Ɩzayi 52 - A SƐB-SÕW

A Zerizalɛm faafʋ

¹ Ìr, Sɩyɔ̃ tẽw i, ìr! Wul a fʋ kpɛnʋ! Zerizalɛm, tẽ-kpɛ̃ɛ-sõw i, su a fʋ dɛpaal bʋ̃-suuri. Bʋ̃ʋ n'ʋ vɛ̃, a nɩ-sãanbɛ nɩ a dɛwr dem kʋ̃ lɛb wa a fʋ zie towtow ɛ.

² Mɩr a uuru na pàw fʋ a bɛr. Ìr lɛb de a fʋ àrʋ zie, fʋ̃ʋ Zerizalɛm bɛ na pàw a! Ír a mie bɛr a fʋ kɔkɔrɩ́, fʋ̃ʋ Sɩyɔ̃ tẽw na be gaso pʋɔ a!

³ Nyɛ̃ a ʋlɩ bom nɛ a Sore na yere kʋ̀rɛ a ʋ nɩbɛ a: «Bɛ kʋɔrɩ nyɩ nɩ mɔlɛ nyɩ ɩ gbãgbaar, bɛ na ya na de nyɩ ɛ́ bɛ ír libir ɛ.»

⁴ Cãà lɛb nyɛ̃ a ʋlɩ bom nɛ a Sore Naaŋmɩn na yere a: «A ɩ̃ nɩbɛ tɩ zɔ na cen Eziptɩ tẽw a pɛr-tib daar, tɩ ɩ nʋʋrɩ a be. Asiiri tẽw dem nɛbɛ dɔwrɩ bɛ a baarʋ daar.

⁵ Ƴɛrɛŋa a, bʋ̃ʋ n'ʋ ɩ̃ nyɛrɛ a pʋɔ? A Sore n'ʋ yere. Bɛ tɛr'ɩ a ɩ̃ nɩbɛ cen nɩ zawla, bɛ ɩ zɛbr nɩ-nyɔwrɩ. A bɛlɩ dem na tʋ̃ɔ́ bɛ a ŋmɩɛr'ɩ zɛb-tʋ̃ɔ́fʋ cɛlsɩ, ɛ́ tʋʋr a ɩ̃ yúor kʋralɛ.

⁶ Alɛ n'a so bibir kãw, a ɩ̃ nɩbɛ na bãw sob nɛ na nɛ m a. Ʋ̃ʋ, bɛ na bãw na kɛ́ mãa n'ʋ yere: Ɩ̃ tarɛ na!»

A Sore lɛbr'a waar a Zerizalɛm

⁷ A yel-nʋ̃ɔ̀ yere bɛ na nyɛ̃ ʋ be a tan zu waar a, nyɛ̃ nʋ̃ɔ̀ na ɩrɛ a! Ʋ yere nɩ a ƴã-ɓaarʋ, a nʋ̃ɔ̀ nɩ a faafʋ. Ʋ yere na kʋ̀rɛ a Zerizalɛm: «A fʋ Naaŋmɩn ɩ n nãà».

⁸ Bɛr wõ a nɩbɛ fʋ na ƴãw bɛ piwre a zie a: bɛ lãw na lɔbr nʋ̃ɔ̀ cɛlsɩ, bʋ̃ʋ n'ʋ vɛ̃, bɛ nyɛ̃ nɩ nɩ bɛ mimie a Sore na lɛbr waar a Sɩyɔ̃ tẽw a.

⁹ Zerizalɛm deboru u, nyɩ ŋmɩɛr nʋ̃ɔ̀ cɛlsɩ: a Sore mɔwlɛ nɩ a ʋ nɩbɛ, ʋ yarɛ na dier a Zerizalɛm.

¹⁰ A nɩ-bʋʋr-yoru za niŋé a, a Sore wul'ɩ a ʋ sonu kpɛnʋ, ɛ́ a nɩbɛ na nyɛ̃ nɩ a tɩ Naaŋmɩn faafʋ tɩ tɔ a tẽw baarʋ ziir za.

Nyɩ yi zaa a Babɩlɔn tẽw pʋɔ

¹¹ Nyɩ cere, nyɩ cere, nyɩɩm na tuo a Sore puoru bome lɛb waar'ɩ a! Nyɩ yi zaa a Babɩlɔn tẽw pʋɔ! Nyɩ taa tʋɔr bʋ̃-dɛwr kãw za ɩ, nyɩ vɩɛl yi n a tẽw ŋa pʋɔ.

¹² Ƴɛrɛŋa ʋl a, a kʋ̃ ɩ páwfʋ nyɩ cere páwr ɛ, nyɩ kʋ̃ yi zaa a tẽw pʋɔ mɛ̃ nɩbɛ na zɔrɛ a ɩ. Bʋ̃ʋ n'ʋ vɛ̃, a Sore n'ʋ na de nyɩ niwn, a Ɩsɩrayɛl Naaŋmɩn n'ʋ na pàw a nyɩ pùor.

A Sore tõ-tõ-bie (Yielu anaar sob)

¹³ A Sore yere na: «A ɩ̃ tõ-tõ-bie na ɩ n nɩr. Ʋ na ìr'a àr, bɛ na zɛw ʋ na, ʋʋ na nyɛ̃ nɩ ƴãwfʋ yaga za.

¹⁴ Mɛ̃ a lɛ nɩ-yaga na tɩ nyɛ̃ ʋ kɛ̀ dɛ̃bɩ̃ɛ kpɛ bɛ, a ʋ niwn na tɩ sãw ʋ za, ʋʋ bɛ cãà ŋmɛ̃ taa nɩ nɩsaal a,

¹⁵ lɛ mɩ̀ n'a nʋɔr na ɓãa nɩ-bʋʋr-yaga a ʋ ƴãw, na-mɩnɛ na nyɔw nɩ nʋɔr a ʋ niŋé. Bʋ̃ʋ n'ʋ vɛ̃, bɛ nyɛ̃ nɩ bom na bɛ ɩ mɛ̃ a lɛ bɛ na tɩ manɩ kʋ̀ bɛ a ɩ, ɛ́ a bom bɛ na jɩ́rɛ a, bɛ ɩ mɛ̃ a lɛ bɛ na wõ bɛ yel a ɩ.»