Ɩzayi 55 - A SƐB-SÕW

Nyɩmɛ saa bɛ tɛr libir a, nyɩɩm wa

¹ Alɛ! Nyɩɩm za kʋ̃ɔ-nyúur na kpɩɛr a, kʋ̃ɔ n'ɩ a ŋan, nyɩ wa! Nyɩmɛ saa bɛ tɛr libir a, nyɩɩm wa. Nyɩ da dɩ, mɔlɛ n'a. Nyɩ wa, nyɩ da divɛ̃ nɩ bʋ̀rʋ, ɛ́ ta ír libir ɛ, ɛ́ ta ya bom ɛ.

² Bʋnʋ ƴãw n'a nyɩ na íre libir bom na bɛ guole a ƴãw? Bʋnʋ ƴãw n'a nyɩ na bàlɛ nyɩ tʋɔra bom na bɛ tɩwr a ƴãw? Nyɩ bɛrɛ wone mɛ̃ vla, ɛ́ nyɩ na páw nɩ bʋ̃-vɩɛlɩ dɩ, nyɩ na dɩ n bʋ̃-dɩ-nʋʋr nʋʋr wõ nʋ̃ɔ̀.

³ Nyɩ ƴãw tobr ɛ́ wa a ɩ̃ zie. Nyɩ bɛrɛ wone, ɛ́ nyɩ na vʋʋrɛ na. A Sore yere na: «Ɩ̃ na maal'ɩ nyɩ nɩ wõ-taa na na be be kʋralɛ a. Ɩ̃ na tu n nyɩ nɩ a maalʋ ɩ̃ na yel k'ɩ̃ɩ na kʋ̀ n a Daviir a.

⁴ Ɩ̃ tɩ ɩ na ʋ ɩ a ɩ̃ kpɛnʋ dãsɩɛ sob a nɩbɛ zie, ʋ ɩ nɩ-kpɛ̃ɛ dɩrɛ nɩ-kpɛ̃ɛnʋ nɩbɛ zu.

⁵ Ɩsɩrayɛl i, a fʋ̃ʋ mɩ̀, fʋ na bʋɔl'ɩ nɩ-bʋʋrɛ fʋ na bɛ bãw a, ɛ́ a nɩbɛ bɛ ŋa na bɛ tɩ bãw fʋ a, na zɔ na wa a fʋ zie. Mãa zũú n'a bɛ na wa, mãa, a Sore fʋ Naaŋmɩn, a Ɩsɩrayɛl Naaŋmɩn na ɩ sõw a, na ƴãw fʋ a.»

A Sore ƴɛ̀rʋ mɩ́ tu na

⁶ Nyɩ bɔbr a Sore a ƴɛrɛŋa ʋ na mɩ́ bɛr bɛ nyɛ̃ ʋ a. Nyɩ bʋɔlɛ ʋ a ƴɛrɛŋa ʋ na pɩɛlɩ nyɩ a.

⁷ A nɩ-faa, ʋ bɛr a ʋ ɩb! A yel-fa-maalɛ, ʋ bɛr a ʋ tɩɛr-faar! Bɛ lɛb wa a Sore zie bɛ za, bʋ̃ʋ n'ʋ vɛ̃, ʋ na zɔ n bɛ nɩbaalʋ! Bɛ lɛb wa a tɩ Naaŋmɩn zie, ʋ mɩ́ dɩ n suur yaga za!

⁸ A Sore yere na: «A nyɩ tɩɛrʋ bɛ ɩ a ɩ̃ tɩɛrʋ ɛ, ɛ́ a ɩ̃ ɩb bɛ ɩ a nyɩ dem ɛ.

⁹ A lɛ a vuo na sɛw be a salom nɩ a tẽw cará a, lɛ n'a ʋ mɩ̀ be a ɩ̃ ɩb nɩ a nyɩ ɩb cará, a ɩ̃ tɩɛrʋ nɩ a nyɩ tɩɛrʋ cará.

¹⁰ A saa nɩ a sa-pupure mɩ́ yi n a salom zu lo. Ɛcɛ a bɛ mɩ́ lɛb cen a be ɛ́ bɛ bur a tẽw ɛ, ɛ́ bɛ ɩ k'ʋ wɔ̃ wɔmɛ ɩ, ɛ́ bɛ ɩ a bʋ̃-bie a bul ɛ. À ŋá n'a a bʋ̃-bʋʋrɛ mɩ́ be be a bʋrʋ ƴãw, ɛ́ bʋ̃-dɩrɩ be be a dɩb ƴãw.

¹¹ À à ŋá n'a a ɩ̃ ƴɛ̀rʋ na mɩ́ yi a ɩ̃ nʋɔrɩ́ a mɩ́ ɩ: ʋ bɛ lɛbr waar a ɩ̃ zie ɛ́ bɛ ɩ bom ɛ, ɛ́ bɛ maalɩ a lɛ ɩ̃ na bɔbr'a ɩ, ɛ́ bɛ tõ a ton ɩ̃ na kʋ̀ ʋ a ɩ.»

¹² Nʋ̃ɔ̀ n'a na ɩrɛ nyɩ nyɩ yi a Babɩlɔn tẽw pʋɔ, ɛ́ ƴã-ɓaarʋ n'a bɛ na tɛr'ɩ nyɩ lɛb wa n a nyɩ tẽw. Nyɩ na tɔlɛ na a tan nɩ a tãli ŋmɩɛr nʋ̃ɔ̀ cɛlsɩ, ɛ́ a wɩ̀ɛ tɩɩr za ŋmɩɛr nuru ƴãwn.

¹³ A sɩpɩrɛ tɩɛ na lɩɛr'ɩ a gɔ-tuw bul, a tɩɛ na nyùur vla a na lɩɛr'ɩ a gʋʋr. À á ŋá za na ɩ na k'aa Sore nyɛ̃ ƴãwfʋ. A na ɩ n bãwfʋ na be kʋralɛ ɛ́ bɛ tɛr sãwfʋ na sãw a.