Ɩzayi 37 - A SƐB-SÕW

A Ezekɩasɩ tõ n nɩbɛ a naaŋmɩn-ƴɛ̀r-manɛ Ɩzayi zie

¹ A nãà Ezekɩasɩ na tɩ wõ a bɛ manʋ a, ʋ mɩ̀ tɩ taw nɩ a ʋ kparɩ cɩɛrɩ ɛ́ su vʋɔra kparʋ cen nɩ a Sore Ŋmɩn-yir-kpɛ̃ɛ́.

² Ʋ mɩ̀ tɩ tõ n a nãà yir nɩ-kpɛ̃ɛ Elɩakɩm, a sɛ-sɛbrɛ Sevina nɩ a bàwr-maalbɛ na kòr zuo a bɛ taabɛ a, a naaŋmɩn-ƴɛ̀r-manɛ Amɔtɩsɩ bidɛb, Ɩzayi, zie. A nɩbɛ bɛ ŋa mɩ̀ tɩ su n vʋɔrɩ kparɩ.

³ A Ezekɩasɩ ƴɛ̀rʋ ŋa n'ʋ a tɩ fɛr kɛ́ bɛ yel kʋ̀ a naaŋmɩn-ƴɛ̀r-manɛ: «“A bibir ŋa ɩ n pʋl-vʋ̃ɔ-kpɛ̃ɛ, dɔwrʋ nɩ vĩ bibir a tɩ zie. Mɛ̃ a lɛ bɛ na mɩ́ yel a, a bie ta n yib ɛ́ a mã bɛ tɛr fãw na ʋ̃ʋ́nɩ ʋ yi ɛ.

⁴ A Asiiri tẽw nãà tõ n a ʋ sojarɩ nɩ-kpɛ̃ɛ na mɩ́ be a ʋ zie a, k'ʋʋ wa tʋ a Naaŋmɩn na vʋʋrɛ a. A Sore fʋ Naaŋmɩn nãá wõ a zʋmɛ á ŋá za, ɛ́ dɔwr'ʋ a ʋ ƴɛ̀rʋ ʋ na ƴɛ̀r a ƴãw! Fʋ̃ʋ a, puori a Sore a ʋ nɩ-bʋʋrɛ na cɛ a ƴãw.”»

⁵ A nɩbɛ a nãà na tõ a tɩ cen na tɩ páw a Ɩzayi,

⁶ ʋ yel bɛ: «Nyɩ cen tɩ yel à ŋá a Sore na yere a kʋ̀ a nyɩ nɩ-kpɛ̃ɛ: “Fʋ wõ n a zʋmɛ a Asiiri tẽw nãà sojarɩ nɩ-bɛrɛ na tʋ m'a. Ta zɔrɛ dɛ̃bɩ̃ɛ a lɛ bɛ na yel a ƴãw ɛ.

⁷ A bɛ nãà na wõ n yel. Lɛ n'a ɩ̃ na ƴãw ʋ a tɩɛrʋ k'ʋʋ lɛb kul a ʋ tẽw. Be n'a ɩ̃ na tɩ ƴãw bɛ kʋ ʋ.”»

A Senakerib lɛb'a maal bɛ bɛrɛ a Zerizalɛm ɛ

⁸ A Asiiri tẽw dem sojarɩ nɩ-kpɛ̃ɛ na mɩ́ be a nãà zie a, tɩ wõ na k'aa ʋ nɩ-kpɛ̃ɛ yi n a Lakisɩ cen tɩ zɛbr'ɩ Livina. A be n'a ʋ tɩ cen tɩ páw ʋ.

