Ɩzayi 24 - A SƐB-SÕW

A tẽ-daa sãw nɩ ʋ za

¹ A Sore na ɩ na a tẽw gã zawla, ʋ na sãw ʋ na bɛr, ʋ na ɩ na ʋ bɛ cãà tɛr niwn ɛ, ʋ na diw nɩ a nɩbɛ yaarɩ a ziir za:

² a bàwr-maalɛ mɛ̃ a nɩ-zawla a, a gbãgbaa sob mɛ̃ a gbãgbaa a, a pɔw-nɩ-kpɛ̃ɛ mɛ̃ a tõ-tõ-bi-pɔw a, a bʋ̃-kʋ̀ɔrɛ mɛ̃ a bʋ̃-daarɛ a, a sob nɛ na pɛ̃wn a mɛ̃ a sob nɛ bɛ na pɛ̃wn a, a sob nɛ zie bɛ na dɩ san a, mɛ̃ a sob nɛ na dɩ san a.

³ A tẽw na gã nɩ zawla pelẽpelẽ, bɛ na za ʋ nɩ ʋ za. Bʋ̃ʋ n'ʋ vɛ̃, a Sore n'ʋ yel a lɛ.

⁴ A tẽw tɛr'ɩ wahala, ʋ sãwnɛ na cere. A tẽ-daa za kpiir a, ʋ sãwnɛ na cere. A salom mɩ̀ lãw nɩ nɩ a tẽw kpiir.

⁵ A nɩbɛ na kpɩɛr a tẽw a dɛw ʋ na bɛr, bʋ̃ʋ n'ʋ vɛ̃, bɛ zawr'ɩ a Sore wulu bɛr, bɛ bɛ tu a lɛ ʋ na yel a ɩ, bɛ sãw nɩ a wõ-taa na be kʋralɛ ʋ na maal'ɩ bɛ a bɛr.

⁶ Alɛ so a Naaŋmɩn ŋmɛ-ƴãw báarɛ a tẽw, ɛ́ a nɩbɛ na kpɩɛr ʋ a nyɛ̃ a dɔwrʋ. Bɛ kpi na ɛ́ tɩ cɛ zaa pʋrɩ.

⁷ Wahala n'a a divɛ̃-paala zie, a divɛ̃ tɩɛ kpiir a, a nʋ̃ɔ̀-wonbɛ za kone na.

⁸ A gãgali na ŋmɩɛr ɩrɛ nʋ̃ɔ̀ a ŋmɛb tɛw na, a nɩbɛ na cɩlɛ ɩrɛ nɩ gɔmɛ a, a bɛ gɔmɛ baar'a, a korijome na ŋmɩɛr ɩrɛ nʋ̃ɔ̀ a ŋmɛb tɛw na.

⁹ A nɩbɛ bɛ cãà nyúur divɛ̃ yiele nɩ ɛ, a dã-kpɛn tome nɩ a dã-nyúurbɛ zie.

¹⁰ A tẽ-kpɛ̃ɛ nɩr na bɛ cãà kpɩɛr a lo na, a yie za pàw na, nɩr kʋ̃ lɛb tʋ̃ɔ́ kpɛ ɩ.

¹¹ A nɩbɛ sowre nɩ divɛ̃ a tẽ-kpɛ̃ɛ sɛ́ɛ pʋɔ, nʋ̃ɔ̀ za bɛ cãà be ɩ, a cɩlʋ yi na zaa a tẽw pʋɔ.

¹² A tẽ-kpɛ̃ɛ cɛ nɩ deboru tɛwr, a dɩ̃dɔr dacine ŋmɛr'a, ʋ sãw.

¹³ Yel-mɩŋa, a nɩ-bʋʋrɛ sɔgɔ a tẽw zu a, a na ɩ na mɛ̃ olivʋ tɩ-wɔmɛ bɛ na pɔr baarɩ ɛ́ yiire nɩ lãwgola a, mɛ̃ divɛ̃ tɩ-wɔmɛ bɛ na pɔr baarɩ ɛ́ yiire a wɔ̃-beƴeni na cɛ a.

