Ɩzayi 30 - A SƐB-SÕW

A sõwfʋ bɔb a Eziptɩ tẽw ɩ n bɛ̀lʋ

¹ A Sore yere na: Nyɛ̃ baw-bio na páw nyɩ a, nyɩɩm bibi-gaarɩ i! Nyɩ cɔbrɛ nɩ ɩb na bɛ yi a ɩ̃ zie a, kɛ́ nyɩ ɩ. Nyɩ maalɛ nɩ wõ-taar mãa na bɛ n'ʋ ƴãw nyɩ a tɩɛrʋ a. À ŋá n'a nyɩ mɩ́ maalɩ yel-bier dɔwlɩ yel-bier zu.

² Nyɩ cere nɩ a Eziptɩ tẽw ɛ́ bɛ sowri mɛ̃ kaa ɩ. Faarawɔ̃ naayir'a nyɩ zɔrɛ kpɩɛr, a ʋ tẽw ɓaarʋ́ n'a nyɩ bɔbr sɔwlʋ zie!

³ Ɛcɛ, a Faarawɔ̃ naayir zɔ-kpɛb na ɩ nyɩ nɩ vĩ. A sɔwlʋ zie nyɩ na bɔbr a Eziptɩ tẽw a na ɩ n a nyɩ tɩɛrʋ wɛb.

⁴ A nyɩ nɩ-bɛrɛ ta n a Tanisɩ baarɩ, a nyɩ nɩbɛ nyɩ na tõ a be n a Hanɛsɩ.

⁵ Nɩ-bʋʋrɛ na kʋ̃ tʋ̃ɔ́ ɩ bom za a bɛ ƴãw a na ɩ na a bɛ tɩɛrʋ wɛ. A Eziptɩ tẽw dem kʋ̃ tɛr sõwfʋ kãw za a bɛ zie ɩ, bɛ kʋ̃ tɛr yel-ɩra kãw za a bɛ zie ɩ. Bɛ na nɩ̃ɛ na ɩ a bɛ vĩ nɩ yo-sãw.

A bɛlɩ dem na dàar a Eziptɩ tẽw sõwfʋ a

⁶ Dʋn na tuo tuor a tɔlɛ nɩ a Negɛɛvʋ wɛja-kpalɛ pʋɔ. Kpɩɛrʋ zie na ɩrɛ dɛ̃bɩ̃ɛ nɩ pʋl-vʋ̃ɔ a n'ʋ, wɛ-narʋ, bʋ̃-daar nɩ bʋ̃-pɔwbɛ, dɔpamɛ nɩ wa-bɩɩr na ƴawr a kpɛb zie n'a. Nɩbɛ tuo nɩ a bɛ na-bome nɩ a bɛ na-bʋ̃-tuor bòn zu nɩ nyɔ̃wmɩ zɩgɛ zu. Nɩ-bʋʋrɛ kãw, na kʋ̃ tɛr yel-ɩra kãw za a bɛ zie a, so a.

⁷ A Eziptɩ tẽw sõwfʋ a, sɛsɛb'ʋ, ʋ bɛ tɛr pɛr ɛ. Alɛ so ɩ̃ pór a tẽw ŋa kɛ́ «Arahab na bɛ damnɛ a.»

Yel bɛ na na bãw gùre nɩ a nɩdaar a

⁸ A Sore tɩ yel'ɩ a Ɩzayi: «Ƴɛrɛŋa a, sɛb a yele á ŋá ƴãw dà-pawle zu a Zerizalɛm tẽw dem niŋé. Mɩ̀ sɛb a ƴãw sɛbɛ pʋɔ. A na ɩ n dãsɩɛ bom a nɩdaar ƴãw.»

⁹ Nɩ-bʋʋrɛ na gaarɩ a nɛbɛ, bibiir na ŋmarɛ ziri a, nɩbɛ na bɛ sàwr bɛrɛ wone a Sore wulu a.

¹⁰ Bɛ yere nɩ a naaŋmɩn-ƴɛ̀r-manbɛ zie: «Nyɩ taa nyɛrɛ bʋ̃-nyɛrɩ ɛ! Nyɩ taa yere bom na ɩ sɩza a kʋ̀rɛ tɩ ɛ! Nyɩ manɛ yele na nʋmɛ a kʋ̀rɛ tɩ. Nyɩ yere yele na nʋmɛ ɛ́ bɛ ɩ sɩza a kʋ̀rɛ tɩ.

¹¹ Nyɩ bɛr a sɔr-vla, nyɩ zãá nɩ a soli-vla. Nyɩ ta cãà ƴɛ̀rɛ a Ɩsɩrayɛl Naaŋmɩn na ɩ sõw a ƴɛ̀rʋ a tɩ zie ɩ!»