⁹ Ɛcɛ a Asiiri tẽw nãà tɩ wõ na bɛ yere k'aa Eziptɩ tẽw nãà Tɩraka, na yi Etiopi a, waar'a k'ʋʋ wa zɛb'ɩ ʋ. Ʋ na tɩ wõ a yel ŋa a, ʋ tõ na kɛ́ bɛ tɩ yel à ŋá kʋ̀ a Ezekɩasɩ,

¹⁰ a Zuda tẽw nãà: «Fʋ ƴãw nɩ a fʋ tɩɛrʋ a fʋ Naaŋmɩn ƴãw, ɛ́ tɩɛrɛ k'ʋʋ kʋ̃ bɛr mɛ̃ ɩ̃ zɛb de a Zerizalɛm ɛ. Ta bɛr ʋ bɛ̀lɛ fʋ ɛ.

¹¹ Fʋ mɩŋa za wõ n a lɛ a Asiiri tẽw na-mɩnɛ na ɩ a ten za a: bɛ sãw a na bɛr pelẽpelẽ. Ɛ́ fʋ̃ʋ tɩɛrɛ kɛ́ fʋ na cɩ̃ɛ na a?

¹² A lɛn daar a na-mɩnɛ na de m niwn a, na tɩ sãw a tẽ-bɛrɛ Gozan, Haran, Eresɛfʋ nɩ a Edɛn tẽw dem tẽ-kpɛ̃ɛ, Telasaar, bɛr a, a nɩ-bʋʋrɛ bɛ ŋa ŋmɩmɛ bɛ tɩ tʋ̃ɔ́ gù a tẽ-bɛrɛ á ŋá ɩ.

¹³ Nyɩnɛ n'a a Amatɩ, a Arpadɩ, a Layiir, a Sefarwayim, a Hena nɩ a Iwa be?»

A nãà Ezekɩasɩ puoru

¹⁴ A Ezekɩasɩ tɩ de nɩ a sɛb-tʋɔla a nɩbɛ bɛ na tõ n a nuru pʋɔ kanɩ. Al pùorí ʋ do a Sore ŋmɩn-yir-kpɛ̃ɛ́, tɩ dɔl a sɛbɛ a Sore niŋé.

¹⁵ Al pùorí ʋ puori à ŋá:

¹⁶ «Sore kpɛnʋ-za-sob, Ɩsɩrayɛl Naaŋmɩn i, fʋ̃ʋ na zɩ̃ a seribɛ̃ mɩnɛ zu-sɔw a, fʋ̃ʋ n'ɩ a tẽ-daa naalʋ-ten za Naaŋmɩn-been yõ, fʋ̃ʋ n'ʋ maalɩ a salom nɩ a tẽw.

¹⁷ Sore e, ƴãw tobr bɛr wõ, yuo a mimie bɛl kaa! Wõ a zʋmɛ a Senakerib na tõ a nɩbɛ bɛ wa tʋ b'a, fʋ̃ʋ Naaŋmɩn na vʋʋrɛ a!

¹⁸ Sore e, sɩza n'a a Asiiri tẽw na-mɩnɛ sãw a nɩ-bʋʋr-yoru nɩ a bɛ ten bɛr.

¹⁹ Bɛ lɔb'ɩ a bɛ ŋmɩmɛ ƴãw vũumí. A na bɛ tɩ ɩ a Naaŋmɩn a ƴãw, ɛ́ ɩ nɩsaalbɛ nuru bʋ̃-maalɩ, dàar nɩ kʋsɛbɛ a, alɛ n'a so a Asiiri tẽw na-mɩnɛ sãw a bɛr.

²⁰ Ɛcɛ fʋ̃ʋ a, Sore tɩ Naaŋmɩn i, faa tɩ a Senakerib nuru pʋɔ. Lɛ n'a a naalʋ-ten za pʋɔ bɛ na bãw kɛ́ fʋ̃ʋ yõ n'ʋ ɩ Naaŋmɩn.»

A Ɩzayi yel'ɩ a lɛ a Sore na sɔw a

²¹ Lɛ n'a a Amɔtɩsɩ bidɛb, Ɩzayi, tɩ tõ bɛ tɩ yel a Ezekɩasɩ: «À ŋá n'a a Sore, a Ɩsɩrayɛl Naaŋmɩn, yere: Ɩ̃ wõ n a puoru fʋ na puori mɛ̃ a Asiiri tẽw nãà Senakerib ƴãw a.

