Ɩzayi 22 - A SƐB-SÕW

A Zerizalɛm, ʋ gùre ʋ tʋɔra

¹ Ƴɛ̀rʋ na ƴɛ̀r a “Yel-nyɛra fʋɔla” ƴãw a. Zerizalɛm i, bʋ̃ʋ n'ʋ so a fʋ nɩbɛ za do a gàrɛ zu?

² Bʋ̃ʋ n'ʋ so fʋ ɩ tẽ-kpɛ̃ɛ na ɩ gɔmɛ tɛwr a, tẽ-kpɛ̃ɛ na damnɛ a, tẽ-kpɛ̃ɛ na cɩlɛ ʋ za a? Zɛbr zie bɛ n'a a fʋ nɩbɛ kpi ɛ, zɛbr zie bɛ n'a bɛ kʋ bɛ ɩ.

³ A fʋ zɛbr-nɩbɛ nɩ-bɛrɛ lãw na zɔ bɛ za, a tam-tɛbrbɛ nyɔw bɛ na bɛ ɩ gaso nɩbɛ. A bɛlɩ dem za a dɔ̃ dem na tɩ páw a, a bɛlɩ dem na saa tɩ zɔ zãá a, bɛ nyɔw bɛ na bɛ ɩ gbãgbaar.

⁴ Alɛ n'a so ɩ̃ yere kʋ̀rɛ nyɩ: «Nyɩ ta kaarɛ ɩ̃ zie ɩ, nyɩ bɛr mɛ̃ ɩ̃ kõ a ɩ̃ mʋta-zɩ̃ɩ. Nyɩ ta dɩ tuo yel kɛ́ nyɩ mɔwlɩ mɛ̃ a ɩ̃ nɩ-bʋʋrɛ yele na sãw a ƴãw ɛ.

⁵ Bʋ̃ʋ n'ʋ vɛ̃, a dɩ̃a bibir a, a Sore ɩ na a ɩ zɔ-ŋmɛ-taa, nɩbɛ bɛ na zɛb tʋ̃ɔ́ a nɩ pʋl-vʋ̃ɔ.» A yel-nyɛra fʋɔla pʋɔ a, dacĩ-kpɛ̃ɛ 'law na lo, cɛlsɩ ŋmɩɛr'a dúor a tan lowr.

⁶ A Elam tẽw zɛbr-nɩbɛ tɛr'ɩ tamɛ nɩ lɔwr. Nɩbɛ be n a zɛbr-torkori zu, wi-zɔmnbɛ be n be. A Kɩ́ɩ̀r tẽw sojarɩ cɔbrɛ nɩ a bɛ zɛbr-kur-pãgalɩ.

⁷ Zerizalɛm i, a fʋ fʋɔlɩ al na vɩɛl zuo a za a paal'ɩ zɛbr-torkori, ɛ́ a wi-zɔmnbɛ cɔbrɩ gù a zɛbr a fʋ dɩ̃dɛɛ niŋé.

⁸ Bom bɛ cãà gù a Zuda naalʋ-tẽw ɛ. A ʋlɩ bibir a, nyɩ tɩ lɩɛb'ɩ niwn cɔw a zɛbr bome bɛ na bin a yir bɛ na bʋɔlɛ a «Tuw» a pʋɔ.

⁹ Nyɩ nyɛ̃ nɩ a dacĩ-kpɛ̃ɛ na viiri koli a Daviir Tẽ-kpɛ̃ɛ a, vɛɛ za. Nyɩ ƴãw nɩ kʋ̃ɔ paalɩ a kʋ̃ɔ-ƴãwfʋ-zie ʋl na be a pile a.

¹⁰ Nyɩ sɔr'ɩ a Zerizalɛm yie, nyɩ ŋmɛr'ɩ a mɩnɛ bɛr, k'aa dacĩ-bɛrɛ gub tʋ̃ɔ́ ɩ mɔlɛ.

¹¹ Nyɩ cɔbr'ɩ kʋ̃ɔ-ƴãwfʋ-zie a dacĩ-bɛrɛ ayi cara pʋɔ, a kʋ̃ɔ-ƴãwfʋ-zi-kʋra kʋ̃ɔnɩ ƴãw. Ɛcɛ nyɩ bɛ lɩɛbɩ niwn cɔw a sob nɛ na n'ʋ so a yele á ŋá za ɩrɛ a ɩ. Ʋ tɩ cɔbrɛ a nɩ koro kãw za, ɛ́ nyɩ bɛ nyɛ̃ ʋ ɛ.

