Ɩzayi 28 - A SƐB-SÕW

A faa na na páw a Samaari tẽw a

¹ Baw-bio wɛ Samaari tẽw i! A Efarayim tẽw dã-kuolbɛ nyʋʋr'ɩ nɩ a tẽ-kpɛ̃ɛ ŋa na ɩ mɛ̃ nãà-kpawʋɔ a. Ʋ ƴãw nɩ pɩ̃ɛmɛ vla vla za àr'ɩ a tãw zu, a tãw na jɩ́rɛ a fʋɔla na pʋ̃ɔ ʋ za a. Ɛcɛ ʋ ŋmɛ̃ na mɛ̃ tɩ-puuru na vàr vàr nɩbɛ a divɛ̃ na tʋ̃ɔ́ a zurú a.

² A Sore nɩr kãw n'ɩ ŋan na kpɛmɛ ɛ́ tʋ̃ɔ́ bom za a. Ʋ ŋmɛ̃ na taa nɩ sa-bi-kube saa, ʋ ŋmɛ̃ na taa nɩ saa nɩ sɛsɛb na sãwnɛ bom za a, ʋ ŋmɛ̃ na taa nɩ saa na waar gbʋrʋgbʋrʋ a kʋ̃ɔnɩ paalɩ pàw bom za a. Ʋ na gaal'ɩ bom za tẽw nɩ fãw.

³ A tẽ-kpɛ̃ɛ na ɩ mɛ̃ nãà-kpawʋɔ a, a Efarayim tẽw dã-kuolbɛ nyʋ̀ʋ́r bom a, bɛ na nɛb'ɩ ʋ nɩ gbɛ́ɛ.

⁴ A tɩ-puur-varsɩ ʋ na pɩ̃ɛ nɩ ʋ tʋɔra vla za a tãw na jɩ́rɛ a fʋɔla na pʋ̃ɔ ʋ za a zu a, bɛ na ƴɛ́r a na ŋmɛr. A Samaari tẽw ɩ na mɛ̃ kãkãw wɔ̃-dãw na mʋ̃ɔ ɛ́ a daar bɛ ta sɛr a. Nɩr wa nyɛrɛ ʋ wa báarɛ a, ʋ pɔr ʋ na, ɛ́ daadaalɛ ʋ vɔl.

⁵ A ʋlɩ bibir nɛ a, a Sore, a kpɛnʋ-za-sob, na ɩ n a ʋ nɩ-bʋʋrɛ na cɛ a nãà-kpawɔ-yúor nɩ kɔkɔrɩ́ bãzɔl-vla vla.

⁶ Ʋlɛ n'ʋ na ƴãw a mɩnʋ yã a bɛlɩ dem na zɩ̃ a ƴɛ̀rʋ-dɩb ƴãw a, ɛ́ kʋ̀ a fãw a bɛlɩ dem na canɛ a dɔ̃ dem bɛrɛ a tẽ-kpɛ̃ɛ dɩ̃dɔr ƴãw a.

A dã-kuolbɛ na ɩrɛ a naaŋmɩn-ƴɛ̀r-manɛ laar a

⁷ A bàwr-maalbɛ nɩ a naaŋmɩn-ƴɛ̀r-manbɛ mɩ̀ a, a divɛ̃ ɩ na bɛ bɛ cãà bãw yã ɩ, a dã-kpɛn ɩ na bɛ dẽdere. A dã-kpɛn ɩ na bɛ bɛ cãà bãw yã ɩ, a divɛ̃ ɩ na bɛ bɛ cãà bãw bɛ tʋɔra zie ɩ. A dã-kpɛn ɩ na bɛ dẽdere, ɛ́ a bɛ bʋ̃-nyɛrɩ pʋɔ bɛ bʋ̀nɛ ƴɛ̀rɛ. A lɛ bɛ na mɩ́ dɩ a ƴɛ̀rʋ yel a bɛ mɩ́ nyɛrɛ ɩ.

⁸ A bɛ tiiru paal'ɩ a tabalɛ za, a ziir za dɛw na!

