Ɩzayi 23 - A SƐB-SÕW

Tɩ́ɩ̀r nɩ Sɩdɔ̃ ten na sãw na

¹ Ƴɛ̀rʋ na ƴɛ̀r Tɩ́ɩ̀r ƴãw a. «Nyɩ ŋmɩɛr kuor cɛlsɩ, nyɩɩm gbor-bɛrɛ na mɩ́ cen tẽ-zãánɩ a, bʋ̃ʋ n'ʋ vɛ̃, a zie za sãw na, a yie bɛ cãà be ɩ.» Gbor-bɛrɛ na yi a kʋ̃ɔ-kpɛ̃ɛ-sɔgɔ-tẽw, Sɩɩpʋr, wa ta a n'a wõ a yel ŋa.

² «Nyɩ ɩ gbili, nyɩɩm na kpɩɛr a kʋ̃ɔ-kpɛ̃ɛ nʋɔr a, nyɩɩm Sɩdɔ̃ tẽw yɛ-yɛrbɛ na mɩ́ tõ a nyɩ nɩbɛ bɛr

³ bɛ gãw a kʋ̃ɔ-kpɛ̃ɛ a.» A bome bɛ na mɩ́ bʋ̀r lanɩ a Nɩl man a, a bome bɛ na mɩ́ tɩ de a ʋ kõkowe ƴãw a, a Sɩdɔ̃ tẽw mɩ́ tɩ so a, a tẽ-kpɛ̃ɛ ŋa tɩ n'ɩ a nɩ-bʋʋr-yoru dàa.

⁴ Vĩ wɛ, Sɩdɔ̃ i, fʋ̃ʋ na ɩ a kʋ̃ɔ-kpɛ̃ɛ zɛbr-yir-kpɛ̃w a! Bʋ̃ʋ n'ʋ vɛ̃, a kʋ̃ɔ-kpɛ̃ɛ yere na: «Ɩ̃ bɛ wõ pʋ-dɔwra 'wɔbrʋ ɛ, ɩ̃ bɛ dɔw bibiir ɛ, ɩ̃ bɛ guoli pɔ́lɛ́ ɩ, ɩ̃ bɛ wul pɔwsɩrali ɛ.»

⁵ A Eziptɩ tẽw wa wõ a a, ʋ na màwr'a mɛ̃ a lɛn daar ʋ na na wõ a Tɩ́ɩ̀r yele a.

⁶ Nyɩ gãw a kʋ̃ɔ-kpɛ̃ɛ cen tɩ sãá Tarsisɩ, nyɩ ŋmɩɛr kuor cɛlsɩ nyɩɩm na kpɩɛr a kʋ̃ɔ-kpɛ̃ɛ nʋɔr a.

⁷ A nyɩ tẽ-kpɛ̃ɛ na tɩ dãw damnɛ a n'ɩ à ŋà a? Tẽ-kpɛ̃ɛ-kʋra kʋra na mɩ́ tɩ cen tɩ so ziir zi-zãánɩ a?

⁸ A Tɩ́ɩ̀r tẽ-kpɛ̃ɛ tɩ pone nɩ na-mɩnɛ kpawʋʋr, a ʋ yɛ-yɛrbɛ tɩ ɩ n na-mɩnɛ, a ʋ bʋ̃-kʋ̀ɔrbɛ tɩ ɩ n a tẽw zu nɩ-yée. Ɛ́ ãa n'ʋ wa yel k'aa Tɩ́ɩ̀r tẽw sãw?

⁹ A Sore, a kpɛnʋ-za-sob'ʋ yel k'ʋʋ ɩ a nɩbɛ bɛ na ƴãwnɛ a pɔ̀l-ɩb baarɩ, k'ʋʋ siwri a tẽw zu nɩ-yée za.

¹⁰ «Kʋ́ɔr a fʋ tẽsɔw, Tɩ́ɩ̀r i, mɛ̃ a Nɩl vuo bɛ na mɩ́ kʋ́ɔr a, a fʋ gbee siwfʋ zie na bɛ cãà be a ƴãw.»

¹¹ A Sore zɛw nɩ a nũu a kʋ̃ɔ-kpɛ̃ɛ ƴãw, ʋ ɩ na a naalʋ-ten màwr, ʋ yel'a kɛ́ bɛ sãw a Kanãa tẽw zɛbr-yir-kpɛn bɛr.

¹² Ʋ yel'a: «Sɩdɔ̃ tẽw dem i, a nyɩ nʋ̃ɔ̀ baar'a, nyɩɩm na ɩ mɛ̃ pɔwsɩrale bɛ na fɛr gã nɩ a. Fʋ̃ʋ saa ìr gãw a kʋ̃ɔ-kpɛ̃ɛ tɩ sãá a kʋ̃ɔ-kpɛ̃ɛ-sɔgɔ-tẽw Sɩɩpʋr a, fʋ cãà kʋ̃ tɩ nyɛ̃ pɩ̃ɛnʋ a be ɩ.

¹³ Nyɛ̃ a Kalde tẽw dem tẽw a: a nɩbɛ bɛ ŋa bɛ cãà be ɩ. A Asiiri tẽw ɩ na k'ʋ lɩɛbɩ wɛ-dʋn tẽw. A nɩbɛ tɩ mɛ n yir-cõcowli a zie piwru ƴãw, cɔbrɩ zɛbr-yir-kpɛn, ɛ́ a Asiiri tẽw wa ɩ a lɩɛbɩ deboru gã.

¹⁴ Nyɩ ŋmɩɛr kuor cɛlsɩ, nyɩɩm, gbor-bɛrɛ, na mɩ́ cen tẽ-zãánɩ a, a nyɩ zɛbr-yir-kpɛ̃w na lo a ƴãw.»

¹⁵ Lɛ n'a bɛ na yiiri a Tɩ́ɩ̀r tẽ-kpɛ̃ɛ bɛr yome lɩz'a ata nɩ pie, na ɩ na-been yõ nyɔ-vʋʋrʋ bibie a. A yome lɩz'a ata nɩ pie á ŋá wa baarɩ a, a na ŋmɛ̃ n a Tɩ́ɩ̀r tẽ-kpɛ̃ɛ zie mɛ̃ a lɛ a yielu ŋa na yere a pɔw-yɛm ƴãw a:

¹⁶ De korijom, cɔlɩ a tẽ-kpɛ̃ɛ, fʋ̃ʋ pɔw-yɛm bɛ na yiiri bɛr a. Ŋmɩɛr a lɛ fʋ na tʋ̃ɔ́ a, puule a fʋ yielu, a nɩbɛ cãà tɛr a fʋ tɩɛrʋ.

¹⁷ A yome lɩz'a ata nɩ pie wa baar'a, a Sore na kaa nɩ a Tɩ́ɩ̀r zie. Ʋ na lɛb'a páwr libie. Ʋ na tone nɩ a pɔw-yɛm tome nɩ a naalʋ-ten za na pàw a tẽ-daa a.

¹⁸ Ɛcɛ a alɩ bome nɛ ʋ na na mɩ́ páw a, nɩ a ʋ tɔnɛ a, bɛ na mɩ́ de a na kʋ̀ a Sore. Bɛ kʋ̃ mɩ́ gbõ a taa ɩ, bɛ kʋ̃ mɩ́ maal bin a ɩ. A alɩ bome nɛ ʋ na na mɩ́ páw a, na mɩ́ ɩ n a bɛlɩ dem na kpɩɛr a Sore niŋé a dɩb, ɛ́ sõw bɛ bɛ su kpar-vɩɛlɩ.