²² Wone a ƴɛ̀rʋ a Sore na ƴɛ̀rɛ cáarɛ nɩ ʋ a: A Sɩyɔ̃ tẽw tobr bɛ ka fʋ ƴãw ɛ, ʋ ɩrɛ fʋ na laar. A Zerizalɛm tẽw na vɩɛl a kpɔwrɛ fʋ na, ŋmɩwrɛ nɩ ƴãwn.

²³ Ãa n'ʋ fʋ tʋ a zʋmɛ? Ãa n'ʋ fʋ ɩ la? Ãa zie n'a fʋ sʋ̃ɔmɩ sàw ƴɛ̀r ɛ́ jɩɛlɩ? Mãa n'ʋ, a mãa Ɩsɩrayɛl Naaŋmɩn na ɩ sõw a!

²⁴ Fʋ ƴãw na a fʋ nɩbɛ fʋ na tõ a, bɛ tʋ m, a mãa Sore. Fʋ yel'a: “A mãa, Senakerib a, ɩ̃ do n tan saa-zu za nɩ a ɩ̃ zɛbr-torko-yaga, do tɩ ta a Libã tãw nyʋɔrɩ́, k'ɩ̃ɩ tɩ cɛ a ʋ sɛɛdɩr tɩ-vɩɛlɩ zie, nɩ a ʋ sɩpɩrɛ tɩ-kɛrɩ zie. Ɩ̃ do na tɩ ta a ʋ nyɔ-ɓɩɩla nɩ a ʋ tuw-zũgulu.

²⁵ A mãa a, ɩ̃ tuw nɩ buli ɛ́ nyũ a kʋ̃ɔ. Ɩ̃ na nɛ nɩ gbɛ́r a Eziptɩ tẽw, ɩ a Nɩl man-gbɛ́ɛ a ko!”

²⁶ Alɛ, Senakerib i, fʋ bɛ bãwnɩ a ɩ? Mãa n'ʋ cɔbrɩ a yele á ŋá koro kãw za, daar na bɛ gbʋ́r a n'a ɩ̃ tɩɛrɩ a bɛr, ƴɛrɛŋa a, ɩ̃ maalɛ nɩ a yele á ŋá. Fʋ̃ʋ n'ʋ ɩ̃ tɩ bãwnɩ kɛ́ fʋ wa ɩ a tẽ-bɛrɛ bɛ na cɔbrɩ a kpɛmɛ a zɛbr ƴãw a, a lɩɛbɩ a deboru.

²⁷ A ten á ŋá nɩbɛ kpãkpamɛ kpi na, dɛ̃bɩ̃ɛ ɩrɛ bɛ na, vĩ nyɔw bɛ na. Bɛ ŋmɛ̃ na mɛ̃ a póru pʋɔ mʋ̃ɔ a, mɛ̃ a mɔ̃-ɓaar a, mɛ̃ a garɛ zu mʋ̃ɔ a saa-pɛrɩ́ sɛsɛb na mɩ́ ŋmɛ a ko a.

²⁸ Ɩ̃ bãw nɩ a fʋ bom za: Fʋ na ìre bɩɩ fʋ na zɩnɛ a, fʋ na yire bɩɩ fʋ na kpɩɛr a, nɩ fʋ na mɩ́ nyɛ̃ nɩ mɛ̃ suur a.

²⁹ Ɛcɛ fʋ nyɛ̃ nɩ mɛ̃ nɩ suur, ɩ̃ wõ n a fʋ nyɔka-ƴɛ̀rʋ fʋ na ƴɛ̀r a. A lɛ ƴãw n'a ɩ̃ na ƴãw fʋ bãw a nyɔbɔwrɩ́, ɛ́ ƴãw fʋ nɔ-bãw. Ɩ̃ na lɛb'a tu n fʋ a sɔ́r ʋl fʋ na tu wa a, kul'ɩ a fʋ tẽw.