⁹ Bɛ yere na: «Ãa n'ʋ a Ɩzayi ŋa bɔbr k'ʋʋ wul? Ãa n'ʋ ʋ bɔbr k'ʋʋ manɩ a ʋ bʋ̃-nyɛrɩ kʋ̀? Bibiir bɛ na kpɩr bɛr paalʋ a nɛbɛ bɩɩ? Bibiir na bɛr a bɩr paalʋ a nɛbɛ bɩɩ?

¹⁰ Ʋ suole na: “B-a-ba-ba, b-o-bo-bo, g-a-ga-ga, g-o-go-go!”»

¹¹ Ʋ̃ʋ, à à ŋá n'a, nɩ-bʋlmɛ ƴɛ̀rʋ nɩ ƴɛ̀r-sãan n'ʋ a Sore na ƴɛ̀r a nɩ-bʋʋrɛ bɛ ŋa zie.

¹² Ɛcɛ ʋ nɩ̃ɛ na tɩ yel bɛ à ŋá: «A ka a, nyɩ na nyɛ̃ nɩ pɩ̃ɛnʋ. Nyɩ bɛr a sob nɛ na bàl a ʋ pɩ̃ɛnɩ. Zie na ɩ zoom a n'ɩ a zie ŋa.» Ɛcɛ bɛ bɛ sàw bɛr wõ ɩ.

¹³ Alɛ so a Sore ƴɛ̀rʋ a bɛ zie mɩ̀ na ɩ: “B-a-ba-ba, b-o-bo-bo, g-a-ga-ga, g-o-go-go.” Lɛ n'a bɛ na mɩ́ cere tɩ 'law lo, wɛl sɩɩr. Bɛ na kpɛ n bɛrɩ pʋɔ bɛ nyɔw bɛ.

A yir pɛr kʋsɩɛr

¹⁴ Nyɩ bɛrɛ wone a Sore ƴɛ̀rʋ, nyɩɩm nɩ-ɩ-laarbɛ na kaarɛ a Zerizalɛm nɩbɛ bɛ ŋa zie a:

¹⁵ «Nyɩ yere na: Tɩmɛ nɩ a kũu maal'ɩ wõ-taa, tɩmɛ nɩ a kpɩmɛ tẽw lãw nɩ nʋɔr. A bʋ̃-faa wa waar a, ʋ bɛ páwr tɩ ɛ. Bʋ̃ʋ n'ʋ vɛ̃, a ziri n'ɩ a tɩ pib zie, a libelibe n'ɩ a tɩ sɔwlʋ zie.»

¹⁶ Ɛcɛ à ŋá n'a a Sore Naaŋmɩn yere: Ɩ̃ ƴãwnɛ nɩ yir pɛr kʋsɩɛr na kpɛmɛ kpɛmɛ a, a Sɩyɔ̃ tẽw pʋɔ, dacĩ-goraa kʋsɩɛr na vɩɛl vɩɛl a, kʋsɩɛr na be be a yir pɛr binu ƴãw a. Sob nɛ na tɩɛ a kʋsɩɛr ŋa ƴãw a bɛ lore ɩ.

¹⁷ Ɩ̃ na de nɩ a lɛ-na-tu-sɔr-a ʋ ɩ a miw-máná, ɛ́ de a mɩnʋ ʋ ɩ a kur-mɔrmɔr miwr. Ɛcɛ a sa-bi-kube na sãw nɩ a nyɩ pib zie na ɩ bɛlʋ a bɛr, a kʋ̃ɔnɩ na tuo nɩ a nyɩ sɔwlʋ zie.

¹⁸ Nyɩmɛ nɩ a kũu wõ-taa na sãw na, nyɩmɛ nɩ a kpɩmɛ tẽw nɔ-lãw kʋ̃ nyɔw ɛ. A bʋ̃-faa wa wa a, ʋ na tʋ̃ɔ́ nyɩ nɩ pelẽpelẽ.