A tẽw nɩbɛ dãwnɩ nɩ cɩlʋ zuo

¹⁴ A bɛlɩ dem na cɩ̃ɛ a cɩɛr'ɩ yielu, bɛ cáarɛ na yere nɩ a Sore na ɩ kpɛ̃ɛ a. Bɛ lɔbr'ɩ nʋ̃ɔ̀ cɛlsɩ à ŋá yi n a mʋ̃tɔ̃w-kpɛb-lowr ten pʋɔ waar'ɩ:

¹⁵ «Nyɩ íre a Sore yúor-vɩɛlʋ-danʋ a saa-pɛrɩ́ voru pʋɔ, nyɩ pore a ʋ yúor a kʋ̃ɔ-kpɛ̃ɛ-sɔgɔ-ten pʋɔ, nyɩ pore a Sore, a Ɩsɩrayɛl Naaŋmɩn, yúor!»

¹⁶ Tɩ wone yielu ŋa na yire a tẽw baarʋ zie a: «A Naaŋmɩn na ɩ mɩŋa sob a so yúor-vɩɛlʋ-danʋ!» Ɛcɛ mãa yere na: «Ɩ̃ wɛ na, ɩ̃ wɛ na! Baw-bio páw mɛ̃ na!» A mɩlmɩlbɛ mɩl'a. Mɩlʋ wɛ! A mɩlmɩlbɛ mɩlɛ na.

¹⁷ A pʋl-vʋ̃ɔ, a bɔw-zulu nɩ a bɛrɩ, alɛ n'a gùre nyɩ, nyɩɩm na kpɩɛr a tẽw zu a.

¹⁸ Sob nɛ na na wõ a pʋl-vʋ̃ɔ cɛl zɔrɛ a na lo n a bɔw-zulu pʋɔ. Ʋlɛ wa tʋ̃ɔ́ yi a be a, ʋ na kpɛ n a bɛra pʋɔ. A salom tokori vɛɛ yuo nɩ 'he'hee lɛ, a tẽsɔw pɛr damnɛ na.

¹⁹ A tẽsɔw pùr'a, ʋ pùr'a yaarɩ, ʋ dam'ɩ faa faa.

²⁰ Ʋ dẽdere na mɛ̃ dã-kuole a, ʋ damnɛ na mɛ̃ sɛw sɛsɛb na fure damnɛ a. A ʋ yel-bier tɩbrɛ nɩ a ʋ zu, ʋ lo ɛ kʋ̃ lɛb tʋ̃ɔ́ ìr ɛ.

A na-mɩnɛ naalʋ baarʋ nɩ a Naaŋmɩn naalʋ tib

²¹ A ʋlɩ bibir nɛ a, a Sore na ìr'ɩ a salom zu bʋ̃-nyɩwrɩ ƴãw a saa-zu, nɩ a tẽw na-mɩnɛ ƴãw a pile ka.

²² Bɛ na ɓã n bɛ za taa mɛ̃ nɩ-pàwrɩ a a bɔw-zulu pʋɔ, bɛ na pàw bɛ nɩ gaso pʋɔ. A na tɩ cɛlɩ na, ɛ́ bɛ wa nyɛ̃ dɔwrʋ.

²³ Vĩ na ɩrɛ nɩ a cuw, a mʋ̃tɔ̃w na nyɛ̃ nɩ vĩ. Bʋ̃ʋ n'ʋ vɛ̃, a Sore, a kpɛnʋ-za-sob, na dɩrɛ nɩ naalʋ a Zerizalɛm nɩ a Sɩyɔ̃ tãw zu. A ʋ yúor-vɩɛlʋ-danʋ na nyɩwrɛ nɩ a nɩ-kore niŋé.