Ɩzayi 49 - A SƐB-SÕW

A Sore tõ-tõ-bie (A yielu ayi sob)

¹ Nyɩ bɛrɛ wone a ɩ̃ ƴɛ̀rʋ, nyɩɩm nɩ-bʋʋrɛ na zãá a, nyɩ cɛlɛ be, nyɩɩm na kpɩɛr zi-zãána a. Ɩ̃ tɩ cãà nɩ a ɩ̃ mã vʋr pʋɔ ɛ́ a Sore bʋɔlɩ mɛ̃. Ɩ̃ tɩ cãà nɩ a ɩ̃ mã puori, ʋʋ bʋɔlɩ a ɩ̃ yúor.

² Ʋ ɩ na a ɩ̃ ƴɛ̀rʋ ɩ zɛbr-sɔ-kpɛ̃ɛ na dɩrɛ a, ʋʋ piw mɛ̃ tɛr nɩ a ʋ nũu. Ʋ ɩ na ɩ̃ ɩ pĩi-nɔ-ɓɩlɓɩl, ʋ sɔwlɩ mɛ̃ a ʋ lɔw pʋɔ.

³ Ʋ yel mɛ̃ na: «Ɩsɩrayɛl i, fʋ̃ʋ n'ɩ a ɩ̃ tõ-tõ-bie, fʋ̃ʋ n'ʋ ɩ̃ na wul'ɩ a ɩ̃ vɩɛlʋ».

⁴ Mãa ƴãw a, ɩ̃ tɩ yere na: «Ɩ̃ bàl'ɩ ɩ̃ tʋɔra zawla, ɩ̃ hanɩ na ɛ́ a wa ɩ zi-vuo, ɛ́ a bɛ wa tɛr pɛr ɛ». Zɩ̃ k'aa ʋlɩ bom nɛ ɩ̃ na sɛw taa nɩ a tɩ gùre mɛ̃ nɩ a Sore zie, a ɩ̃ maalʋ tɩ be n a ɩ̃ Naaŋmɩn zie.

⁵ Ƴɛrɛŋa a, a Sore ƴɛ̀r'a, ʋl na cɔbrɩ mɛ̃ a ɩ̃ mã puori k'ɩ̃ɩ wa ɩ a ʋ tõ-tõ-bie a. Ʋ bɔbr'a k'ɩ̃ɩ lɛb tɛr a Zakɔb bʋʋrɛ wa n a ʋ zie, k'ɩ̃ɩ lɛb ɓã a Ɩsɩrayɛl nɩbɛ taa. A lɛ pʋɔ a, ɩ̃ ɩ n nɩr a Sore zie, ɛ́ a ɩ̃ fãw a, a ɩ̃ Naaŋmɩn n'ʋ.

⁶ Ʋ yel mɛ̃ na: «Fʋ na ɩ a ɩ̃ tõ-tõ-bie kɛ́ fʋ ɩ a Zakɔb dɔwlʋ a lɛb ìr a, kɛ́ fʋ tɛr a Ɩsɩrayɛl nɩbɛ bɛl na cãà vʋʋrɛ a lɛb wa n a, a ɩ n pʋrɩ. Ɩ̃ ɩ na fʋ ɩ a nɩ-bʋʋr-yoru cãà, k'aa ɩ̃ faafʋ cen tɩ tɔ a tẽw baarʋ zie».

A Ɩsɩrayɛl bɛ na diw cen nɩ a lɛb-waa

⁷ A Sore, a Ɩsɩrayɛl ya-diere, a ʋ Naaŋmɩn na ɩ sõw a, ƴɛ̀rɛ na. À ŋá n'a ʋ yere a fʋ zie, fʋ̃ʋ a nɩbɛ na bɛ bʋɔlɛ nɩr a, fʋ̃ʋ bɛ za na hɩ̃ɛn a, fʋ̃ʋ na ɩ a na-po-to-dem gbãgbaa a: «A na-mɩnɛ wa nyɛrɛ fʋ a, bɛ na ìr'ɩ a bɛ dà-kɔwr zu. A bɛlɩ dem na dɩ nɩ-kpɛ̃ɛnʋ a wa nyɛ b a, bɛ na gũu nɩ a fʋ niŋé». A na ɩ n à à ŋá a Sore ƴãw, ʋl na ŋmɛ̃ ʋ ŋmɛ̃a a, a Ɩsɩrayɛl Naaŋmɩn na ɩ sõw a ƴãw, ʋl na kaa ír fʋ a.

