Ɩzayi 40 - A SƐB-SÕW

ZIIR AYI SOB A ƖSƖRAYƐL MƆWLƲ 40—55 Nyɩ mɔwlɩ a ɩ̃ nɩ-bʋʋrɛ

¹ Nyɩ mɔwlɩ, nyɩ mɔwlɩ a ɩ̃ nɩ-bʋʋrɛ, a nyɩ Naaŋmɩn n'ʋ yere.

² Nyɩ ƴɛ̀r a ɓãa a Zerizalɛm socir. Nyɩ zɛw kɔkɔr yel ʋ k'aa ʋ pɔ̃tɔrɩ tome baar'a, k'ʋʋ ya n a ʋ sãwna san baarɩ. Bʋ̃ʋ n'ʋ vɛ̃, a Sore ƴãw na ʋ ya a ʋ yel-bebe za san gb'a ayi.

³ Kɔkɔr kãw cɩɩrɛ na yere: «Nyɩ puo sɔ́r a wɛja-kpalɛ pʋɔ a Sore ƴãw. Nyɩ maalɩ sɔ́r a zi-kõw ŋa pʋɔ ʋ vɩɛl a tɩ Naaŋmɩn ƴãw.

⁴ Fʋɔla za, ʋ paalɩ tanɛ do, tã-kpɛ̃ɛ za nɩ tãle za, a tuw siw man. A gbĩgbin, ʋ lɩɛbɩ zie na man taa a, ɛ́ a zi-kɛrɩ lɩɛbɩ fʋɔl-yɛlsɩ!

⁵ Lɛ n'a a Sore yúor-vɩɛlʋ-danʋ na sãá, ɛ́ a nɩbɛ za na nyɛ̃ ʋ na. À à ŋá n'a a Sore yel.»

⁶ Kɔkɔr yere nɩ a ɩ̃ zie: «Cɩɩrɩ yel!» Ɩ̃ sowri: «Bʋ̃ʋ n'ʋ ɩ̃ na cɩɩrɩ yel?» Ʋ sɔw: «Bom ŋa n'ʋ: A nɩsaalbɛ ɩ na mɛ̃ mʋ̃ɔ a, bɛ bɛ kpɛmɛ zuo a póru va-puuru ɛ.

⁷ A mʋ̃ɔ mɩ́ ko na, a va-puuru mɩ́ var'a, a Sore sɛsɛb wa fu ŋmɛ a a. — Sɩza n'a, a nɩsaalbɛ bɛ tɛr tʋɔr mɛ̃ a mʋ̃ɔ a ɩ—.

⁸ A mʋ̃ɔ mɩ́ ko na ɛ́ a va-puuru vàr, ɛcɛ a Sore tɩ Naaŋmɩn ƴɛ̀rʋ na be n be kʋralɛ.»

Yel-nʋ̃ɔ̀ na ɩ bʋ̃-yera a

⁹ Zerizalɛm i, do tãw na kɛrɩ a zu, Sɩyɔ̃ i, cɩɩrɛ nɩ a fʋ fãw za. Fʋ̃ʋ na waar'ɩ yel-nʋ̃ɔ̀ a, zɛw a kɔkɔr, ta zɔrɛ dɛ̃bɩ̃ɛ ɩ. Yel a Zuda tẽw tẽ-bɛrɛ: «Nyɩ nyɛ̃ a nyɩ Naaŋmɩn!

¹⁰ Nyɩ nyɛ̃ a Sore Naaŋmɩn. Ʋ waar'ɩ nɩ kpɛnʋ, ʋ tɛr'ɩ fãw na dɩ a naalʋ. Ʋ lɛb'a waar'ɩ a bom ʋ na páw a, ʋ lɛb'a waar'ɩ a ʋ tome sã-ya.

