Ɩzayi 38 - A SƐB-SÕW

A Ezekɩasɩ bàalʋ nɩ a ʋ sanʋ

¹ A ʋlɩ daar nɛ, a nãà Ezekɩasɩ tɩ lo n a ʋ kũu-kʋra bàalʋ. A naaŋmɩn-ƴɛ̀r-manɛ Ɩzayi na ɩ Amɔtɩsɩ bidɛb a tɩ wa na wa nyɛ̃ ʋ yel ʋ: «À ŋá n'a a Sore yere: Cɔbrɩ a fʋ yele ƴãw. Bʋ̃ʋ n'ʋ vɛ̃, fʋ na kpi na, fʋ bɛ lɛbr ìre a fʋ bàalʋ ŋa pʋɔ ɛ.»

² Lɛ n'a a Ezekɩasɩ tɩ lɩɛbɩ a ʋ niwn bɛr a dacin lowr, ɛ́ puori a Sore à ŋá:

³ «'Woi! Sore e, ɩ̃ zɛlɛ fʋ na, bãwnɩ a a ɩ̃ ɩb za a fʋ zie na tɩ tori a, ɩ̃ tɩ ɩ n a lɛ na vɩɛl a fʋ zie a kʋralɛ!» A Ezekɩasɩ tɩ kõ na cir mʋta-kʋ̃ɔ yaga.

⁴ Lɛ n'a a Sore tɩ ƴɛ̀r a Ɩzayi zie yel ʋ:

⁵ «Cen tɩ yel a Ezekɩasɩ: “À ŋá n'a a Sore, a fʋ sãàkʋm-kʋra Daviir Naaŋmɩn, yere: Ɩ̃ wõ n a fʋ puoru ɛ́ nyɛ̃ a fʋ mʋta-kʋ̃ɔ. Ɩ̃ na ɩ na a fʋ nyɔ-vʋʋrʋ wõwme yome pie nɩ anũu dɔwlɩ!

⁶ Ɩ̃ na faa nɩ fʋ̃ʋ nɩ a Zerizalɛm a Asiiri tẽw nãà nuru pʋɔ, ɩ̃ɩ na gù n a tẽ-kpɛ̃ɛ ŋa.”»

²¹ Al pùorí a Ɩzayi yel: «Bɛ wa n kãkamɛ bɛ na ƴɛ́r bu a, wa pàw a wʋlʋ zie, a nãà tʋ̃ɔ́ sanɩ!»

²² Lɛ n'a a Ezekɩasɩ tɩ sowri: «Bãwfʋ buor'ʋ na ɩ ɩ̃ bãw k'ɩ̃ɩ na mɩ́ tʋ̃ɔ́ na lɛb cen a Sore ŋmɩn-yir-kpɛ̃ɛ́?»

⁷ A Ɩzayi yel ʋ: «A Sore na kʋ̀ b'ɩ bãwfʋ, k'ʋʋ ɩ fʋ bãwnɩ a k'ʋʋ na ɩ n a lɛ ʋ na yel a, ʋlɛ n'ɩ ŋa:

⁸ a ɓaarʋ siw nɩ a Akaazɩ tanɛ-dɛ́r na tɩ be a mʋ̃tɔ̃w pʋɔ a zu. A Sore na ɩ na ʋ lɛb tɩ̃wnɩ do dɛr-mimie pie.» Lɛ n'a a mʋ̃tɔ̃w tɩ lɛb wa a dɛr-mimie pie al a ɓaarʋ na tɩ pàw a zu.

A Ezekɩasɩ puoru a ʋ sanʋ pùorí

⁹ Yielu a Zuda tẽw nãà, Ezekɩasɩ, na maalɩ a ʋ bàalʋ nɩ a ʋ sanʋ pùorí a.

¹⁰ A mãa a, ɩ̃ tɩ yere na: a ɩ̃ nyɔ-vʋʋrʋ põ-zɛ̃-taa tɛwr'ʋ ɩ̃ vʋʋrɩ, ɛ́ a fɛr k'ɩ̃ɩ kul. A kpɩmɛ-tẽw n'a a fɛr k'ɩ̃ɩ be a yome na cɛ m a ƴãw.