⁸ À ŋá n'a a Sore yere: «A daar na wa ta a, ɩ̃ sɔw fʋ na. A faafʋ bibir na wa vɩɛ a, ɩ̃ sõw fʋ na. Ɩ̃ cɔbrɩ fʋ na k'ɩ̃ɩ ɩ fʋ ɩ a wõ-taa bom mãa nɩ a ɩ̃ nɩbɛ cará. Ɩ̃ na ɩ n a Ɩsɩrayɛl tẽw ʋ lɛb ìr, ɩ̃ɩ lɛb põ a tẽw ŋa na sãw gã a ziir.

⁹ Ɩ̃ yere nɩ a gaso pʋɔ dem, a bɛlɩ dem na be a lige pʋɔ a: “Nyɩ yi wa a cãà pʋɔ!” Bɛ na nyɛrɛ nɩ dɩb a sɔ́r zu, bɛ na tʋ̃ɔ́ na dɩrɛ a tãli za zu.

¹⁰ Kɔ̃ nɩ kʋ̃ɔ-nyúur kʋ̃ lɛb kpɛ bɛ ɩ. A wɛja-kpalɛ sɛsɛb-tʋlʋ nɩ a mʋ̃tɔ̃w kʋ̃ lɛb dɩ bɛ ɩ. Bʋ̃ʋ n'ʋ vɛ̃, ɩ̃ na tɛr bɛ na nɩ nɔ̃wfʋ cen nɩ bul-nɛ́ɛ na ɩ ɓaar ɓaar a pɛr.

¹¹ Ɩ̃ na ɩ na a tan sɛ́ɛ za lɩɛbɩ sɛ́ɛ na tɛr cenu a. Ɩ̃ na lɛb'a maalɩ a sɛ́ɛ ƴãw.

¹² Bɛlɛ n'ɩ bɛ ŋan! Bɛ yi n zi-zãána waar: bɛ mɩnɛ yi a saa-pɛrɩ́-gʋba-lowr, bɛ mɩnɛ yi a mʋ̃tɔ̃w-kpɛb-lowr, bɛ mɩnɛ yi a saa-pɛrɩ́-dʋrʋ-lowr, a Eziptɩ tẽw.»

¹³ Salom i, ŋmɩɛr nʋ̃ɔ̀ cɛlsɩ! Ɛ́ fʋ̃ʋ, tẽw i, cɩlɛ! Tan i, nyɩ cáarɛ nʋ̃ɔ̀ cáarʋ! Bʋ̃ʋ n'ʋ vɛ̃, a Sore mɔwlɛ nɩ a ʋ nɩbɛ, ʋ zɔrɛ nɩ a kpɩɛrʋ dem nɩbaalʋ.

Mãa bɛ yiire fʋ bɛrɛ ɩ

¹⁴ A Sɩyɔ̃ tẽw tɩ yere na: «A Sore zawrɩ mɛ̃ na bɛr, a ɩ̃ zu-sob yiiri mɛ̃ na bɛr.»

¹⁵ Ɛcɛ a Sore sɔwr'a: Pɔw mɩ́ yiir'ɩ a bie ʋ na ƴɛnɛ a bɛr ɩ? Ʋ mɩ́ yiir'a na tɛr nɔ̃wfʋ a ʋ pʋɔ bʋ̃-dɔwra ƴãw ɩ? Ʋlɛ saa na yiiri a, mãa kʋ̃ yiiri fʋ bɛr towtow ɛ.

¹⁶ Nyɛ̃, ɩ̃ wi fʋ na ƴãw a ɩ̃ nũsalɛ̃pʋʋr pʋɔ, a fʋ dacĩ-bɛrɛ be n a ɩ̃ niŋé kʋralɛ.

¹⁷ A bɛlɩ dem na na lɛb mɛ b a páwr'a waar, ɛ́ a bɛlɩ dem na ŋmɛr fʋ bɛr ɛ́ sãw fʋ bɛr a, cere kɛ́ bɛr fʋ.

¹⁸ Jɩ́r a ziir za kaa nyɛ̃: a fʋ bibiir za ɓanɛ nɩ taa, bɛ waar'ɩ a fʋ zie. A Sore yere na: Ɩ̃ taa bɛ wa vʋʋrɛ! Alɛ bɛ ɩ lɛ, bɛ na ɩ na mɛ̃ pɩ̃ɛmɛ fʋ na ƴãw a, mɛ̃ kpàwr pɔw na ƴãw nɩ yúor a na sɛ a.

