Ɩzayi 48 - A SƐB-SÕW

A Sore yere nɩ yel-paalɛ na na ɩ a

¹ Nyɩ bɛrɛ wone, Zakɔb nɩ-bʋʋrɛ ɛ, nyɩɩm bɛ na bʋɔlɛ nɩ a Ɩsɩrayɛl yúor ɛ́ nyɩ ɩ a Zuda bʋʋrɛ a. Nyɩ mɩ́ pɔ n nɩ a Sore yúor ɛ́ ƴɛ̀rɛ a Ɩsɩrayɛl Naaŋmɩn ɩ-ɩrɩ ƴɛ̀rʋ, ɛcɛ a bɛ mɩ́ tu a yel-mɩŋa nɩ a mɩnʋ ɛ.

² Nyɩɩm bɛ na bʋɔlɛ “Tẽ-kpɛ̃ɛ-sõw nɩbɛ” a, nyɩɩm na de a Ɩsɩrayɛl Naaŋmɩn ʋ ɩ a nyɩ tɩ̀ɛrɛ a, ʋl a yúor na dɩ kɛ́ “A Sore, a kpɛnʋ-za-sob” a, nyɩ bɛrɛ wone:

³ Koro za n'a ɩ̃ yel a yele na ɩ tɔl a. Ɩ̃ tɩ yel'a k'ɩ̃ɩ na ɩ a na, ɩ̃ tɩ ɩ na nyɩ bãwnɩ a. Ɩ̃ wa ùr'a tõ, ɛ́ a ta.

⁴ Ɩ̃ bãw nyɩ na nyɩ ɩ nɩ-bʋʋr-gaarɩ. Nyɩ bɛ wone ƴɛ̀rʋ ɛ, ɛ́ a nyɩ zuru kpɛmɛ.

⁵ Alɛ n'a so ɩ̃ yel a yele á ŋá kʋ̀ nyɩ koro kãw za. A bɛ tɩ ta sɛr ɛ, ɩ̃ɩ ɩ nyɩ bãwnɩ a. Ɩ̃ bɛ tɩ bɔbr kɛ́ nyɩ wa yere: “A ɩ̃ tɩɩb tome n'a, a ɩ̃ dàa bɩɩ a ɩ̃ kur-zɩɛ ŋmɩn n'ʋ yel a lɛ” ɩ.

⁶ Nyɩ wõ n a ʋlɩ bom nɛ ɩ̃ na tɩ yel a, ɛ́ nyɩ nyɛ̃ na k'ʋʋ maal'a. Nyɩ mɩ̀ kʋ̃ nyɛ̃ ʋ bãw ɛ? A na tĩ a ƴɛrɛŋa a, ɩ̃ yere nɩ yel-paalɛ na na ɩ a. Ɩ̃ bɛr a nɩ sɛr ɛ́ nyɩ bɛ bãw a ɩ.

⁷ Yel-kore bɛ n'a ɩ, ƴɛrɛŋa n'a ɩ̃ ír a. Wa tɩ tɔ a dɩ̃a a, nyɩ bɛ dãw wõ bɛ ƴɛ̀r a ƴɛ̀rʋ ɛ. Ɩ̃ bɛ tɩ bɔbr kɛ́ nyɩ yere: “Tɩ tɩ bãwnɩ a na” ɩ.

⁸ Nyɩ bɛ bɛr wõ ɩ, nyɩ bɛ bãw bom ɛ, koro za n'a nyɩ bɛ cɛlɛ be ɩ. Ɩ̃ bãw nyɩ na nyɩ ɩ mɩlmɩlbɛ, ɛ́ bɛ bʋɔlɛ nyɩ “nɩbɛ na gaarɩ a bɛ dɔwfʋ daar za a”

⁹ A ɩ̃ yúor zũú n'a ɩ̃ nyɔwr a ɩ̃ suur. A danʋ a na sɛw kɛ́ nyɩ danɛ mɛ̃ a ƴãw n'a ɩ̃ kʋ̃ bɛr nyɩ bɛ kʋ nyɩ pàw pɛr ɛ.

¹⁰ Ɩ̃ ɩ na nyɩ lɛb vɩɛl, ɛ́ a bɛ ɩ a vũu na mɩ́ ɩ a salm-pla ʋ vɩɛl a pʋɔ n'a ɩ, kpɩɛrʋ vũu pʋɔ n'a.

¹¹ Mãa wa ɩ à à ŋá a, mãa yõ tẽtẽ ƴãw n'a. Bʋ̃ʋ n'ʋ vɛ̃, ɩ̃ kʋ̃ tʋ̃ɔ́ sàw a ɩ̃ yúor sãw ɛ. Ɩ̃ bɛ bɛrɛ a ɩ̃ yúor-vɩɛlʋ-danʋ kʋ̀rɛ nɩ-yũo ɩ.