¹⁹ Lɛn daar za ʋ na na mɩ́ tɔl a, ʋ na mɩ́ nyɔw nyɩ na. Bʋ̃ʋ n'ʋ vɛ̃, ʋ na mɩ́ tɔl'ɩ a biɓaarɛ za, a mʋ̃tɔ̃w nɩ a tɩ̃ɩsɔw, ɛ́ a na mɩ́ ɩ n pʋl-vʋ̃ɔ tɛwr fʋ̃ʋ wa bãw a yel fʋ na wõ a pɛr a.

²⁰ Mɛ̃ a lɛ a zʋkpar na yel a, a gado na ɩ n ŋmãa zuo a gaa ƴãw, a gãw kʋ̃ yɛlmɛ a sɛw a pilu ƴãw ɛ.

²¹ A Sore na ìr'a mɛ̃ a Perasim tãw zu a. Ʋ na nyɛ̃ nɩ suur màwr mɛ̃ a Gabaɔ̃ fʋɔla pʋɔ a, a ʋ ton tob daar, tõ-bɩɛ, a ʋ ɩb ɩb daar, ɩb-sãan.

²² Ƴɛrɛŋa a, nyɩ bɛr a ɩ-lab lɛ. Alɛ bɛ ɩ lɛ, a míe na 'lẽ nyɩ a na lɛb'a bãw taw fɩɩrɩ. Bʋ̃ʋ n'ʋ vɛ̃, ɩ̃ wõ a nɩ a Sore Naaŋmɩn, a kpɛnʋ-za-sob, zie: ʋ yel'a k'ʋʋ na sãw nɩ a tẽw za bɛr.

Naaŋmɩn zie n'a a ka-kʋɔra yã-bãwfʋ yi

²³ Nyɩ ƴãw tobr, nyɩ bɛr wõ m! Nyɩ cɛlɛ be, nyɩ bɛr wõ a ɩ̃ ƴɛ̀rʋ!

²⁴ A ka-kʋɔra na bɔbr k'ʋʋ bʋ̀r a, a kɔb tɛwr'a ʋ dɛ mɩ́ kʋɔr, wɛ̀rɛ a bɔwrɩ ɛ́ ŋmɛrɛ a tãdɛgɛ bɩɩ?

²⁵ Ɛcɛ ʋlɛ wa ɩ a tẽsɔw ʋ man taa baarɩ a, ʋ bɛ mɩ́ bʋ̀r zɛ-va-bʋʋrɛ kãw na dɩ kɛ́ nɩzɛl nɩ kimɛ̃ a ɩ? Al pùorí ʋ ƴãw ble, zɩ́ɛ nɩ ɔɔzʋ, ɛ́ baa ƴãw ble bʋʋrɛ kãw a púo nʋɔr ɛ?

²⁶ A ʋ Naaŋmɩn n'ʋ wul ʋ a tub ŋa, ɛ́ ɩ k'ʋ bãw ʋ.

²⁷ Bɛ bɛ nɛbr íre a nɩzɛl bie nɩ dà-pãgala na tɛr pĩi-bie a pile a ɩ. Bɛ mɩ̀ bɛ mɩ́ ɩ torko gbɛ́ɛ do nɛb a kimɛ̃ ɩ. Ɛcɛ dabɔl'ʋ bɛ mɩ́ va n a nɩzɛl nɩ a kimɛ̃,

²⁸ A ka-kʋɔra wa vàrɛ íre a ble bie a, ʋ bɛ mɩ́ vàrɛ a ble zuru bɛ tɛr bɛ́rʋ daar ɛ. Ʋ mɩ́ ɩ na a torko nɩ a dʋn nɛb a, ɛcɛ a bɛ mɩ́ ƴɛ́r a bie ŋmɛr ɛ.

²⁹ A tub ŋa mɩ̀ yi n a Sore, a kpɛnʋ-za-sob, zie. Yã-wule vla vla n'ʋ, a bãwfʋ ʋ na bãw a ɩ n kpɛ̃ɛ yaga.