Ɩzayi 50 - A SƐB-SÕW

A Sore sɔwr'ɩ a ʋ nɩbɛ na zɛbr a

¹ À ŋá n'a a Sore yere: «A zawr-bɛrʋ sɛbɛ wa ɩ̃ na maalɩ zawr'ɩ a nyɩ mã Zerizalɛm bɛr a? Bɩɩ, a bɛlɩ dem samɛ ɩ̃ na tɛr a, a bɛ buor sob zie n'a ɩ̃ nyɔw nyɩ kʋɔrɩ? Bɛlɛ wa kʋɔrɩ nyɩ a, a nyɩ sãwna ƴãw n'a. Bɛlɛ wa zawrɩ a nyɩ mã bɛr a, a nyɩ yel-bebe ƴãw n'a.

² Bʋ̃ʋ n'ʋ so ɩ̃ wa bɛ nyɛ̃ nɩr za? Bʋ̃ʋ n'ʋ so ɩ̃ bʋɔlɩ nɩr bɛ sɔw? A ɩ̃ kpãkpãw nɔ̃w ɩ n ŋmãa zuo a nyɩ faafʋ ƴãw bɩɩ? Ɩ̃ nɔ̃w bɛ tɛr fãw na ɩ nyɩ so nyɩ tʋɔra bɩɩ? Ɩ̃ mɩ́ tanɩ nɩ tanʋ tɛwr ɩ a kʋ̃ɔ-kpɛ̃ɛ ʋ ko, ɛ́ ɩ a mamɛ a lɩɛbɩ wɛja-kpalɩ. Lɛ n'a a kʋ̃ɔ na bɛ mɩ́ ka be a, a zʋ́mɛ́ mɩ́ kpi kʋ̃ɔ-nyúur pʋ̃ɔ́.

³ Lɛb waar, ɩ̃ mɩ́ pàw nɩ a salom nɩ bʋ̃-sɛbla, ɛ́ su vʋɔra kparʋ pàw ʋ.»

A Sore tõ-tõ-bie (A yielu ata sob)

⁴ A Sore Naaŋmɩn wul mɛ̃ nɩ a ʋlɩ bom nɛ a na fɛr k'ɩ̃ɩ yel, tʋ̃ɔ́ mɩ́ tɛr mɔwlʋ ƴɛ̀r-bie a sob nɛ na bàl a zie a. Biɓaara za, ʋ mɩ́ sɩ̃w mɛ̃ na, k'ɩ̃ɩ tʋ̃ɔ́ bɛrɛ wone mɛ̃ a po-tuurbɛ a.

⁵ A Sore Naaŋmɩn yuo mɛ̃ nɩ a tobe, ɛ́ mãa a, ɩ̃ bɛ nàw kpaar ɛ, ɩ̃ bɛ tɩ̃wnɩ yi pùor ɛ.

⁶ Ɩ̃ lɩɛb'ɩ a ɩ̃ zikur kʋ̀ a bɛlɩ dem na pɔbr mɛ̃ a, ɛ́ lɩɛbɩ a kɔrɛ cɔw a bɛlɩ dem na tawr a ɩ̃ tɩɛm kɔblʋ vɔnɛ a. Ɩ̃ bɛ pàw a ɩ̃ niwn tɛr a kaar-bie nɩ a zʋmɛ ƴãw ɛ.

⁷ A Sore Naaŋmɩn sõwne mɛ̃ na, alɛ so a bɛ zʋmɛ bɛ 'wɔbr mɛ̃ ɩ, alɛ so ɩ̃ nyar a ɩ̃ niwn ʋ kpɛmɛ mɛ̃ kʋsɩɛr a, ɩ̃ɩ bãwnɩ a na ɩ̃ na kʋ̃ nyɛ̃ vĩ a.

⁸ A Sore pɩɛlɩ mɛ̃ na, ʋ na kpɛ m'a. Ãa n'ʋ na sàw tɛr'ɩ mɛ̃ ƴɛ̀rʋ? Ʋ ɩ tɩ lãw cen a ƴɛ̀rʋ-dɩb zie! Ãa n'ʋ na ɩ a ɩ̃ dɔ̃ sob a ƴɛ̀rʋ zie? Ʋ wa àr a ɩ̃ niŋé!

⁹ A Sore Naaŋmɩn n'ʋ sõwne mɛ̃, ãa n'ʋ na tʋ̃ɔ́ yel k'ɩ̃ɩ ɩ n sãwna sob? A ɩ̃ dɔ̃ dem na zaw nɩ bɛ za mɛ̃ kparʋ mɔwr na mɔw a.

A Sore tõ-tõ-bie a na fɛr kɛ́ bɛ bɛrɛ wone a

¹⁰ Ãa n'ʋ zɔrɛ a Sore a nyɩ pʋɔ? A fɛr'a k'aa sob bɛrɛ wone a Sore tõ-tõ-bie. Ãa n'ʋ cere a lige pʋɔ ɛ́ bɛ nyɛrɛ cãà kãw za? Ʋ ƴãw a ʋ tɩɛrʋ a Sore ƴãw, ʋ de ʋ k'ʋ ɩ a ʋ tɩ̀ɛrɛ.

¹¹ Ɛcɛ nyɩɩm za na gbɔwr vũu a, nyɩɩm na ƴãw vũu-zɛlɛ pime viiri koli nyɩ tʋɔra a, nyɩ cen a nyɩ vũu vũu-zɛlɛ pʋɔ, a vũu-zɛlɛ pime nyɩ na gbɔw a sɔwlɩsɔw. A Sore n'ʋ na ɩ nyɩ kpi kpɩɛrʋ kpɛ̃ɛ pʋɔ.