Ɩzayi 56 - A SƐB-SÕW

ZIIR ATA SOB 56—66 A Ŋmɩn-yir-kpɛ̃ɛ na ɩ n puoru yir a nɩ-bʋʋrɛ za ƴãw

¹ À ŋá n'a a Sore yere: «Nyɩ ɩrɛ a lɛ-na-tu-sɔr-a, nyɩ tuur a mɩnʋ pùor. Bʋ̃ʋ n'ʋ vɛ̃, a faafʋ ɩ̃ na waar'ɩ a kʋ̃ yaa kɛ́ ta ɩ, ɛ́ nyɩ na nyɛ̃ na k'ɩ̃ɩ bɔbr'ɩ a nyɩ faafʋ.

² Zu-nʋ̃ɔ̀ sob'ɩ a nɩr ʋl na ɩrɛ a lɛ ɩ̃ na yel a, a nɩr ʋl na tɛr ʋ kpɛ̃w kpɛ̃w za a, a nɩr ʋl na mɩ́ maal tɛr a pɩ̃ɛnʋ-bibir vla, ɛ́ bɛ sàw a ʋ nũu na tõ tõ-faa kãw za a!»

³ A sãan na tu a Sore pùor a, ʋ ta yere: «A bɛ tɛr à ŋá ɩ, a Sore na ír mɛ̃ na bɛr a ʋ nɩbɛ pʋɔ» ɩ. A dɛ-vár, ʋ ta yere: «Mãa n'ɩ ŋan ɩ tɩ-kõw ɛ!»

⁴ Bʋ̃ʋ n'ʋ vɛ̃, à ŋá n'a a Sore yere: «A dɛ-vaɩ bɛl na maal tɛr a ɩ̃ pɩ̃ɛnʋ-bibie vla a, na mɩ́ kaa ír ɩrɛ a lɛ na pɛlɩ a ɩ̃ pʋɔ a, ɛ́ mɩ́ tu a ɩ̃ wõ-taa pùor a,

⁵ ɩ̃ na kʋ̀ bɛ nɩ zie a ɩ̃ yir dacine zu a bɛ yée sɛbrʋ ƴãw. A na sa n bidɛbr nɩ pɔwyaar tɛrʋ. A yúor ɩ̃ na na kʋ̀ bɛ a na be n be kʋralɛ, bɛ bɛ sãwnɛ ʋ bɛrɛ towtow ɛ.»

⁶ A sãanbɛ bɛl na tu a Sore pùor, kɛ́ bɛ ƴãwnɛ ʋ ɛ́ nɔnɛ ʋ, kɛ́ bɛ ɩ a ʋ tõ-tõ-biir a, a Sore yere nɩ à ŋá a bɛ ƴãw: «Bɛlɛ wa maal tɛr a ɩ̃ pɩ̃ɛnʋ-bibir vla a, bɛlɛ wa tu a ɩ̃ wõ-taa pùor a,

⁷ ɩ̃ na ƴãw na bɛ wa a ɩ̃ tãw-sõw zu, ɩ̃ na ɩ na nʋ̃ɔ̀ kpɩɛr bɛ yaga za a yir ʋl pʋɔ a nɩbɛ na puore mɛ̃ a. Ɩ̃ na mɩ́ pɛlɩ nɩ pʋɔ de a bagɛ nɩ a de-kʋ̀b bome bɛ na kʋ̀rɛ mɛ̃ a bàwr-maal-kuur zu a. Bʋ̃ʋ n'ʋ vɛ̃, bɛ na bʋɔlɛ nɩ a ɩ̃ yir: “Puoru yir a nɩ-bʋʋrɛ za ƴãw”.»

⁸ A Sore Naaŋmɩn yere na, ʋl na ɓã a Ɩsɩrayɛl nɩbɛ bɛ na diw cen nɩ a taa a: «Ɩ̃ ɓã n nɩbɛ taa baarɩ bɛ viiri koli bɛ, ɛ́ na lɛb ɓã bɛ mɩnɛ taa lãwnɩ bɛ.»

Nɩ-bɛrɛ na bɛ sɛw taa nɩ a nɩ-kpɛ̃ɛnʋ a

⁹ Nyɩɩm póru pʋɔ dʋn za, nyɩ wa, nɩ nyɩɩm tuwr pʋɔ dʋn, nyɩ wa dɩ tɩ tɩw!

¹⁰ A Ɩsɩrayɛl gùrbɛ ɩ n zɔn bɛ za, bɛ bɛ mɩ́ bãwnɩ bom za ɩ. Bà-gbili nɛbɛ, na kʋ̃ tʋ̃ɔ́ wowri a. Bɛ mɩ́ gã gã na ɛ́ a bɛ tɩɛrʋ yaarɛ, bɛ nɔnɛ nɩ gʋ̃ɔ.

¹¹ Bɛ mɩ̀ ɩ n baar na nɔnɛ dɩb bɛ tɛr sɛwfʋ daar a. Nyɛ̃ nɩ-cɩ̃ɩnbɛ kãw a! Bɛ bɛ tɛr yã ɩ. Lɛ na nʋmɛ a bɛ zie a tɛwr'a bɛ ɩrɛ, ŋa za tɔnɛ pùor'a ʋ mɩ́ tu.

¹² Bɛ yere na: «Nyɩ wa, tɩ na wa n nɩ divɛ̃. Tɩ na nyũ n dã-kpɛn. A bio bibir na ŋmɛ̃ na mɛ̃ a dɩ̃a a: a divɛ̃ na gúu a yãwmɛ na.»