Ɩzayi 3 - A SƐB-SÕW

Bʋnɩ-ɩb'a, a Zuda naalʋ-tẽw pʋɔ

¹ A Sore Naaŋmɩn, a kpɛnʋ-za-sob, na ír'ɩ a bʋ̃-dɩrɩ nɩ kʋ̃ɔ sõwfʋ za a Zerizalɛm nɩ a Zuda ten pʋɔ. Ʋ na ír'ɩ a alɩ bome nɛ za na tɩ̀ɛrɛ a a:

² soja-gãdaar nɩ zɛbr-nɩ-zawlɛ, ƴɛ̀r-dɩrbɛ, naaŋmɩn-ƴɛ̀r-manbɛ, bàwr-bʋwrbɛ nɩ nɩ-kore,

³ sojarɩ nɩ-bɛrɛ nɩ nɩ-yée, yã-wulbɛ, tɩtɩlbɛ nɩ sɔbr.

⁴ A Sore yere na: “Dɛbli-nyɔfɛrɛ nɛbɛ ɩ̃ na kʋ̀ bɛ bɛ ɩ a bɛ nɩ-bɛrɛ, dɩrɛ naalʋ a bɛ zu mɛ̃ a lɛ a na ɓãanɛ bɛ a.”

⁵ A nɩbɛ na ɩrɛ nɩ taa po-to-fãw-ɩb, ŋa za a ʋ tɔ sob zie: a pɔlbili na dɔwrɛ nɩ a dɛb-nyamɛ, a nɩ-bɛ-tɛr-bir mɩnɛ dɔwrɛ a nɩ-sɩza mɩnɛ.

⁶ Nɩr na mɩ́ nyɔw nɩ a ʋ yɛb, a ʋ sãà yir pʋɔ ɛ́ yel ʋ: “Fʋ cãà na tɛr kpar-kpɛ̃ɛ, a lɛ pʋɔ a, ɩ a tɩ nɩ-kpɛ̃ɛ ɛ́ kaa a yel-nyãbʋnɔ á ŋá zie.”

⁷ Ɛcɛ à ŋà sob na sɔw nɩ a ʋlɩ bibir nɛ: “Ɩ̃ kʋ̃ tʋ̃ɔ́ ɩ bom za a nyɩ ƴãw ɛ. Bʋ̃-dɩra nɩ kpar-kpɛ̃ɛ bɛ be ɩ̃ yir ɛ. Nyɩ kʋ̃ tʋ̃ɔ́ ɩ ɩ̃ ɩ nɩ-kpɛ̃ɛ ɩ.”

⁸ Zerizalɛm kaw na lo, Zuda naalʋ-tẽw gã nɩ tẽw. A bɛ ƴɛ̀rʋ nɩ a bɛ ɩ-ɩrɩ a Sore zie ɩ n gaarʋ tɛwr a ʋ yúor-vɩɛlʋ-danʋ niŋé.

⁹ A bɛ niŋe ŋmɛ̃a dɩ n a dãsɩɛ nyɔw bɛ. Mɛ̃ a Sodɔm tẽw dem a, bɛ bɛ sɔwlɛ a yel-bebe ɩ, bɛ ƴɛ̀rɛ nɩ a ƴɛ̀rʋ a nɩbɛ za niŋé. Nyɛ̃ baw-bio a, bɛ cɔbrɛ nɩ a bɛl mɩŋa kpɩɛrʋ!

¹⁰ Nyɩ na tʋ̃ɔ́ na yel: a nɩ-mɩŋa tɛr'ɩ zu-nʋ̃ɔ̀, bʋ̃ʋ n'ʋ vɛ̃, ʋ na nyɛ̃ nɩ a ʋ ɩ-ɩrɩ maalʋ.

¹¹ Ɛcɛ a nɩ-faa ƴãw a, nyɛ̃ baw-bio a! Bʋ̃ʋ n'ʋ vɛ̃, bɛ na ɩ ʋ na tu n a ʋ ɩ-ɩrɩ.

¹² A Sore yere na: “Ɩ̃ nɩ-bʋʋrɛ ɛ, a bɛlɩ dem na dɔwrɛ nyɩ a, bibili nɛbɛ, ɛ́ pɔwbɛ nɛbɛ dɩrɛ a naalʋ a nyɩ zu. Ɩ̃ nɩ-bʋʋrɛ ɛ, a bɛlɩ dem na tɛr nyɩ cere nɩ a, tule nyɩ na, bɛ tuli nɩ a nyɩ sɔ́r.”

