Ɩzayi 46 - A SƐB-SÕW

A Babɩlɔn tẽw ŋmɩn-bɛlmɛ lo n a Naaŋmɩn-sɩza niŋé

¹ A ŋmɩn Bɛl gũu na, a ŋmɩn Nebo lo na. Bɛ de nɩ a dasuli tuo dʋn. A bome bɛ na mɩ́ tɩ tuo cɔrɩ cere nɩ a, alɛ n'ɩ a ŋan lɩɛbɩ tuor, to-tɩbrʋ dʋn na bàl a ƴãw.

² A ŋmɩmɛ gũu na, a za lãw na lo. A bɛ tʋ̃ɔ́ faa a dasuli ɛ, bɛ ír'ɩ a al tɛɛ za cere nɩ tẽ-yũo.

³ Nyɩ bɛrɛ wone a ɩ̃ ƴɛ̀rʋ, Ɩsɩrayɛl nɩbɛ ɛ, nyɩɩm Zakɔb bʋʋrɛ na cɛ a, nyɩɩm ɩ̃ na kaa a nyɩ dɔwfʋ daar za a, nyɩɩm na dɛ wa nyɛrɛ a cãà wa báarɛ ɩ̃ɩ tɛr a.

⁴ Ɩ̃ na ŋmɛ̃ n ɩ̃ ŋmɛ̃a tɩ ta a nyɩ koru daar. Ɩ̃ na tɩɛ nyɩ na tɩ ta a nyɩ zukɔbr-pɛlɛ daar. Mãa n'ʋ maalɩ nyɩ, mãa n'ʋ na tɛr nyɩ. Ɩ̃ na kaa nɩ a nyɩ zie, ɩ̃ɩ na faa nyɩ na.

⁵ Ãa n'ʋ nyɩ na tʋ̃ɔ́ de ʋ ŋmɛ̃ taa nɩ mɛ̃? Ãa n'ʋ nyɩ na de tɩ ɩ been? Ãa n'ʋ nyɩ na tʋ̃ɔ́ de m man nɩ tɩ ɩ a ŋmɛ̃-ta-taabɛ?

⁶ Nɩbɛ bɛ mɩnɛ mɩ́ cir'ɩ a salm-zɩɛ na be a bɛ vʋɔra pʋɔ a, bɛ mɩ́ ker'ɩ a salm-pla nɩ bʋ̃-kera, bɛ mɩ́ ya n salm-nyɩlɛ k'ʋʋ maalɩ ŋmɩn kʋ̀ bɛ, bɛ gũune a ŋmɩn ŋa niŋé, puore ʋ.

⁷ Bɛlɛ nɛbɛ mɩ́ tuo ʋ a bɛ bawŋman zu ɛ́ nyɔw tɛr cen nɩ, tɩ ƴãw ʋ a ʋ beba zie. A ŋmɩn na àr'ɩ a be, ʋ be cere zie ɩ. Nɩr wa kõ bʋɔl'ʋ a, ʋ bɛ sɔwr ɛ. Ʋ bɛ faarɛ nɩr za a ʋ kpɩɛrʋ pʋɔ ɛ.

A faafʋ bɛ zãá ɩ

⁸ Nyɩ bãwnɩ à á ŋá ɛ́ ƴãw fãw! Nyɩ tɩɛrɩ a kaa, nyɩɩm nɩsaal-gaarɩ i!

⁹ Nyɩ bãwnɩ a yele na de niwn ɩ a, a koro za yele: mãa n'ɩ a Naaŋmɩn, kãw bɛ lɛb ka be ɩ. Naaŋmɩn bɛ be be mɛ̃ a mãa a ɩ.

¹⁰ A pɛr-tib daar'a ɩ̃ yel a alɩ bome nɛ na na ɩ a nɩdaar a. Ɩ̃ de nɩ niwn yel koro za a alɩ bome nɛ na bɛ ɩ sɛr a. Ɩ̃ yere na: a lɛ ɩ̃ na tɩɛrɩ a yele bin a na maal'a. Bom nɛ za ɩ̃ na bɔbr a, ɩ̃ mɩ́ maal ʋ na.

¹¹ A saa-pɛrɩ́ zi-zãána n'a ɩ̃ bʋɔlɛ nɩr na kpɛmɛ mɛ̃ sɩla a. Ʋlɛ n'ʋ na maalɩ a lɛ ɩ̃ na tɩɛrɩ a yele bin a. A lɛ ɩ̃ na yel a, ɩ̃ na ɩ na. A lɛ ɩ̃ na tɩɛrɩ a yele bin a, ɩ̃ na maal'a.

¹² Nyɩ bɛrɛ wone a ɩ̃ ƴɛ̀rʋ, nyɩɩm zu-kpɛn dem i, nyɩɩm na zãá nɩ a mɩnʋ a!

¹³ A ɩ̃ mɩnʋ a, ɩ̃ ɩ na ʋ tawr pɩɛlɛ, ʋ bɛ cãà zãá ɩ. A faafʋ pɩɛl'a, mãa mɩŋa n'ʋ waar'ɩ ʋ a Sɩyɔ̃. Ɩ̃ na kʋ̀ n a Ɩsɩrayɛl a ɩ̃ vɩɛlʋ.