Ɩzayi 34 - A SƐB-SÕW

A Sore dɩrɛ nɩ nɩ a Edɔm tẽw ƴɛ̀rʋ

¹ Nɩ-bʋʋrɛ ɛ, nyɩ taw pɩɛlɩ bɛr wõ, nɩbɛ ɛ, nyɩ cɛlɛ be. A tẽw, ʋ bɛr wõ, lãwnɩ bom za na be a ʋ pʋɔ a! A tẽ-daa, ʋ wõ, lãwnɩ bom za na yire a ʋ pʋɔ a!

² A Sore nyɛ̃ nɩ nɩ a nɩ-bʋʋrɛ za suur, ʋ nyɛ nɩ nɩ bɛ za na ɓã taa a suur. Ʋ yel'a kɛ́ bɛ na kʋ bɛ na pàw pɛr, bɛ na kʋ bɛ nɩ faa faa.

³ A bɛ kũuni pàw nɩ a tẽsɔw, a bɛ ƴã-gamɛ nyùur'a, a bɛ zɩ̃ɩ gbɔlɛ nɩ a tan zu.

⁴ A ŋmar-bi-yaga yaga ŋmarɛ na lore a za. A salom pìle na mɛ̃ sɛbɛ a. A salom zu bʋ̃-nyɩwrɩ za lore na mɛ̃ divɛ̃ tɩɛ bɩɩ kãkã-tɩɛ va-ŋmamɛ a.

⁵ A Sore zɛbr-sɔ-kpɛ̃ɛ ɩ n zɩ̃ɩ a salom zu. Ʋlɛ n'ɩ ŋan siwr a Edɔm tẽw dem zu, nɩbɛ ʋ na yel kɛ́ bɛ kʋ pàw pɛr a.

⁶ A Sore zɛbr-sɔ-kpɛ̃ɛ ɩ n zɩ̃ɩ tɛwr, kãá n'a pàw ʋ: mɛ̃ pʋ́rɩ nɩ bʋrɩ zɩ̃ɩ a, mɛ̃ alãbie kãá a. A Bɔsɩra na ɩ a tẽ-kpɛ̃ɛ a pʋɔ a, a Sore maalɛ nɩ bàwr. Kʋb na ɩ kʋb a n'a gã a Edɔm tẽw pʋɔ.

⁷ A wɛ-nĩi, a nadɛɛ nɩ a nĩi lãw na lore kpiir. A tẽw ɩ n zɩ̃ɩ tɛwr, kãá pàw nɩ a tẽsɔw za.

⁸ Bʋ̃ʋ n'ʋ vɛ̃, a Sore zie a, a san yaafʋ bibir'ʋ, a yũon ʋl a Sɩyɔ̃ gùre na sowre a samɛ a n'ʋ.

⁹ A Edɔm tẽw fʋɔlɩ na lɩɛb'ɩ fʋɔlɩ gudurɔ̃ na zɔrɛ a, a ʋ tẽsɔw na lɩɛb'ɩ tã-tʋlʋ-kpãkpã. A tẽw ŋa na lɩɛb'ɩ gudurɔ̃ na nyɔw vũu dɩrɛ

¹⁰ bɛ kpiire tɩ̃ɩsɔw nɩ mʋ̃tɔ̃w a. Zʋ̀ʋ́r na ìre nɩ a be dúor kʋralɛ. A tẽw na lɩɛb'ɩ wɛja-kpalɛ kʋralɛ, nɩr za kʋ̃ cãà tuur tɔlɛ a be ɩ.

¹¹ Ʋ na ɩ n a vìí nɩ a zɔ̃po zie, vìí-kpãakpul nɩ gbagba na kpɩɛr'ɩ a be. A Sore na sãw nɩ a tẽw bɛr. A na ɩ na mɛ̃ a vo-kpɛ̃ɛ-zawla na tɩ be be ɛ́ a tẽ-daa bɛ ír sɛr a.

¹² Nɩ-yée kʋ̃ cãà be mɩ́ kaa ír nãà ɩ, a nɩ-bɛrɛ za na baar'a.

¹³ Gɔ-tuwr na bul'ɩ a yir-vɩɛlɩ vɩɛlɩ pʋɔ, kàrnyã nɩ gʋʋr na bul'a pàw a zɛbr-yir-kpɛn. A na ɩ n gbõgbo-cili sɔwlʋ zie, kʋlãdisowli dɛnʋ zie.

¹⁴ A nyãanyũ-gaarɩ na mɩ́ tuor'ɩ a jɩbʋrɩ a be, a na mɩ́ ɩ n a bʋrali tuor-taa zie. Be n'a a tɩ̃ɩsɔw kɔ̃tɔ̃-faa, Lilitɩ, na mɩ́ be pɩ̃ɛnɛ.

¹⁵ Be cãà n'a a waab na mɩ́ maalɩ a ʋ kpów mɩ́ lɔb a ʋ jɛlɛ ũú nɩ ɛ́ gù a bili tɩ wɛ́w. Be n'a a sidume na mɩ́ ɓã taa.

¹⁶ Nyɩmɛ wa bɔ a Sore sɛbɛ pʋɔ a, nyɩ na kanɩ nɩ ƴɛ̀r-bie á ŋá: A dʋn á ŋá kãw za bɛ cɛ ɩ, a kãw za bɛ cɛ bɛ ka be ɩ. Bʋ̃ʋ n'ʋ vɛ̃, a Sore n'ʋ ƴãwnɛ a nɛ́ɛ kʋ̀rɛ a, a ʋ Vʋʋrʋ n'ʋ ɓanɛ a taa.

¹⁷ Ʋ lɔb'ɩ a bie, mɩ́ ír ŋa dem kʋ̀ ʋ, ʋ de nɩ a ʋ miw-máná põ nɩ a tẽw kʋ̀ a. A na so ʋ nɩ kʋralɛ, a na kpɩɛr ʋ nɩ yome yome za.