Ɩzayi 57 - A SƐB-SÕW

¹ Bɛ kʋrɛ nɩ a nɩ-mɩn, ɛ́ nɩr bɛ cɛlɛ be ɩ. A nɩ-vɩɛlɩ báarɛ na, ɛ́ nɩr bɛ bãwnɩ a ɩ. Ʋ̃ʋ, a nɩ-mɩn báarɛ na a nɩ-faar po-tuolu zũú.

² Ɛcɛ a ƴã-ɓaarʋ na wa na, ɛ́ a bɛlɩ dem na ɩrɛ vla a na mɩ́ gúre nɩ zoom a bɛ bʋ̃-gana zu.

A Sore yere nɩ a Ɩsɩrayɛl nɩbɛ a bɛ tɩbɛ ƴãw

³ Nyɩɩm, pɔw-sɩ̃ɛ bibiir i, nyɩ taw pɩɛlɩ a ka. Pɩ̃ɔ-yel-maalbɛ nɩ pɔw-yɛmɛ nɩ dɛ-yɛmɛ bʋʋrɛ n'ɩ nyɩ!

⁴ Ãa n'ʋ nyɩ kpɔwrɛ? Ãa ƴãw n'a nyɩ mɩ́ háa a nʋɔr a gbayala ɛ́ ír a zɛl? Sɩza bɛ n'a nyɩ ɩ bibi-gaarɩ ɛ? Zir-ŋmarbɛ bʋʋrɛ ɩ?

⁵ Nyɩ mɩ́ ɩ na a ƴãw cɩrɛ nyɩ a nyɩ maalʋ-ziir tɩɩr pɛr, tɩ-zimpiri za pile. Nyɩ mɩ́ maal'ɩ nɩ bibiir bàwr a fʋɔlɩ pʋɔ, a pìe bɔwrɩ pʋɔ.

⁶ A fʋɔla kʋsɛ-saalɩ a, fʋ̃ʋ so a, a fʋ dem'ɩ a al, Ɩsɩrayɛl i! A al ƴãw n'a fʋ mɩ́ cir divɛ̃ bɛr, a ɩ bàwr fʋ maalɩ, fʋ mɩ́ tɩr de-kʋ̀b bome. A Sore sowre na: «Ɩ̃ na tʋ̃ɔ́ na sàw à à ŋá a?»

⁷ Fʋ mɩ́ bin nɩ a fʋ gado tãw za na kɛrɩ a zu. Ɛ́ a be n'a fʋ mɩ́ do kɛ́ fʋ tɩ maalɩ a bàwr.

⁸ Fʋ mɩ́ bin nɩ a fʋ tɩɩb a dɩ̃dɔr dàa pùorí. Fʋ mɩ́ sɔwl'ɩ a ɩ̃ ƴãw yàa a fʋ bʋ̃-suuri, fʋ mɩ́ do na gã a fʋ gado fʋ na ɩ ʋ yɛlmɛ a zu. Fʋ̃ʋ nɩ a fʋ sɛnbɛ mɩ́ maal'ɩ wõ-taa na tɛr tɔnɛ a, fʋ mɩ́ nɔnɛ na kɛ́ fʋ lãw gã nɩ bɛ ɛ́ nɔnɛ a bom jɩ́rʋ.

⁹ Fʋ mɩ́ cen nɩ a na-kpɛ̃ɛ zie, tɛr kãá nɩ parfɛ̃, fʋ mɩ́ tõ n nɩbɛ zie na zãá nɩ a ka yaga za a. Fʋ mɩ́ siw na tɩ ta a kpɩmɛ tẽw.

¹⁰ Fʋ mɩ́ cen nɩ a cenu a bàl fʋ. Ɛcɛ fʋ bɛ mɩ́ yel: «Ɩ̃ na bɛr'a ɩ». Fʋ lɛb'a nyɛ̃ a fʋ fãw, fʋ tʋ̃ɔ́ nɩ a fʋ bàlʋ.

¹¹ Ãa dɛ̃bɩ̃ɛ n'a fʋ tɩ zɔrɛ, ãa n'ʋ fʋ tɩ zɔrɛ ŋma a ziri, yiiri mɛ̃ bɛr bɛ cãà tɛr a ɩ̃ tɩɛrʋ? Mãa a, ɩ̃ ɩ n gbili a koro za, alɛ n'a so fʋ bɛ zɔrɛ mɛ̃ ɩ.

