Ɩzayi 26 - A SƐB-SÕW

A tẽ-kpɛ̃ɛ na kpɛmɛ a nɩ a tẽ-kpɛ̃ɛ na bɛ tɛr tab a

¹ A ʋlɩ bibir nɛ a Zuda tẽw pʋɔ a, a nɩbɛ na yiele nɩ yielu ŋa: «Tɩ tɛr'ɩ tẽ-kpɛ̃ɛ na kpɛmɛ a. A ʋ gub ƴãw a, a Sore ƴãw nɩ dacine ayi viiri koli ʋ.

² Nyɩ yuo a dɩ̃dɛɛ, nyɩ bɛr a nɩ-bʋʋrɛ na tuur a mɩnʋ a bɛ kpɛ, bɛl na bɛ lɛb pùor a.

³ Fʋ mɩ́ tu n tub na bɛ bãw bʋnʋ a, tɩr a ƴã-ɓaarʋ mɩŋa, Sore e, bɛ na ƴãw a bɛ tɩɛrʋ a fʋ ƴãw a zũú.

⁴ Nyɩ ƴãw a nyɩ tɩɛrʋ a Sore ƴãw kʋralɛ, ʋ̃ʋ, a Sore ƴãw, ʋl na ɩ a Pìir na be kʋralɛ a.

⁵ Bʋ̃ʋ n'ʋ vɛ̃, ʋ bili nɩ a bɛlɩ dem na kpɩɛr a zi-kɛrɩ zu a bɛr bɛ siw tɩ lo. Ʋ dáa nɩ a tẽ-kpɛ̃ɛ na bɛ tɛr tab a lɔb, ʋ dáa ʋ na lɔb a tẽw, ɛ́ ɩ k'ʋ tɔ a tanɛ.

⁶ A nan dem nɩ a bãbàalbɛ na nɛb'ɩ ʋ nɩ gbɛ́ɛ.»

Puoru

⁷ Sore e, a nɩ-mɩŋa sɔ́r cere nɩ daadaa, fʋ ɩ na a ʋ sɔr-dẽdẽ man taa.

⁸ Sɩza n'a, Sore e, a sɔ́r fʋ na yel kɛ́ tɩ tuur a zu a, tɩ mɩ́ ƴãw nɩ a tɩ tɩɛrʋ a fʋ ƴãw. A ʋlɩ bom nɛ tɩ na bɔbr a n'ɩ kɛ́ tɩ bʋɔlɛ fʋ, tɩ tɩ́ɛrɛ fʋ.

⁹ A tɩ̃ɩsɔw a, ɩ̃ mɩ́ bɔbr'a kɛ́ fʋ nãà be a ɩ̃ zie, ɩ̃ mɩ́ bɔbr fʋ nɩ a ɩ̃ pʋ̃ɔmɩ pʋ̃ɔmɩ za. Fʋ̃ʋ mɩ́ wa tu a nɩsaalbɛ zie a lɛ fʋ na dɩ a ƴɛ̀rʋ bin a, a tẽ-daa nɩbɛ mɩ́ zanɩ nɩ a mɩnʋ.

¹⁰ Ɛcɛ bɛlɛ mɩ́ wa zɔ a nɩ-faar nɩbaalʋ a, bɛ bɛ mɩ́ zanɛ a mɩnʋ ɛ. Bɛ mɩ́ maalɛ nɩ a faa a tẽw ʋl tɔr za pʋɔ a nɩbɛ na ɩrɛ a vla a, Sore e, bɛ bɛ mɩ́ nyɛ̃ fʋ na ɩ kpɛ̃ɛ a ɩ.

¹¹ Sore e, a fʋ nũu zɛw nɩ a ŋmɛb ƴãw, ɛ́ bɛ bɛ nyɛ̃ ʋ ɛ. Ɛcɛ bɛ na nyɛ̃ nɩ a lɛ fʋ na tʋlɛ a fʋ nɩ-bʋʋrɛ gub ƴãw a, ɛ́ vĩ na nyɔw bɛ na. A vũu na be be a fʋ dɔ̃ dem ƴãw a na dɩ bɛ na.

