Ɩzayi 41 - A SƐB-SÕW

A nɩr ʋl a Sore na ƴãw k'ʋ yi lo a sɔ́r a

¹ A Sore yere na: nyɩɩm tẽ-zãánɩ nɩbɛ ɛ, nyɩ ŋmãa vʋʋrʋ ɛ́ bɛr wõ m. Nyɩɩm nɩ-bʋʋrɛ za a, nyɩ lɛb páw fãw-paala. Nyɩ taw pɩɛlɩ ɛ́ ƴɛ̀r. Nyɩ ɩ tɩ lãw cen a ƴɛ̀rʋ-dɩb ƴãw.

² Nɩr yi na lo a sɔ́r a saa-pɛrɩ́. Ʋ zɛbr'a tʋ̃ɔ́nɛ zie za ʋ na tɔlɛ a. Ãa n'ʋ ƴãw ʋ yi lo a sɔ́r? Ãa n'ʋ ƴãwnɛ a nɩ-bʋʋrɛ a ʋ nuru pʋɔ? Ãa n'ʋ ɩrɛ k'ʋ sore a na-mɩnɛ? A ʋ zɛbr-sɔ-kpɛ̃ɛ mɩ́ ɩ na bɛ lɩɛbɩ tã-buulu, a ʋ pime mɩ́ diw bɛ na yaarɩ mɛ̃ sɛsɛb na ɓáw sàwr cen nɩ a.

³ Ʋ diwr bɛ na, ʋ tɔlɛ nɩ nɩ ƴã-ɓaarʋ, a ʋ gbɛ́r bɛ tʋɔr tẽw ɛ.

⁴ Ãa n'ʋ ɩ à á ŋá za? A sob nɛ na mɩ́ ɩ a yele ta a pɛr-tib daar a n'ʋ. Mãa n'ʋ, a Sore. Ɩ̃ ɩ n a niw-diere, ɛ́ tɩ ta a baarʋ daar a, ɩ̃ ɩ n a Sore.

⁵ A nɩ-bʋʋrɛ na zãá a nyɛ̃ nɩ a yele na ɩ a, dɛ̃bɩ̃ɛ ɩrɛ bɛ. A tẽw baarʋ zie nɩbɛ taw na ta ɛ́ màwr.

⁶ Ŋa za sõwne nɩ a ʋ tɔ sob, kãw yere a ƴen sob: «Ƴãw fãw!»

⁷ A nuru-tõ-tone yere nɩ a salm-zɩɛ nɩ a salm-pla tõ-tone k'ʋʋ ƴãw fãw. A sob nɛ na ŋmɩɛr a kure mawlɛ nɩ a 'hama a yere nɩ a sãa-kpɩɛrɛ k'ʋʋ ƴãw fãw. Ʋ yere nɩ à ŋá a tɔ̃wfʋ zie ƴãw: «Ʋ vɩɛl'a». Al pùorí bɛ kpa a tɩɩb nɩ pĩi-bie, ɩ k'ʋ àr.

Ɩsɩrayɛl i, ta zɔrɛ dɛ̃bɩ̃ɛ ɩ

⁸ Ɛcɛ fʋ̃ʋ a, Ɩsɩrayɛl i, fʋ ɩ n a ɩ̃ tõ-tõ-bie, Zakɔb i, fʋ ɩ n a nɩ-bʋʋrɛ ɩ̃ na kaa ír a, a ɩ̃ bá Abraham bʋʋrɛ.

⁹ Ɩ̃ cen nɩ a tẽw baarʋ zie tɩ tɛr fʋ wa n, ɩ̃ bʋɔlɩ fʋ nɩ a zi-zãánɩ za fʋ na tɩ be a. Ɩ̃ yel fʋ na: «A ɩ̃ tõ-tõ-bie a, fʋ̃ʋ n'ʋ, ɩ̃ kaa na ír fʋ, ɩ̃ bɛ jɛ b bɛr ɛ.»

¹⁰ Ta zɔrɛ dɛ̃bɩ̃ɛ ɩ, ɩ̃ be n a fʋ zie. Ta ɩ dɛ̃bɩ̃ɛ sãá a fʋ jɩ́rʋ pʋɔ ɩ. Bʋ̃ʋ n'ʋ vɛ̃, a fʋ Naaŋmɩn a, mãa n'ʋ. Ɩ̃ ɩrɛ na fʋ kpɛmɛ, ɩ̃ waar'ɩ a fʋ sõwfʋ, ɩ̃ɩ gùre fʋ na nɩ a ɩ̃ nũu na kpɛmɛ ɛ́ mɩ́ zɛb tʋ̃ɔ́ a.