A Sore tone nɩ a nãà Siirisɩ

¹² A Sore yere na: Nyɩ bɛrɛ wone mɛ̃, Zakɔb nɩ-bʋʋrɛ ɛ, nyɩɩm Ɩsɩrayɛl nɩbɛ ɩ̃ na bʋɔlɩ a. Mãa n'ʋ! Mãa n'ɩ a niw-diere, mãa mɩ̀ n'ɩ a po-pàwrɛ.

¹³ A ɩ̃ nuru n'a ɩ̃ bin nɩ a tẽw pɛr ɛ́ dɔl a salom. Mãa wa bʋɔlɛ a wa báarɛ a, a mɩ́ ta n daadaalɛ àr.

¹⁴ Nyɩ ɓã taa nyɩ za bɛr wõ: Ɩ̃ tɛr'ɩ bá na na maalɩ a lɛ ɩ̃ na bɔbr a Babɩlɔn tẽw ƴãw, ɛ́ ɩ a Babɩlɔn tẽw dem bãw k'ɩ̃ɩ tɛr'ɩ kpɛnʋ a. Ɛcɛ a nyɩ buor'ʋ yel a yel ŋa?

¹⁵ Mãa n'ʋ, mãa yõ n'ʋ ƴɛ̀r. Mɔ̃ mɩ̀, ɩ̃ bʋɔl'ɩ a nɩr ŋa, ɩ̃ ƴãw na ʋ wa, ɛ́ a ʋ ton na tõ n vla.

¹⁶ Nyɩ taw pɩɛlɩ mɛ̃ bɛr wõ: a pɛr-tib daar za a, ɩ̃ bɛ dãw sɔwlɩ ƴɛ̀r ɛ. A daar ʋl a yele á ŋá na ɩ a, ɩ̃ tɩ be n be. — Ɛ́ ƴɛrɛŋa a, a Sore Naaŋmɩn n'ʋ tone mɛ̃ ɛ́ kʋ̀rɛ mɛ̃ a ʋ Vʋʋrʋ.

Fʋ̃ʋ tɩ ɩ mɛ̃ fʋ bɛr'a wõ m a!

¹⁷ À ŋá n'a a Sore na yarɛ dier fʋ a, a Ɩsɩrayɛl Naaŋmɩn na ɩ sõw a ƴɛ̀rɛ: «Mãa n'ɩ a Sore fʋ Naaŋmɩn. Mãa n'ʋ wule fʋ a ʋlɩ bom nɛ na na tʋ̃ɔ́ wɩ̀ɛ fʋ a. Mãa n'ʋ tɛr fʋ cere nɩ a sɔ́r fʋ na lo a zu.

¹⁸ Fʋ̃ʋ tɩ ɩ mɛ̃ fʋ cɛlɩ nɩ a ɩ̃ nɛ-ƴãwnɩ zie a, a fʋ ƴã-ɓaarʋ nãà ɩ na mɛ̃ man a, ɛ́ a fʋ mɩnʋ ɩ mɛ̃ a kʋ̃ɔ-kpɛ̃ɛ kʋ̃ɔ-mie a!

¹⁹ A fʋ bʋʋrɛ nãà yãwmɛ na mɛ̃ a kʋ̃ɔ-kpɛ̃ɛ nʋɔr biir-bie a. A bɛ yúor bɛ be za nãà bɔr a ɩ̃ niŋé ɩ!»

Nyɩ yi zaa a Babɩlɔn tẽw pʋɔ

²⁰ Nyɩ yi a Babɩlɔn tẽw pʋɔ, nyɩ yi a tẽw ŋa pʋɔ zɔ. Nyɩ ŋmɩɛr nʋ̃ɔ̀ cɛlsɩ yere nɩ a yel ŋa, nyɩ ɩ bɛ wõ ʋ, nyɩ ŋmɛ ʋ yaarɩ tɩ tɔ a tẽw baarʋ zie. Nyɩ yel: «A Sore ya na de a ʋ tõ-tõ-bie Zakɔb!»

²¹ Kʋ̃ɔ-nyúur bɛ kpɛ a ʋ nɩbɛ a wɛja-kpalɛ pʋɔ ʋ na tɩ tɛr bɛ cere nɩ a ɩ. Ʋ tɩ ɩ na kʋ̃ɔ tɛ yi pìir pʋɔ a bɛ ƴãw, ʋ tɩ ɓar'ɩ a pìir, ɛ́ a kʋ̃ɔ gbɔlɛ.

²² Ɛcɛ a Sore yere na kɛ́ ƴã-ɓaarʋ bɛ ka a nɩ-faar ƴãw ɛ.