Loba na bɛ tɛr à ŋá a

¹² Alɛ so a Ɩsɩrayɛl Naaŋmɩn na ɩ sõw a yere: «Nyɩ zawrɛ nɩ a ɩ̃ ƴɛ̀rʋ bɛrɛ, nyɩ ƴãwnɛ nɩ a nyɩ tɩɛrʋ a bɛlɩ dem na bɛ̀lɛ nyɩ ɛ́ ŋmarɛ ziri a ƴãw, ɛ́ dier bɛ bɛ ɩ a nyɩ tɩ̀ɛrbɛ.

¹³ A na ɩ à ŋá a, a yel-bier ŋa na ɩ n a nyɩ zie mɛ̃ wɛra na be dacĩ-kpɛ̃ɛ na kɛrɩ a ƴãw a. Kpáwr wa sãá nɩ a dacin ƴãw, ɛ́ bɛ wa bere ʋ lo.

¹⁴ A dacin na ŋmɛr'a yaarɩ pʋrpʋr, mɛ̃ yawr-mɩɛrɛ dʋw a. A bɛ lɛb tɛr ɩb za ɩ, bɛ kʋ̃ tʋ̃ɔ́ nyɛ̃ sele a bʋ̃-ŋmɛrsɩ pʋɔ mʋ̃ɔ nɩ vũu dam pʋɔ bɩɩ 'wɔ̃w nɩ kʋ̃ɔ tã-bɔw pʋɔ ɩ.»

Nyɩ ɓãa nyɩ mɩŋa ɛ́ ƴãw a nyɩ tɩɛrʋ a ɩ̃ ƴãw

¹⁵ À ŋá n'a a Sore Naaŋmɩn, a Ɩsɩrayɛl Naaŋmɩn na ɩ sõw a yere: Nyɩ na na lɛb wa a ɩ̃ zie a, nɩ nyɩ na na ɓãa nyɩ mɩŋa a, lɛ tɛwr'a nyɩ na nyɛ̃ a faafʋ. A nyɩ fãw tɛwr'ɩ nyɩ na na zɩ̃ zoom ɛ́ ƴãw a nyɩ tɩɛrʋ a ɩ̃ ƴãw a. Ɛcɛ nyɩ bɛ sàwr ɛ.

¹⁶ Nyɩ yere na: «Aɩ, tɩ na zɔm'ɩ wie zɔ n.» Ãà, nyɩ na zɔ na. Nyɩ mɩ̀ cãà na yere: «A tɩ wie na gárɛ nɩ fɔ̃w fɔ̃w.» Ãà, a bɛlɩ dem na diwr nyɩ a na zɔrɛ nɩ fɔ̃w zuo lɛ!

¹⁷ Dɔ̃ sob been yõ na fuw nɩ a nyɩ nɩbɛ túr. Dɔ̃ dem anũu na fuw nyɩ na, nyɩ zɔ nyɩ za ɛ́ tɩ cɛ ɩ mɛ̃ bãwfʋ na be tã-kpɛ̃ɛ nyʋɔrɩ́ a, mɛ̃ dɩrapo na bà tãle zu a.

A Sore na wul'ɩ a ʋ nɩ-bʋʋrɛ a ʋ nɔ̃wfʋ

¹⁸ Ɛcɛ a Sore gùre nɩ a daar ʋ na na wul nyɩ a ʋ nɔ̃wfʋ a, ʋ na ìr'a wul nyɩ a ʋ nɩbaal-zɔba. Bʋ̃ʋ n'ʋ vɛ̃, a Sore ɩ n Naaŋmɩn na tuur mɩnʋ a. Zu-nʋ̃ɔ̀ dem'ɩ a bɛlɩ dem za na ƴãw a bɛ tɩɛrʋ a ʋ ƴãw a.

¹⁹ Nyɩɩm, Sɩyɔ̃ tẽw nɩbɛ ɛ, nyɩɩm na kpɩɛr a Zerizalɛm a, nyɩ kʋ̃ lɛb kõ ɩ. Nyɩmɛ wa kone cɔwr a Sore a, ʋ na wul nyɩ nɩ a ʋ nɔ̃wfʋ. Ʋlɛ wa dɛ wõ a nyɩ kon a, ʋ na sɔw nyɩ na.

²⁰ Nyɩmɛ wa be a kpɩɛrʋ pʋɔ a, a Sore na kʋ̀ nyɩ nɩ a bʋ̃-dɩrɩ. Nyɩmɛ wa nyɛrɛ dɔwrʋ a, ʋ na kʋ̀ nyɩ nɩ kʋ̃ɔ nyɩ nyũ. A sob nɛ na wule nyɩ a kʋ̃ lɛb sɔwlɩ ɛ, ɛ́ nyɩ na nyɛ̃ ʋ na nɩ a nyɩ mimie.

²¹ Alɛ wa fɛr kɛ́ nyɩ tu dʋrʋ bɩɩ gʋba a, nyɩ na wõ n ƴɛ̀r-bie á ŋá a nyɩ zikurí: «Nyɩ nyɛ̃ a sɔ́r a na fɛr kɛ́ nyɩ de a.»