A Sore dɩrɛ nɩ nɩ a ʋ nɩ-bʋʋrɛ nɩ-bɛrɛ ƴɛ̀rʋ

¹³ A Sore ìr'ɩ a ƴɛ̀rʋ-dɩb ƴãw, ʋ ìr'a àr k'ʋʋ dɩ n a nɩ-bʋʋrɛ a ƴɛ̀rʋ.

¹⁴ Ʋ dɩrɛ nɩ nɩ a nɩ-kore nɩ a ʋ nɩ-bʋʋrɛ nɩ-bɛrɛ a ƴɛ̀rʋ à ŋá: “Nyɩmɛ nɛbɛ sãw a ɩ̃ divɛ̃ tɩɩr púo bɛr, ɛ́ paalɩ a nyɩ yie nɩ a nan dem bome nyɩ na zu a.

¹⁵ Ãa n'ʋ kʋ̀ nyɩ a sɔ́r nyɩ kʋrɛ a ɩ̃ nɩ-bʋʋrɛ gúur, ɛ́ ɩrɛ po-to-fãw-ɩb a nan dem zie?” A Sore Naaŋmɩn, a kpɛnʋ-za-sob'ʋ sowre.

A Zerizalɛm pɔwbɛ na dɩrɛ dɛpaalʋ a

¹⁶ A Sore yere na: “A Sɩyɔ̃ tẽw pɔwbɛ ɩrɛ nɩ pɔ̀lʋ. Bɛ mɩ́ vʋ̃ɔ nɩ a nyũu kɛ́ cen, ɛ́ mɩ́ 'law a mimir! Bɛ mɩ́ cere nɩ bɛ̀lbɛ̀l, ɛ́ ɩrɛ a gbɛ-buule a kone.

¹⁷ Alɛ so a Sore na ɩ a bɛ zuru a kpal, ɛ́ ɩ a bɛ gbẽri a sãá.

¹⁸ A ʋlɩ bibir'a, a Sore na ír'ɩ a bɛ pɩ̃ɛmɛ bɛr: a gbɛ-buule, a kɔkɔrɩ-bamɛ, a pɩ̃ɛmɛ na ɩ mɛ̃ cuw-cɩ̃ɔ a,

¹⁹ a tokpamɛ, a nuru-bamɛ, a niwn-pɛn-pawrɩ,

²⁰ a zu-pɛn-vili, a bãzɔlɩ, a kpawr-wobri, a sawbie nɩ a kɔ̃tɔ̃-bʋ̃-ƴãwnɩ,

²¹ a nũ-tʋɛ nɩ a nyɔ-bamɛ,

²² a cuw kparɩ, a kɔkɔrɩ-pɛnɛ, a bawŋmamɛ zu pɛnɛ, a nuru kɔ̀ɛ,

²³ a càalɩ́, a lɛ̃ pɛn kparɩ, a zu-jɩ̀ɩr, a zu nɩ a bawŋmamɛ zu pɛn-vʋlvʋl.

²⁴ Pʋɔrʋ nyũu na lɩɛr'ɩ a parfɛ̃ nyũu, miwr na lɩɛr'ɩ a kpàwr. Zu bɛ na fɔr'a na lɩɛr'ɩ a zu bɛ na pàl tɩ ƴãw kpɛ̃kpɛrsɩ a. Vʋɔra pɛn gãw na lɩɛr'ɩ a dɛpaal bʋ̃-suuri. Ƴã-ganɩ́ bãwfʋ na ɩrɛ vĩ a na lɩɛr'ɩ a vɩɛlʋ bãwfʋ.

A Zerizalɛm pɔw-kɔbɛ

²⁵ Zerizalɛm i, a zɛbr-sɔ-kpɛ̃ɛ na kʋ n a fʋ dɛbr, a fʋ sojarɩ na kpi n a zɛbr zie.

²⁶ Lɛ n'a a tẽ-kpɛ̃ɛ na kone ʋ za ɛ́ be wahala pʋɔ, mɛ̃ pɔw na bɛ cãà tɛr bom za ɛ́ zɩ̃ tẽsɔw a.