Ɩzayi 35 - A SƐB-SÕW

A Zerizalɛm tẽw lɛb-waa sɔ́r

¹ A wɛja-kpalɛ nɩ a tẽ-kõw, a cɩlɛ! A dɩlãpʋɔ, ʋ cɩlɛ ƴawr'ɩ, ɛ́ ɩ puuru ʋ za!

² A póru pʋɔ mɔ̃-puuru, a pu pàw ʋ, ʋ cɩlɛ ƴawr'ɩ, ŋmɩɛr'ɩ nʋ̃ɔ̀ cɛlsɩ! A Sore kʋ̀ ʋ nɩ a Libã tan vɩɛlʋ, a Karmɛl tãw nɩ a Saron tɩ̃tal dɛpaalʋ. Lɛ n'a bɛ na nyɛ̃ a Sore yúor-vɩɛlʋ-danʋ, a tɩ Naaŋmɩn dɛpaalʋ.

³ Nyɩ lɛb kʋ̀ fãw a kpãkpamɛ na bàl a, nyɩ ɩ a dume na màwr a a lɛb kpɛmɛ.

⁴ Nyɩ yel a bɛlɩ dem na bɛ tɛr kanyir a: «Nyɩ kpɛmɛ! Nyɩ ta zɔrɛ dɛ̃bɩ̃ɛ ɩ! Nyɩ nyɛ̃ a nyɩ Naaŋmɩn. Ʋ waar'a k'ʋʋ wa yáa a san kʋ̀ nyɩ, ɛ́ maalɩ a nyɩ dɔ̃ dem a faa bɛ na maalɩ nyɩ a, ʋ waar'ɩ a ʋl mɩŋa a nyɩ faafʋ.»

⁵ Lɛ n'a a zɔn na nyɛrɛ, ɛ́ a won wone.

⁶ A wʋbr na mɩ́ pal'a mɛ̃ wal-daa a, ɛ́ a wõ-takpalɛ cɩɩrɛ a bɛ nʋ̃ɔ̀. Kʋ̃ɔ na tɛbr'a yire a wɛja-kpalɛ pʋɔ, mamɛ na zɔrɛ nɩ a dɩlãpʋɔ pʋɔ.

⁷ A biir-tʋlʋ kpãkpã na lɩɛb'ɩ gbãtar, ɛ́ a kʋ̃ɔ-nyúur tẽw lɩɛbɩ bul-nɛ́ɛ tẽw. Bàa-kɛkɛɛ nɩ jimie na bule nɩ a be gbõgbo-cili na tɩ kpɩɛr a.

⁸ Sɔ́r na be n a be bɛ bʋɔlɛ sɔr-sõw. Dɛwr sob kãw za bɛ tuur ʋ ɛ, bʋ̃ʋ n'ʋ vɛ̃, a Sore mɩŋa n'ʋ na puo ʋ, ɛ́ a dãbole bɛ waar wa bɔrɛ gʋɔr a ʋ zu ɛ.

⁹ Nɩr bɛ tuore gbẽw a ʋ zu ɛ, wɛ-dʋ̃-faa kãw za bɛ yire a ʋ zu ɛ, nɩr bɛ nyɛrɛ ʋ ɛ. A nɩbɛ a Sore na na faa a, bɛlɛ nɛbɛ na lo a sɔ́r ŋa.

¹⁰ A bɛlɩ dem a Sore na na faa a na lɛb'a wa. Bɛ na ŋmɩɛr'ɩ nʋ̃ɔ̀ cɛlsɩ wa tarɛ nɩ a Sɩyɔ̃. Nʋ̃ɔ̀ na bɛ tɛr baarʋ a na caal'ɩ a bɛ niŋe. Cɩlʋ nɩ nʋ̃ɔ̀ na tuori bɛ na, ɛ́ pʋ-sãwna nɩ kon lɩɛb zɔ.