³⁰ Ɛcɛ a fʋ̃ʋ, Ezekɩasɩ a, bãwfʋ ŋa n'ʋ ɩ̃ kʋ̀rɛ fʋ: a yũona a, ble-yɛrɛ n'a a nɩbɛ na dɩ. A vɩɛr a mɩ̀ cãà ɩ a lɛ. Ɛcɛ a yome ata sob a, nyɩ na tʋ̃ɔ́ na bʋ̀rɛ ɛ́ cɩɛr a nyɩ ble, kʋɔr a nyɩ divɛ̃ tɩɩr póru ɛ́ dɩrɛ a wɔmɛ.

³¹ A Zuda naalʋ-tẽw nɩbɛ bɛl na na cãà vʋʋrɛ a, na lɛb'a ɩ mɛ̃ tɩɛ na tɛ nyɩgɛ kpɛ tẽw ɛ́ a wuli tɛr wɔmɛ a.

³² Bʋ̃ʋ n'ʋ vɛ̃, nɩbɛ na cɛ a na yi n a Zerizalɛm, nɩbɛ na cɩ̃ɛ a na ìr'a àr a Sɩyɔ̃ tãw zu.» A Ɩzayi tɩ yel'a ƴãw pʋɔ: «À ŋá n'a a Sore, a kpɛnʋ-za-sob na ɩ, a ʋ nɔ̃wfʋ na tʋlɛ a zũú.

³³ Ƴɛrɛŋa a, nyɛ̃ a lɛ a Sore na yere a Asiiri tẽw nãà ƴãw a: “Ʋ kʋ̃ kpɛ a tẽ-kpɛ̃ɛ ŋa pʋɔ ɩ, ʋ bɛ tɛbr'ɩ ʋ pime ɩ, ʋ bɛ pine a ʋ zɛbr-kur-pãgalɩ ɛ́ zɛbr'ɩ ʋ ɛ, ʋ bɛ kaalɛ tanɛ gbone a ʋ dacin dob ƴãw ɛ.

³⁴ A sɔ́r ʋl ʋ na de wa a, ʋlɛ n'ʋ ʋ na lɛb de kul, ʋ bɛ kpɩɛr a tẽ-kpɛ̃ɛ ŋa pʋɔ ɩ. A mãa, Sore, mãa n'ʋ yere.

³⁵ Ɩ̃ na gù n a Zerizalɛm ɛ́ faa ʋ, ɩ̃ na ɩ Naaŋmɩn a ƴãw, nɩ a Daviir ɩ̃ na tu a ƴãw.”»

A Asiiri tẽw sojarɩ ìr'a kul, a Senakerib tɩ kpi

³⁶ A Sore malkɩ tɩ wa n a Asiiri tẽw dem laɩ pʋɔ, wa kʋ nɩbɛ tùr-kʋba dɔwlɩ tùr-lɩz'a anaar nɩ anũu (185 000). A biɓaara a, a sojarɩ tɩ ìr'a nyɛ̃ a kũuni bɛ ŋa za.

³⁷ Lɛ n'a a Asiiri tẽw nãà, Senakerib, tɩ ƴãw bɛ wɩl a pɛnɛ-sɛwr, ʋʋ lɛb kul a ʋ tẽ-kpɛ̃ɛ Nɩnɩɩvʋ, tɩ be a be.

³⁸ Bibir kãw ʋ na tɩ puore a ʋ ŋmɩn Nɩsɩrɔkɩ yir a, a ʋ bidɛbr ayi kãw, Adɩramelɛkɩ nɩ Saresɛɛr, tɩ kʋ ʋ na ɛ́ zɔ cen Araratɩ. A ʋ bidɛb ƴen sob, Asaradɔ̃, tɩ lɩɛr'ʋ na dɩ a naalʋ.