²² A nyɩ dàar bɩɩ kure tɩbɛ bɛ na nyɩl salm-pla nɩ salm-zɩɛ pàw a, nyɩ na nyɛ̃ a na a ɩ dɛwr. Nyɩ na lɔb a na bɛr mɛ̃ bʋ̃-dɛgɛ a, ɛ́ nyɩ na yel a na: «Nyɩ yi a ka!»

²³ A Sore na kʋ̀ nyɩ nɩ a saa a bʋ̃-bʋʋrɛ nyɩ na bʋ̀r a ƴãw. A bʋ̃-dɩrɩ a tẽsɔw na na kʋ̀ nyɩ a na ʋr'a ɛ́ nʋmɛ nʋmɛ. A ʋlɩ bibir nɛ a, a dʋn na 'wɔbr'ɩ mʋ̃ɔ mʋ̃ɔ 'wɔbrʋ ziir na yɛlmɛ yɛlmɛ a pʋɔ.

²⁴ A nĩi nɩ a bòn na kʋɔr a tẽsɔw a na 'wɔbr'ɩ mʋ̃ɔ bɛ na mɩɩl'ɩ nyaarʋ ɛ́ dɩ̀ɛl'ɩ pɛl nɩ tɩr-jajaa bɛ na su ƴãw dà-wogo ƴãw a.

²⁵ A ʋlɩ bibir bɛ nãà wa kʋ a nɩbɛ za a, a zɛbr yir-cõcowli wa lo a lɛn daar a, bàrʋ kʋ̃ɔ na zɔrɛ nɩ a tã-bɛrɛ nɩ a tãli zu.

²⁶ A ʋlɩ bibir a Sore nãà wa 'lẽ a ʋ nɩ-bʋʋrɛ natɩɛ, ɛ́ sanɩ a bàalʋ bɛ na ŋmɛ bɛ ƴãw a, a cuw cãà na ɩ na mɛ̃ a mʋ̃tɔ̃w cãà a, ɛ́ a mʋ̃tɔ̃w cãà caalɩ gb'a ayopõi dɔwlɩ.

A Sore waar'a k'ʋʋ wa kpãà a Asiiri tẽw dem

²⁷ A Sore n'ɩ ŋan yi zi-zãána waar. A suur dɩrɛ ʋ na, suur na ta suur a. A ʋ nɔgbãbie wule nɩ a suur ʋ na nyɛ̃ a, a ʋ ƴɛ̀rʋ ɩ n vũu na dɩrɛ a,

²⁸ a ʋ nʋɔr pɩɛlʋ ɩ n fʋɔla kʋ̃ɔ na tuore bom za tɔlɛ nɩ a. Ʋ waar'a k'ʋʋ wa tɛwtɛw a nɩ-bʋʋr-yoru a kpɩɛrʋ zɛla pʋɔ, ɛ́ ƴãw nɔ-bãw a bɛ nɩbɛ kokamɩ́, tɛr bɛ cen nɩ a be bɛ na bɛ bɔbr a.

²⁹ A nyɩɩm Zerizalɛm tẽw dem a, nyɩ na yiele na mɛ̃ a tɩ̃ɩsɔw bɛ na maalɛ cuw a. A nyɩ socie na cɩlɛ na, mɛ̃ a lɛ bɛ na mɩ́ pɛblɛ wele fʋ cere a Sore tãw zu a, fʋ cere a Naaŋmɩn na ɩ a Ɩsɩrayɛl Pìir a zie a.

³⁰ A Sore na ɩ na bɛ wõ a ʋ kɔkɔ-kpɛ̃w, ɛ́ bɛ na nyɛ̃ nɩ a ʋ kpãkpãw na siwr a ŋmɛb ƴãw a. Ʋ na wul'ɩ a ʋ suur na bɛ dɩ̃ɛnɛ a, vũu-zɛlɛ na dɩrɛ a pʋɔ, lãwnɩ saa na waar'ɩ sɛsɛb nɩ sa-bi-kube saa a.

³¹ A Asiiri tẽw wa wõ a Sore kɔkɔr ɛ́ nyɛ̃ a dabɔl ŋmɩɛrʋ na siwr a ʋ zu a, dɛ̃bɩ̃ɛ na ɩrɛ ʋ na ʋ màwr.

³² A Sore dabɔl mɩ́ wa siw a ʋ zu a, a gãgali nɩ a korijome na mɩ́ ŋmɛ na ƴãw. A Sore na vɛlɩ nɩ nũu cɔw a Asiiri tẽw ɛ́ zɛb'ɩ ʋ.

³³ Bɛ cɔbr'ɩ vũu bɛr koro za. A nãà ƴãw mɩ̀ n'a. Bɔw na yɛlmɛ ɛ́ zulme a pɛrɩ́ n'a bɛ ƴãw dàar yaga viiri koli a vũu ƴãw. A Sore nʋɔr pɩɛlʋ na ɩ mɛ̃ cirbi vũu-kpɛ̃ɛ a na ƴãw nɩ a vũu.