¹² Ɩ̃ na yel'ɩ cãamɩ́ lɛ a lɛ fʋ na ŋmɛ̃ a, nɩ a fʋ ɩ-ɩrɩ. Fʋ bɛ nyɛrɛ tɔnɛ kãw za a pʋɔ ɛ.

¹³ Fʋ̃ʋ wa kone bɔbr'ɩ sõwfʋ a, a fʋ tɩbɛ fʋ na wob ɓã taa a, a faa fʋ! A sɛsɛb na wob a nɩ a za cen nɩ, pɩɛlʋ na pɛbl'a na tɔl'ɩ. Ɛcɛ sob nɛ na na zɔ kpɛ a ɩ̃ naayir a na páw nɩ a tẽw ʋ ɩ a ʋ sób, ʋʋ na so nɩ a ɩ̃ tãw-sõw.

A Sore na sanɩ nɩ a ʋ nɩ-bʋʋrɛ Ɩsɩrayɛl

¹⁴ A Sore yel a: «Nyɩ maalɩ a sɔ́r, nyɩ ɩ fɔ̃w, nyɩ puo a sɔ́r, nyɩ ír a bome na piw a ɩ̃ nɩ-bʋʋrɛ sɔ́r a bɛr.»

¹⁵ Nyɛ̃ a lɛ a Naaŋmɩn na ɩ sõw a na yere a, ʋl na be bom za zu-sɔw ɛ́ tɛr kpɛb zie kʋralɛ a: «A mãa, a Naaŋmɩn na ɩ sõw a, ɩ̃ kpɩɛr'ɩ a saa-zu ka. Ɛcɛ ɩ̃ lãw nɩ nɩ a nɩbɛ bɛ na dɔwrɛ ɛ́ bɛ tɛr su-siwri a, k'ɩ̃ɩ lɛb kʋ̀ nyɔ-vʋʋrʋ a su-siwri dem, k'ɩ̃ɩ lɛb kʋ̀ nyɔ-vʋʋrʋ a nɩbɛ bɛ na dɔwrɛ a.

¹⁶ Bʋ̃ʋ n'ʋ vɛ̃, ɩ̃ kʋ̃ zɛbr a bɛ tɛr baarʋ ɛ, bɩɩ nyɛ̃ a suur kʋralɛ ɩ. Alɛ bɛ ɩ lɛ, a nyɔ-vʋʋrʋ pɩɛlʋ kʋ̃ cãà be a bɛlɩ dem ɩ̃ na ír a zie ɩ.

¹⁷ A Ɩsɩrayɛl sãwna na n'ɩ ʋ na mɩ́ nyɛ̃ a bom zɩnɛ guur a, ɩ na k'ɩ̃ nyɛ̃ suur, ɛ́ a ɩ̃ suur pʋɔ ɩ̃ ŋmɛ ʋ. Ɩ̃ bɛ tɩ cãà bɔbr k'ɩ̃ɩ nyɛ̃ ʋ ɛ. Ɛcɛ a ʋ zu kpɛmɛ na, ʋ cãà ɩ a ʋ ɩb.

¹⁸ Ɩ̃ nyɛ̃ nɩ a ʋ ɩb vla vla, ɛcɛ ɩ̃ na sanɩ ʋ na. Ɩ̃ na wul ʋ nɩ a sɔ́r, ɩ̃ na mɔwl'ʋ na. A bɛlɩ dem za na be wahala pʋɔ a,

¹⁹ ɩ̃ na ƴãw nɩ danʋ yielu a bɛ nɛ̃ɛ́.» A Sore yel a: «Ƴã-ɓaarʋ, ʋ be a sob nɛ na zãá a zie, ƴã-ɓaarʋ, ʋ be a sob nɛ na pɩɛlɩ a zie! Sɩza n'a, ɩ̃ na sanɩ nɩ a ɩ̃ nɩbɛ.»

²⁰ Ɛcɛ a nɩ-faar ɩ na mɛ̃ kʋ̃ɔ-kpɛ̃ɛ na damnɛ a, na kʋ̃ tʋ̃ɔ́ gã zoom a, ɛ́ a kʋ̃ɔ-mie tuore a mɛ̃mɛrɛ nɩ a sagɛ ìre nɩ a.

²¹ A ɩ̃ Naaŋmɩn yel a: «Ƴã-ɓaarʋ bɛ be a nɩ-faar ƴãw ɛ.»