¹¹ Vĩ nɩ zʋmɛ n'a bɛ na nyɛ̃, a bɛlɩ dem za na nyɛ̃ nɩ fʋ suur a. A bɛlɩ dem na na bɔbr fʋ nɔhaarʋ a, bɛ ta cãà ɩ bom za ɩ, ɛ́ kpi.

¹² Fʋ na bɔ n a bɛlɩ dem na zɛbr'ɩ fʋ a, ɛ́ kʋ̃ nyɛ̃ bɛ ɩ. A nɩbɛ na ŋmaarɛ nɩ fʋ a zɛbr a kʋ̃ cãà ɩ bom za ɩ.

¹³ Bʋ̃ʋ n'ʋ vɛ̃, a mãa Sore a, ɩ̃ ɩ n a fʋ Naaŋmɩn. Ɩ̃ nyɔw fʋ nɩ a dʋrʋ nũú. Ɩ̃ yere na kʋ̀rɛ fʋ: «Ta zɔrɛ dɛ̃bɩ̃ɛ ɩ, ɩ̃ waar'ɩ a fʋ sõwfʋ.»

Ɩ̃ waar'ɩ a fʋ sõwfʋ

¹⁴ Ta zɔrɛ dɛ̃bɩ̃ɛ ɩ, Zakɔb i, fʋ̃ʋ zãzul-cãpile e, fʋ̃ʋ Ɩsɩrayɛl na cɛ bɛ tɛr fãw a. A Sore yere na: Ɩ̃ waar'ɩ a fʋ sõwfʋ. A sob nɛ na yarɛ dier fʋ a, mãa n'ʋ, a Ɩsɩrayɛl Naaŋmɩn na ɩ sõw a.

¹⁵ Ɩ̃ na ɩ na fʋ ɩ ku-jajaa paala, a nyɩmɛ na kpɛmɛ ɛ́ ɩ cɩlsɩ a. Fʋ na ƴɛ́r'ɩ a tan ŋmɛr, ɩ k'a lɩɛbɩ tã-buulu, ɛ́ ɩ a tãli mɛ̃ a lɛ bɛ na mɩ́ ɩ a mʋ̃ɔ a.

¹⁶ Fʋ na yɛ́lɩ a na, a sɛsɛb de cen nɩ, sɛsɛb-pɩl na yaar a na bɛr a ziir za. Ɛcɛ a fʋ̃ʋ a, fʋ na ŋmɩɛr'ɩ nʋ̃ɔ̀ cɛlsɩ a Sore ƴãw, fʋ na nyʋʋr'a, a Ɩsɩrayɛl Naaŋmɩn na ɩ sõw a ƴãw.

A wɛja-kpalɛ na bul'ɩ mʋ̃ɔ

¹⁷ A nan dem nɩ a kpɩɛrʋ dem bɔbr'ɩ kʋ̃ɔ ɛ́ a bɛ ka be ɩ. A kʋ̃ɔ-nyúur kpɛ bɛ na a kɔkɔr kò. Ɛcɛ mãa, a Sore, ɩ̃ na sɔw bɛ na, mãa, a Ɩsɩrayɛl Naaŋmɩn, ɩ̃ kʋ̃ zawrɩ bɛ bɛr ɛ.

¹⁸ Ɩ̃ na ɩ na mamɛ kʋ̃ɔ zɔrɛ a tã-kpalɩ zu, ɛ́ kʋ̃ɔnɩ bule yire a fʋɔlɩ sɔwlɩsɔw. Ɩ̃ na ɩ na a wɛja-kpalɛ lɩɛbɩ gbãtar, ɛ́ a tẽsɔw-kõw-welwel lɩɛbɩ bul-nɛ́ɛ zie.

¹⁹ A wɛja-kpalɛ pʋɔ a, ɩ̃ na sɛl'ɩ tɩ-pɛ-bʋʋrɛ za, a bɛrɛ nɩ a pʋrmɛ. A ziir al kʋ̃ɔ na bɛ ka be a, ɩ̃ na lãw na ƴãw tɩ-pɛ-bʋʋrɛ dẽdeni.