¹¹ Ʋ àrɛ nɩ nɩ a ʋ dʋn mɛ̃ pi-cɩ̃ɩnɛ a, ʋ mɩ́ zɛw nɩ a nũu kpa a ɓã taa, ʋ mɩ́ nyɔw nɩ a péli ɓori ɓori ɛ́ kparɛ a pi-mã mɩnɛ bɛ̀lbɛ̀l.»

Naaŋmɩn gãw nɩ bom za

¹² Ãa n'ʋ manɩ a kʋ̃ɔ-kpɛ̃ɛ kʋ̃ɔnɩ a ʋ nũsalɛpʋ̃ɔ́? Ãa n'ʋ dɔl a ʋ nobie man nɩ a salom yɛ̀lʋ? Ɛ́ a tẽsɔw tanɛ, ãa n'ʋ dĩ dĩ a ƴãw gara pʋɔ manɩ a? Ãa n'ʋ dɔwlɩ a tã-bɛrɛ nɩ a tãli tɩbrʋ bʋ̃-mána zu manɩ a?

¹³ Ãa n'ʋ manɩ a lɛ a Sore vʋʋrʋ na ɩ a? A Naaŋmɩn nɩ-waala n'ɩ buor ʋ na ɩ ʋ bãw a lɛ ʋ na tɩɛrɩ a yele bin a?

¹⁴ Ãa n'ʋ a Naaŋmɩn ƴãw ʋ wul ʋ a yã k'ʋʋ nyɛrɛ, k'ʋʋ zanɩ a yele jielu vla, k'ʋʋ zanɩ a yã-bãwfʋ, k'ʋʋ bãw a bom a na fɛr kɛ́ bɛ bãw a?

¹⁵ A nɩ-bʋʋrɛ ɩ na mɛ̃ kʋ̃ɔ-bir na yi gara pʋɔ lo a, mɛ̃ biir-bir bʋ̃-kera zu a. A nɩ-bʋʋrɛ na zãá zãá a tɩbrʋ ɩ na mɛ̃ a úuru a.

¹⁶ A Libã tẽw dʋn bɛ saalɩ bɛ na maal'ɩ nyɩw-a-za-bàwr kʋ̀ a Sore ɩ, a ʋ tɩɩr za bɛ saalɩ a vũu gbɔwfʋ ƴãw ɛ.

¹⁷ A nɩ-bʋʋrɛ za ɩ n bʋ̃-zaalɛ a Sore niŋé, bɛ bɛ ɩ bom za a ʋ zie ɩ, sɛsɛb tɛwr.

A Naaŋmɩn bɛ tɛr ʋ tɔ ɩ

¹⁸ Ãa n'ʋ nyɩ na de a Naaŋmɩn man nɩ? Bʋ̃ʋ n'ʋ nyɩ na de ʋ ŋmɛ̃ taa nɩ ʋ?

¹⁹ Tɩɩb kãw bɩɩ? Towtow! Nuru tõ-tone kãw n'ʋ nyɩl kure maal'ɩ ʋ, salm-zɩɛ tõ-tone kãw nyɩl salm-zɩɛ pàw ʋ, ɛ́ ƴãw ʋ salm-pla bãzɔlɛ a kɔkɔrɩ́.

²⁰ Ʋlɩ sob na ɩ nã́w sob zuo a de-kʋ̀b bom ŋa tɔ tɩrʋ ƴãw a, kaa na ír dàa na bɛ pʋ̃ɔnɛ a. Al pùorí ʋ bɔ nuru tõ-tone na bãw vla na tʋ̃ɔ́ maalɩ tɩɩb ʋ kpɛmɛ àr a.

²¹ Nyɩ bɛ bãw ɛ? Nyɩ bɛ wõ a ɩ? Bɛ bɛ yel yel kʋ̀ nyɩ a pɛr-tib daar za ɩ? Nyɩ bɛ wõ a alɩ bome nɛ na n'ɩ a tẽ-daa pɛr a ɩ?