¹¹ Ɩ̃ tɩ yere na mɩ̀: ɩ̃ kʋ̃ lɛb nyɛ̃ a Sore a nɩ-vʋʋrɩ tẽw zu ɛ, nɩ nɩsaal kãw za a tẽ-daa nɩbɛ pʋɔ ɛ.

¹² Bɛ taw na faa a ɩ̃ nyɔ-vʋʋrʋ cen nɩ zãá nɩ mɛ̃, mɛ̃ dʋ̃-cɩ̃ɩnɛ pɛn-sɛw a. A ɩ̃ nyɔ-vʋʋrʋ vili na ta a baarʋ zie, mɛ̃ pɛn-nũu a pɛn-wobre na ŋma a fomie bɛr baarɩ ɛ́ vile a. — Sore e, a zaanʋɔra kʋ̃ ta sɛr ɛ, ɛ́ a ɩ̃ yele baarɩ a fʋ zie,

¹³ ɛ́ ka nɩ a biɓaara a, a kũu na de m'a.— A Sore ŋmɛr'ɩ a ɩ̃ kɔbɛ za mɛ̃ gbẽw a. — Sore e, a zaanʋɔra kʋ̃ ta sɛr ɛ, ɛ́ a ɩ̃ yele baarɩ a fʋ zie.—

¹⁴ A ɩ̃ kon ŋmɛ̃ na taa nɩ bɛlaarɛkule kon, ɩ̃ kone na mɛ̃ ŋmam na kone a. A ɩ̃ mimie bàl a nɩ a salom úorú. — Sore e, ɩ̃ bɛ cãà laar ɛ, ɩ ɩb kãw a ɩ̃ ƴãw.—

¹⁵ Ɛcɛ bʋ̃ʋ n'ʋ ɩ̃ na yel ʋ ƴɛ̀r sɔw mɛ̃, ʋlɛ na n'ʋ ɩrɛ a? A gʋ̃ɔ zawrɩ mɛ̃ na, a pʋ-sãwna na tɛr mɛ̃ yaga za a ƴãw.

¹⁶ Sore e, fʋ tɩ bãw nɩ a ʋlɩ bom nɛ na ɩrɛ mɛ̃ a, ɛ́ ɩ ɩ̃ lɛb vʋʋrɛ. Fʋ lɛb'a kʋ̀ m fãw, fʋ bɛr mɛ̃ na ɩ̃ vʋʋrɛ.

¹⁷ A ɩ̃ pʋ-sãwna yaga lɩɛb'ɩ nʋ̃ɔ̀. Bʋ̃ʋ n'ʋ vɛ̃, fʋ nɔ̃w mɛ̃ na bɛ sàw ɩ̃ kpi ɛ, fʋ lɔb'ɩ a ɩ̃ yel-bebe za bɛr a fʋ zikurí a zãá.

¹⁸ A kpɩmɛ-tẽw a, nɩr za bɛ íre a fʋ yúor ɛ, a kũuni bɛ nɛbɛ na danɛ fʋ ɛ. A bɛlɩ dem na siwr a bɔw-zɩɛ pʋɔ a bɛ cãà tɩɛrɛ a fʋ pùor-bɛ-lɛbrʋ ɛ.

¹⁹ A nɩ-vʋʋrɩ tɛwr nɛbɛ na tʋ̃ɔ́ íre a fʋ yúor mɛ̃ a mãa a dɩ̃a a. A sãà mɩnɛ na ɩ na a bɛ bibiir bãw a fʋ pùor-bɛ-lɛbrʋ.

²⁰ Sore e, fʋ faa mɛ̃ na. Tɩ na ŋmɛ n a tɩ bʋ̃-ŋmɩɛrɩ a tɩ nyɔ-vʋʋrʋ bibi-vɩɛrɩ za, a fʋ yir pʋɔ, Sore e.