²⁰ Lɛ n'a a nɩbɛ za na nyɛ̃ k'aa Sore n'ʋ maalɩ a yele á ŋá, k'aa Ɩsɩrayɛl Naaŋmɩn na ɩ sõw a n'ʋ ír a. A nɩbɛ za na bãwnɩ a na, bɛ za na cɛlɛ nɩ be ɛ́ bãw a pɛr.

A tɩbɛ bɛ tɛr pɛr ɛ

²¹ A Sore, a Zakɔb nɩ-bʋʋrɛ nãà, yere na: Nyɩɩm, nɩ-bʋʋr-yoru ŋmɩmɛ ɛ, nyɩ wa manɩ a nyɩ yel, nyɩ ƴɛ̀r wul a nyɩ yel-mɩŋa.

²² Nyɩ taw ta, ɛ́ de niwn yel kʋ̀ tɩ a ʋlɩ bom nɛ na na ɩ a! Bʋ̃ʋ n'ʋ ta baarɩ? Nyɩ wul tɩ, ɛ́ tɩ na tɩɛr'ʋ na kaa. Bɩɩ nyɩ yel a nɩdaar yel kʋ̀ tɩ, ɛ́ tɩ na bãw nɩ a ʋlɩ bom nɛ na na ta a.

²³ Ãà, nyɩ yel a ʋlɩ bom nɛ na na ɩ a kʋ̀ tɩ. Lɛ n'a tɩ na bãw kɛ́ nyɩ ɩ n ŋmɩmɛ. Nyɩ nɩ̃ɛ maalɩ a vla bɩɩ a faa, ʋʋ ɩ pʋrɩ, kɛ̀ tɩ tʋ̃ɔ́ yuo a mimie, ɛ́ tɩ za lãw nyɛ̃ ʋ.

²⁴ Ɛcɛ nyɩ bɛ ɩ bom za ɩ, a nyɩ tõ-toni bɛ tɛr pɛr ɛ. Sob nɛ na kaa ír nyɩ nyɩ ɩ a ʋ ŋmɩmɛ a ɩrɛ nɩ kɔkɔrʋ mɛ̃ a nyɩɩm a.

²⁵ A saa-pɛrɩ́-gʋba-lowr a, ɩ̃ ƴãw na nɩr yi, ɛ́ ʋlɛ n'ɩ ŋan waar. A be a mʋ̃tɔ̃w na mɩ́ pur a, ʋ wõ na bɛ bʋɔlɩ a ʋ yúor. Ʋ nɛbr'ɩ a na-kpɛ̃ɛ-lɩɛrbɛ mɛ̃ mɛ̃mɛrɛ bɛ na mɩ́ nɛbr a, bɩɩ mɛ̃ yawr-mɩɛrɛ na nɛbr a yawra nɩ a ʋ gbɛ́ɛ a.

²⁶ Ãa n'ʋ yel a yel ŋa a pɛr-tib daar kɛ́ tɩ bãw ʋ? Ãa n'ʋ tɩ yel ʋ, ʋʋ bɛ ta sɛr, kɛ́ tɩ tʋ̃ɔ́ yel: «Yel-mɩŋa n'a!» Nɩr za bɛ tɩ yel ʋ ɛ, nɩr za bɛ tɩ háa nʋɔr a ʋ ƴãw ɛ, nɩr za bɛ tɩ wõ nyɩ ƴɛ̀r ɛ.

²⁷ A mãa Sore n'ɩ a dãw-niwn sob na yel kʋ̀ a Zerizalɛm a. Bʋ̃ʋ n'ʋ vɛ̃, ɩ̃ tõ n yel-nʋ̃ɔ̀ yere a Sɩyɔ̃.

²⁸ Ɩ̃ jɩ́r'ɩ vla vla: ɩ̃ bɛ nyɛ̃ nɩr za ɩ. A nɩ-bʋʋr-yoru ŋmɩmɛ pʋɔ a, kãw za bɛ tɛr ƴɛ̀rʋ ɛ! Nɩr bɛ be be na wul yã ɩ, nɩr na na tʋ̃ɔ́ sɔw mɛ̃ a!

²⁹ A za bɛ ɩ bom za ɩ, bɛ ɩrɛ bom za ɩ. A dasuli bɩɩ? Sɛsɛb, zi-vuo!