Ɩzayi 27 - A SƐB-SÕW

A Sore na tʋ̃ɔ́ a kʋ̃ɔ-bɛrɛ wa-bɩɛ a

¹ A ʋlɩ bibir nɛ a, a Sore na de nɩ a ʋ zɛbr-sɔ-kpɛ̃ɛ na dɩrɛ a, na bɛ dɩ vuo ɛ́ tɛr fãw a, a Levɩatã na ɩ a waab na zɔrɛ a ƴãw, a Levɩatã na ɩ a wa-gõlõgõlõ a ƴãw. Ɛ́ ʋ na kʋ n a kʋ̃ɔ-kpɛ̃ɛ wa-bɩɛ.

A Sore nɩ a ʋ divɛ̃ tɩɩr púo

² A ʋlɩ bibir nɛ a, nyɩ cɛ yielu a divɛ̃-nʋ̃ɔ̀ nʋ̃ɔ̀ divɛ̃ tɩɩr púo ƴãw.

³ «A mãa, a Sore, mãa n'ɩ a ʋ gùre. Ɩ̃ cɔ̀rɛ ʋ nɩ kʋralɛ. Ɩ̃ gùre ʋ nɩ mʋ̃tɔ̃w nɩ tɩ̃ɩsɔw, kɛ́ nɩr taa wa sãw ʋ bɛr ɛ.

⁴ Ɩ̃ bɛ cãà nyɛ̃ nɩ ʋ suur ɛ. Ɛcɛ mãa wa nyɛ̃ gɔ-tuwr a, ɩ̃ na zɛb'ɩ a na ɛ́ nyɩw a bɛr.

⁵ Ɛcɛ sob nɛ na na zɔ kpɛ a ɩ̃ naayir a, ʋ na ɩ na ƴã-ɓaarʋ be mãa nɩ a ʋl zie, ʋ na ɩ na ƴã-ɓaarʋ be be.»

A Sore na dɩ n suur kʋ̀ a Ɩsɩrayɛl bʋʋrɛ

⁶ A nɩdaar na waar a, a Zakɔb bʋʋrɛ na tɛ n nyɩgɛ, a Ɩsɩrayɛl bʋʋrɛ na tɛ n pɩrmɛ ɛ́ pu, bɛ na paal'ɩ a tẽ-daa nɩ a bɛ wɔmɛ.

⁷ A Sore ŋmɛ n a ʋ nɩbɛ mɛ̃ a lɛ ʋ na ŋmɛ a bɛlɩ dem na tɩ ŋmɩɛr bɛ a bɩɩ? Ʋ kʋ bɛ na mɛ̃ a lɛ ʋ na kʋ a bɛlɩ dem na tɩ kʋrɛ bɛ a bɩɩ?

⁸ Ʋ̃ʋ 'hʋ̃, ɛcɛ ʋ ƴãw bɛ nɩ dɔwrʋ, diw bɛ, ír bɛ a bɛ tẽw pʋɔ. Ʋ pɛbl'ɩ a ʋ pɩɛlʋ kpɛ̃w kpɛ̃w za diw bɛ mɛ̃ saa-pɛrɩ́ sɛsɛb na fu n fãw a.

⁹ Nyɛ̃ a lɛ a Zakɔb sãwna na na baarɩ a, nyɛ̃ a ʋlɩ bom nɛ a ʋ yel-bier suur páwfʋ na na wa n a: bɛ na ƴɛ́r'ɩ a bàwr-maal-kube kʋsɛbɛ za a ɩ mɛ̃ tã-zɔ̃ a. A dà-barɩ nɩ a parfɛ̃ bʋ̃-nyɩwrɩ kʋ̃ cãà bà àr ɛ.

¹⁰ Nɩr za bɛ cãà a tẽ-kpɛ̃ɛ bɛ na cɔbrɩ ʋ kpɛmɛ a zɛbr ƴãw a pʋɔ ɩ. Bɛ bɛr ʋ na ʋ gã zawla mɛ̃ wɛja-kpalɛ a. A náli waar'a wa 'wɔbr a mʋ̃ɔ a be, a ganɛ na pɩ̃ɛnɛ a be, ɛ́ 'wɔbr a tɩɩr wuli váar.

¹¹ A wuli wa kò a, a mɩ́ kar'a lo, pɔwbɛ wa nyɩw a. A nɩ-bʋʋrɛ bɛ ŋa bɛ tɛr yã ɩ. Alɛ so a sob nɛ na ír bɛ a bɛ zɔrɛ bɛ nɩbaalʋ ɛ, a sob nɛ na maalɩ bɛ a bɛ dɩrɛ suur kʋ̀rɛ bɛ ɩ.

A Ɩsɩrayɛl nɩbɛ za bɛ na diw cen nɩ a lɛb-waa

¹² A ʋlɩ bibir nɛ a, a Sore na va n a ʋ bʋ̃-dieri a Efaratɩ manɩ́ tɩ tɔ a Eziptɩ tẽw fʋɔla. Ɛ́ nyɩɩm, Ɩsɩrayɛl nɩbɛ ɛ, ʋ na yiiri nyɩ nɩ been been mɛ̃ ka-zuru a.

¹³ A ʋlɩ bibir nɛ a, a ɩɩl-kpɛ̃ɛ na pɛbl'a. Lɛ n'a a bɛlɩ dem na tɩ bɔr be a Asiiri tẽw a, nɩ a bɛl bɛ na tɩ diw cen nɩ a Eziptɩ tẽw a, na lɛb wa. Bɛ na wa gbĩ n dume gũu tɩ tɔ tẽw a Sore niŋé, a tãw-sõw zu, a Zerizalɛm.