²² A Sore naalʋ-dà-kɔw be n a tẽw tʋra zu-sɔw, ɛ́ a nɩsaalbɛ mɩ́ sãá a ʋ zie ɩ mɛ̃ sãsowe a. Ʋ yɛ́r'ɩ a salom mɛ̃ pɛn-kpɛ̃ɛ a, ʋ dɔl ʋ na mɛ̃ pɛn-sɛw a, a ʋ kpɛb ƴãw.

²³ Ʋ mɩ́ ɩ n a tẽ-daa ŋa na-mɩnɛ bɛ bɛ cãà ɩ bom za ɩ, ɩ a ʋ kaarbɛ bɛ ɩ bʋ̃-zawlɛ.

²⁴ Bɛ bɛ de a zie baarɩ sɛr ɛ, bɛ bɛ zɩ̃ baarɩ sɛr ɛ, ɛ́ a Sore pɛblɩ a ʋ pɩɛlʋ a bɛ zu. Bɛlɛ n'ɩ bɛ ŋan ko, a sɛsɛb-pɩl ɓáw bɛ cen nɩ mɛ̃ sàwr a.

²⁵ A Naaŋmɩn na ɩ sõw a sowre na: «Ãa n'ʋ nyɩ na tʋ̃ɔ́ de m man nɩ? Mãa nɩ ãa nɛbɛ na tʋ̃ɔ́ ɩ been?»

²⁶ Nyɩ úori a salom ɛ́ nyɛ̃: ãa n'ʋ ír a ŋmar-bie? A sob nɛ na mɩ́ ɩ a yi a za cɔrɩ vla cere mɛ̃ sojarɩ, ʋʋ bʋɔlɩ a za, ŋa nɩ ʋ yúor ŋa nɩ ʋ yúor a n'ʋ. A ʋ fãw nɩ a ʋ kpɛnʋ bɛrmɛ nɩ yaga, kɛ̀ ŋmar-bir kãw za bɛ be be bɛ mɩ́ sàw a ʋ bʋɔlʋ ɛ.

A Sore mɩ́ kʋ̀ n fãw a bɛlɩ dem na bɛ tɛr ʋ a

²⁷ Zakɔb i, bʋ̃ʋ n'ʋ so fʋ yere, Ɩsɩrayɛl i, bʋ̃ʋ n'ʋ so fʋ ƴɛ̀rɛ à ŋá: «A Sore bɛ nyɛ̃ a lɛ a na ŋmɛ̃ m'a ɩ, a lɛ-na-tu-sɔr a ɩ̃ ƴãw a sɔwl'ɩ a ɩ̃ Naaŋmɩn zie».

²⁸ Fʋ bɛ bãwnɩ a ɩ? Fʋ bɛ wõ a ɩ? A Sore ɩ n a Naaŋmɩn na be kʋralɛ a. Ʋ ír'ɩ a tẽw za. A ʋ fãw bɛ síwre ɩ, ʋ bɛ bàlɛ ɩ. Nɩr kʋ̃ tʋ̃ɔ́ manɩ a ʋ yã zulu ɛ.

²⁹ Ʋ mɩ́ lɛb'a kʋ̀ fãw a bɛlɩ dem na bɛ tɛr ʋ a, ɛ́ kʋ̀ kanyir a sob nɛ na bàl ʋ za a.

³⁰ A pɔlbili tɛɛ za fãw mɩ́ siwr'a, bɛ mɩ́ bàl'a. A nɩbɛ na ta nɩbɛ a mɩ́ lo na.

³¹ Ɛcɛ a bɛlɩ dem na mɩ́ ƴãw a bɛ tɩɛrʋ a Sore ƴãw a, mɩ́ páw nɩ fãw-paala. Bɛ mɩ́ ƴaw na mɛ̃ sɩlɩ a, bɛ mɩ́ zɔrɛ na bɛ bàlɛ ɩ, bɛ mɩ́ cere na tɔlɛ nidaa ɛ́ a bɛ fãw bɛ síwre ɩ.