¹² A ʋlɩ bibir nɛ a, a Sore, a Naaŋmɩn kpɛnʋ-za-sob, tɩ bʋɔlɛ nyɩ nɩ kon nɩ cɛlsɩ ŋmɛb ƴãw, a nyɩ zuru fɔrʋ nɩ vʋɔrɩ kparɩ sub ƴãw.

¹³ Ɛ́ a wa ɩ nʋ̃ɔ̀ nɩ cɩlʋ: bɛ kʋrɛ nĩi, bɛ ŋmarɛ píir kɔkɛɛ, bɛ 'wɔbr nɛn, bɛ nyúur divɛ̃. Nyɩ yere na: «Tɩ dɩrɛ ɛ́ nyúur, bʋ̃ʋ n'ʋ vɛ̃, bio tɩ na kpi na!»

¹⁴ Ɛcɛ a Sore, a kpɛnʋ-za-sob ɩ na k'ɩ̃ wõ yel ŋa: «Nyɩ kʋ̃ páw a nyɩ sãwna ŋa suur ɛ́ gù nyɩ tɩ kpi ɛ.» À ŋá n'a a Sore, a Naaŋmɩn kpɛnʋ-za-sob, pɔ yel.

Bɛ na faa nɩ a Sevina tome kʋ̀ Elɩakɩm

¹⁵ Nyɛ̃ a lɛ a Sore, a kpɛnʋ-za-sob, na yel mɛ̃ a: «Cen tɩ páw a bʋ̃-kaarɛ ŋa, a Sevina, na ɩ a nãà yir nɩ-kpɛ̃ɛ a, yel ʋ:

¹⁶ Bʋ̃ʋ n'ʋ fʋ so a ka, a fʋ nɩbɛ n'ɩ tẽbowle a ka fʋ tuwr yàa a fʋ ƴãw a ka, fʋ tuwr a fʋ yàa-bɔw a pìir saa-zu, fʋ tuwr a fʋ gaa zie a pìir pʋɔ?

¹⁷ Nyɛ̃, a Sore na dam dam fʋ na, ɩ̃ bá a, ʋ na nyɔw fʋ na gùr kpũlẽkpũlẽ,

¹⁸ ɛ́ gbanɩ fʋ bɛr fʋ tɩ bile tẽw kãw na yɛlmɛ a pʋɔ. Be n'a fʋ na tɩ kpi, be n'a fʋ na tɩ kpi n a fʋ zɛbr-torkori fʋ na zɛwr'ɩ fʋ tʋɔra ɛ́ ƴãwnɛ nɩ a fʋ nɩ-kpɛ̃ɛ yir vĩ a!

¹⁹ A Sore yere na: ɩ̃ na diw fʋ na bɛr a fʋ tome zie, ɩ̃ na ír fʋ nɩ a fʋ beba zie.

²⁰ A ʋlɩ bibir nɛ a, ɩ̃ na bʋɔl'ɩ a ɩ̃ tõ-tõ-bie Elɩakɩm, Hɩlkɩahu bidɛb.

²¹ Ɩ̃ na su ʋ nɩ a fʋ kpar-wogo, ɩ̃ na sɛ ʋ nɩ a fʋ kpàwr, ɩ̃ na de nɩ a fʋ nɩ-kpɛ̃ɛnʋ kʋ̀ ʋ. Ʋ na ɩ n sãà a Zerizalɛm tẽw dem zie, nɩ a Zuda naalʋ-tẽw za zie.

²² Ɩ̃ na de nɩ a Daviir yir pĩi kʋ̀ ʋ. Ʋlɛ wa yuo a pan a, nɩr bɛ pàwr ʋ ɛ, ʋlɛ wa pàw ʋ a, nɩr bɛ yuore ʋ ɛ.

²³ Ɩ̃ na kpa ʋ na mɛ̃ kpawbir a, zi-kpɛ̃w pʋɔ, ʋ́ʋ̀ na ɩ na a ʋ sãà yir tɛr yúor.»

²⁴ A ʋ yir nɩbɛ za, a bɛl na pɩɛlɩ ʋ a nɩ a bɛl na zãá nɩ ʋ a, na mɛ n a ʋ ƴãw mɛ̃ a lɛ bɛ na mɩ́ yawlɩ bʋ̃-pʋrpʋr kpawbir ƴãw a, a lali tɩ tɔ a ku-laar a. Nyɛ̃ tɩbrʋ na tɩbrɛ a!

²⁵ A Sore, a kpɛnʋ-za-sob, yere na: «Bibir kãw, a kpawbir na kpa zi-kpɛ̃w pʋɔ a kʋ̃ cãà àr ɛ, ʋ na ka na lo, ɛ́ a tuor ʋ na tuo a sãw.» À à ŋá n'a a Sore ƴɛ̀r.