛbr taa, ɛ́ mɩ́ gùr nũu ŋmɩɛr'ɩ a nyɩ taabɛ. À à ŋá bɛ n'a nyɩ na mɩ́ tɛr a mʋta-tuo bɔbr'ɩ k'ɩ̃ɩ wõ a nyɩ puoru a saa-zu ka ɩ.

⁵ À ŋá n'a a mʋta-tuo ɩ̃ na nɔnɛ a ŋmɛ̃ ɛ? A bibir nyɩ na síwre nyɩ tʋɔra a? À gʋɔ a zu mɛ̃ bàa-kɛkɛr a, à su a vʋɔra kparʋ a, à mɩ́ gã a uuru pʋɔ a, à á ŋá n'a nyɩ bʋɔlɛ mʋta-tuo o? bibir na pɛlɩ a ɩ̃ pʋɔ a a?

⁶ A mʋta-tuo ɩ̃ na nɔnɛ a n'ɩ ŋa: bɛ mɩ́ ír a bamɛ bɛr bɛ na ƴãw a nɩbɛ ɛ́ a bɛ tu sɔ́r a, bɛ mɩ́ ír a fɛrʋ na be a nɩbɛ zu a bɛr, bɛ mɩ́ ɩ a nɩbɛ bɛ na dɔwrɛ a bɛ lɛb so bɛ tʋɔra, bɛ mɩ́ ír bom za na ɩ bɛ ɩ gbãgbaar a bɛr.

⁷ Ʋlɛ n'ɩ kɛ́ fʋ mɩ́ ɩ a fʋ bʋ̃-dɩra kʋ̀ a kɔ̃ sob, kɛ́ fʋ mɩ́ tɛr a nan dem na bɛ tɛr kpɛb zie a, kpɛ n a fʋ yir, kɛ́ fʋ mɩ́ kʋ̀ bʋ̃-suuri a bɛlɩ dem na bɛ tɛr a a, ɛ́ taa lɩɛbɛ kpaar cɔwr a fʋ yɛb ɛ.

⁸ Lɛ n'a a fʋ cãà na pur caalɩ mɛ̃ a zi-wɛl-paala a, ɛ́ a fʋ natɩr ɓãa fɔ̃w. A fʋ mɩnʋ na de fʋ nɩ niwn, ɛ́ a Sore yúor-vɩɛlʋ-danʋ pàw a fʋ pùor.

⁹ Fʋ̃ʋ mɩ́ wa bʋɔlɛ a lɛn daar a, a Sore na mɩ́ sàw na. Fʋ̃ʋ mɩ́ wa kõ bʋɔlɩ a, ʋ na mɩ́ yel'a: «Mãa n'ɩ ŋan!» Fʋ̃ʋ wa ír a fɛrʋ na fɛrɛ a nɩbɛ a bɛr a fʋ tẽw pʋɔ a, fʋ̃ʋ wa bɛr a nobir vɛlʋ nɩ a po-to-ƴɛ̀rʋ a,

¹⁰ fʋ̃ʋ mɩ́ wa ɩ a fʋ bʋ̃-dɩra kʋ̀ a kɔ̃ sob ɛ́ ƴãw a bãbàal ʋ dɩ tɩw a, a fʋ cãà na mɩ́ caal'ɩ a lige pʋɔ, ɛ́ a fʋ lige na mɩ́ ɩ na mɛ̃ mʋ̃tɔ̃-tuo a.

¹¹ A Sore na wule fʋ nɩ a sɔ́r kʋralɛ. A wɛja-kpalɛ pʋɔ tɛɛ za a, ʋ na kʋ̀ b'ɩ bʋ̃-dɩrɩ ɛ́ ɩ fʋ lɛb tɛr fãw. Fʋ na ɩ na mɛ̃ zaadɛ̃ na bùr ʋ za a, mɛ̃ bul-nʋɔr a kʋ̃ɔ na bɛ sɩrɛ a.

¹² Lɛ n'a fʋ na lɛb libri a debo-kore, fʋ na lɛb mɛ a dacĩ-pɛ́ɛ bɛ na bɛr koro za a zu. Bɛ na bʋɔlɛ fʋ nɩ «Nɩ-bʋʋrɛ na fɔbr dacine vɛɛ ɛ́ maalɛ a tẽ-kpɛ̃ɛ sɛ́ɛ ƴãwn a».

A pɩ̃ɛnʋ-bibir maal-tɛrʋ

¹³ A Sore yere na: «Fʋ̃ʋ wa bɛr a fʋ zi-ceni a pɩ̃ɛnʋ-bibir a, fʋ̃ʋ wa bɛr a fʋ yele zie kaafʋ a ɩ̃ bibi-sõw bibir a, fʋ̃ʋ wa bʋɔlɛ a pɩ̃ɛnʋ-bibir “Nʋ̃ɔ̀”, a Sore bibir “Bibi-ƴãwna”, ɛ́ sɩrɩ ƴãwnɛ ʋ, mɩ́ bɛr a zi-ceni, a yele zie kaafʋ, a nɔkpɛn na bɛ tɛr baarʋ a,

¹⁴ a lɛn daar a, mãa zie n'a fʋ na mɩ́ nyɛ̃ a fʋ nʋ̃ɔ̀. Ɩ̃ na tɛr fʋ na mɛ̃ nɩr na zɛb tʋ̃ɔ́ a do n a tẽw tan zu. Ɩ̃ na ɩ na fʋ dɩ a tẽw a fʋ sãàkʋm-kʋra Zakɔb na páw a bome.» À ŋá n'a a Sore yel k'ʋʋ na ɩ na.