¹⁹ Fʋ be n deboru pʋɔ, a fʋ ziir ŋmɛr ŋmɛr a, a fʋ tẽw sãw na. Ɛcɛ ʋ kʋ̃ yaa kɛ́ ɩ pʋrɩ zuo a ʋ nɩbɛ ƴãw ɛ, ɛ́ a bɛlɩ dem na tɩ ɩrɛ kɛ́ fʋ ta cãà a, na cen na zãá nɩ fʋ.

²⁰ A bibiir fʋ na bɛ tɩ cãà tɛr a na lɛb'a ƴɛ̀rɛ à ŋá ƴãwn a fʋ tobe pʋɔ: «A zie ɩ n fɩɩra zuo a ɩ̃ ƴãw. Kʋ̀ m vuo ɩ̃ tʋ̃ɔ́ kpɩɛr a ka».

²¹ Lɛ n'a fʋ na sowre fʋ tʋɔra: «Ãa n'ʋ kʋ̀ m a bibiir bɛ ŋa za? Ɩ̃ bɛ tɩ tɛr bibiir ɛ, ɛ́ kʋ̃ʋ tʋ̃ɔ́ bɛ dɔw ɛ. Bɛ tɩ diw mɛ̃ nɩ a ɩ̃ tẽw pʋɔ cen nɩ, bɛ tɩ zawrɩ mɛ̃ na bɛr. A bɛ ŋa a, ãa n'ʋ guoli bɛ? Ɩ̃ tɩ be n be ɩ̃ yõ, ɛ́ a bɛl a, nyɩnɛ n'a bɛ tɩ be?»

²² À ŋá n'a a Sore Naaŋmɩn yere: «Ɩ̃ na kabr'ɩ a nɩ-bʋʋr-yoru, ɩ̃ na zɛw nɩ a ɩ̃ bãwfʋ a bɛ ƴãw. Bɛ na kɔ̃gbɔwlɩ nɩ a fʋ bidɛbr lɛb wa n, ɛ́ dúori a fʋ pɔwyaar baw lɛb wa n.

²³ Na-mɩnɛ nɛbɛ na guole a fʋ bibiir, ɛ́ na-mɩnɛ pɔwyaar ɩ a bɛ bɩyaalbɛ. Bɛ na mɩ́ vɔblɩ muru a fʋ niŋé. Bɛ na mɩ́ lɛnɩ nɩ a fʋ gbɛ́ɛ uuru. Lɛ n'a fʋ na bãw kɛ́ mãa n'ɩ a Sore, nɩ kɛ́ bɛlɩ dem na ƴãw a bɛ tɩɛrʋ a ɩ̃ ƴãw a bɛ nyɛrɛ vĩ ɛ.»

²⁴ Bom gãdaa na zɛb de a, bɛ na tʋ̃ɔ́ na lɛb de ʋ a ʋ zie e? Bɛ na tʋ̃ɔ́ na faa gaso nɩr na-po-tuo sob nuru pʋɔ ɔ?

²⁵ Ʋ̃ʋ, à ŋá n'a a Sore yere: «Ɩ̃ na lɛb'a de a bom a gãdaa na zɛb de a, ɩ̃ na faa nɩ a gaso nɩr a na-po-tuo sob nuru pʋɔ! Zerizalɛm i, mãa mɩŋa n'ʋ na zɛb'ɩ a bɛlɩ dem na zɛbr'ɩ fʋ a, mãa mɩŋa n'ʋ na faa a fʋ bibiir.

²⁶ Ɩ̃ na fɛr'ɩ a bɛlɩ dem na dɔwrɛ fʋ a ƴãw bɛ 'wɔb a bɛl mɩŋa ƴã-gã-nɛn, bɛ nyũ a bɛ zɩ̃ɩ kuoli, mɛ̃ nɩr na mɩ́ nyũ divɛ̃-kɛr kuoli a. Lɛ n'a bʋ̃-vʋʋra za na bãw k'aa fʋ faarɛ a, mãa n'ʋ, a mãa Sore, k'aa fʋ ya-diere a, a mãa Zakɔb Naaŋmɩn na kpɛmɛ a n'ʋ.»