¹² Sore e, fʋ kʋ̀rɛ tɩ nɩ a ƴã-ɓaarʋ, fʋ̃ʋ n'ʋ mɩ́ maalɩ a alɩ bome nɛ za tɩ na ɩrɛ a kʋ̀ tɩ.

¹³ Sore tɩ Naaŋmɩn i, nɩ-bɛrɛ na bɛ ɩ a fʋ̃ʋ a tɩ dãw na so tɩ, ɛcɛ a fʋ yúor yõ n'ʋ tɩ bʋɔlɛ.

¹⁴ A nɩ-bɛrɛ bɛ ŋa kpi na kʋ̃ lɛb vʋʋrɩ ɛ, bɛ ɩ n nyãakpɩmɛ tɛwr, bɛ kʋ̃ lɛb ìr ɛ. Fʋ wa na wa ɩ bɛ kpi pàw pɛr, wa ɩ a bɛ tɩɛrʋ tɔr za bɔr a nɩbɛ zie.

¹⁵ Fʋ ɩ na a tɩ tẽw nɩbɛ yɛ̀r dɔwlɩ, Sore e, fʋ ɩ na a tɩ tẽw nɩbɛ yɛ̀r dɔwlɩ, fʋ wul'ɩ a fʋ yúor-vɩɛlʋ-danʋ, fʋ ɩ na a tẽw tʋr-bɔwrɩ za taw tɔl nidaa.

¹⁶ Sore e, a kpɩɛrʋ daar a, fʋ̃ʋ n'ʋ a nɩbɛ mɩ́ bɔbr. Fʋ̃ʋ wa ƴãwnɛ a dɔwrʋ a lɛn daar a, bɛ mɩ́ puore na 'hũ'hune nɩ.

¹⁷ Sore e, tɩ tɩ be n a fʋ niŋé mɛ̃ pɔw-púor na ta dɔwfʋ a: ʋ ŋmɩɩlɛ na kone nɩ.

¹⁸ A tɩɩm mɩ̀ a, tɩ tɩ sɛw na kɛ́ tɩ dɔw, tɩ wõ n a 'wɔbrʋ, ɛcɛ a wa ɩ na mɛ̃ sɛsɛb'ʋ tɩ dɔw a. Tɩ bɛ kʋ̀ a tẽw a faafʋ ɛ, tɩ bɛ kʋ̀ nɩ-paalɛ a tẽ-daa ɩ.

A kũuni na lɛb'a vʋʋrɛ, ɛ́ a Sore sãw a faalʋ kpɛnʋ bɛr

¹⁹ Ɩ̃ nɩbɛ ɛ, a nyɩ kũuni na lɛb'a vʋʋrɛ, bɛ na lɛb a ìr àr. A bɛlɩ dem na gã a tanɛ pʋɔ a, na ìr'a ŋmɩɛr nʋ̃ɔ̀ cɛlsɩ. A Sore na ɩ na cãà ɓɩɛlʋ lo a nyɩ zu, ɛ́ a tẽsɔw ɩ a kũuni lɛb vʋʋrɛ.

²⁰ Ɩ̃ nɩbɛ ɛ, nyɩ kpɛ a nyɩ yie pʋɔ ɛ́ taw a pamɛ pàw nyɩ tʋɔra. Nyɩ sɔwlɩ blã, a Sore suur tɔl baarɩ.

²¹ Ʋlɛ n'ɩ ŋan yire a ʋ yir, k'ʋʋ wa kaa a tẽw nɩbɛ zie a bɛ yel-faar ƴãw. A tẽsɔw na bɛr'ɩ a zɩ̃ɩ a sãá, ʋ kʋ̃ cãà sɔwlɩ a nɩbɛ bɛ na kʋ a ɩ.