Ɩzayi 25 - A SƐB-SÕW

Barka puoru yielu

¹ Sore e, fʋ̃ʋ n'ɩ a ɩ̃ Naaŋmɩn, ɩ̃ zɛwr fʋ na ɛ́ íre a fʋ yúor. Bʋ̃ʋ n'ʋ vɛ̃, fʋ maal'ɩ a yel-vɩɛlɩ fʋ na tɩɛrɩ a. Koro za n'a fʋ tɩɛrɩ a, a gã na ɛ́ bɛ lɩɛbɛ ɩ.

² Fʋ ɩ na a tẽ-kpɛ̃ɛ lɩɛbɩ kʋsɛbɛ na gbõ taa a, a tẽ-kpɛ̃ɛ na cɔbrɩ kpɛmɛ a zɛbr ƴãw a, ʋ lo. A nɩ-sãanbɛ zɛbr-yir-kpɛ̃w bɛ cãà ɩ tẽ-kpɛ̃ɛ ɩ, bɛ kʋ̃ lɛb mɛ ʋ towtow ɛ.

³ Alɛ so nɩ-bʋʋrɛ kãw na kpɛmɛ a íre a fʋ yúor, nɩ-bʋʋrɛ na ɩrɛ po-to-fãw-ɩb a tẽ-bɛrɛ ƴãwnɛ fʋ na.

⁴ Bʋ̃ʋ n'ʋ vɛ̃, fʋ̃ʋ n'ʋ mɩ́ piw a bãbàalbɛ tɛr, fʋ mɩ́ piw nɩ a nan dem tɛr a bɛ kpɩɛrʋ pʋɔ. Fʋ ɩ n taw-lanʋ zie a saa ƴãw, ɓaarʋ a mʋ̃tɔ̃-tʋlʋ ƴãw. — A po-to-fãw dem suur ɩ na mɛ̃ saa na waar'ɩ sɛsɛb ŋmɩɛr dacin a,

⁵ mɛ̃ a mʋ̃tɔ̃-tʋlʋ na dɩrɛ tẽ-kõw a—. Fʋ mɩ́ ɩ na a nɩ-sãanbɛ damnʋ baarɩ. Mɛ̃ a lɛ zũzuwr ɓaarʋ na mɩ́ ɩ a mʋ̃tɔ̃w tʋlʋ ɓãa a, fʋ mɩ́ ɩ na a po-to-fãw dem zɛb-tʋ̃ɔ́fʋ yielu baarɩ.

A Sore cɔbrɛ nɩ cuw dɩb a nɩ-bʋʋrɛ za ƴãw

⁶ A Sore, a kpɛnʋ-za-sob, cɔbrɛ nɩ cuw dɩb a nɩ-bʋʋrɛ za ƴãw a Sɩyɔ̃ tãw zu, nɛn-kãánɩ nɩ divɛ̃-kore cuw dɩb, — nɛn-kãánɩ nɩ nɛn-buge, divɛ̃-kore na bɩ tɔ a —.

⁷ A be n'a ʋ na ír a kuor pɛn na pàw a nɩ-bʋʋrɛ za a bɛr, a kũuni gãw na pàw a ten za a.

⁸ Ʋ na ír'ɩ a kũu bɛr a nʋɔr kʋ. A Sore Naaŋmɩn na fɩɛl'ɩ a mʋta-kʋ̃ɔ bɛr a niŋe za ƴãw. Ʋ na ír'ɩ a ʋ nɩ-bʋʋrɛ vĩ bɛr a tẽw za pʋɔ. A Sore n'ʋ yel.

Ɩsɩrayɛl so nʋ̃ɔ̀ ɛ́ Mowab so loba

⁹ Bɛ na yere nɩ a ʋlɩ bibir nɛ: «Ʋlɛ n'ɩ a tɩ Naaŋmɩn. Tɩ tɩ ƴãw nɩ a tɩ tɩɛrʋ a ʋ ƴãw, ʋʋ faa tɩ na. Sɩza, a Sore ƴãw n'a tɩ ƴãw a tɩ tɩɛrʋ. Nyɩ ɩ tɩ cɩlɛ ƴawr'ɩ, tɩ cáarɛ, ʋ na faa tɩ a ƴãw.

¹⁰ A Sore nũu na ɩ nũ-vla a na gù n a tãw ŋa.» Ɛcɛ bɛ ƴɛ́r'ɩ a Mowab ŋmɛr bɛr ʋ gã, mɛ̃ mɔ̃-kon bɛ na nɛb kʋ̀rkʋr pʋɔrʋ bɔw pʋɔ a.

¹¹ A be a, ʋ na mɩ́ dɔl'ɩ a kpãkpamɛ mɛ̃ a lɛ bɛ na mɩ́ dɔl a a duwru ƴãw a. Ɛcɛ, nɩ a fãw za ʋ na saa na ƴãw a, a Sore na siwr'ɩ a ʋ pɔ̀lʋ.

¹² A fʋ dacine ziir al bɛ na cɔbrɩ a kpɛmɛ a zɛbr ƴãw bɛ tɛr tab a, Mowab i, a Sore lɔb a na, ʋ da a na lɔb, ʋ ɩ na a siw gã tẽw, a uuru pʋɔ.