Ɩzayi 21 - A SƐB-SÕW

A Babɩlɔn tẽw lo na

¹ Ƴɛ̀rʋ na ƴɛ̀r a «Wɛja-kpalɛ na pɩɛlɩ a kʋ̃ɔ-kpɛ̃ɛ a» ƴãw a. Mɛ̃ a lɛ a sɛsɛb-pɩlɛ na mɩ́ fu n fãw tɔl a Negɛɛvʋ tẽw a, a dɔ̃ sob yi n a wɛja-kpalɛ pʋɔ waar, tẽw na ɩrɛ dɛ̃bɩ̃ɛ a.

² — Yel-nyɛra na ɩ kpɛ̃ɛ a n'ʋ a Sore ɩ k'ɩ̃ nyɛ̃. — A nɩr ʋl nyɩ na tɩ dãw tɛr'ɩ a wõ-taa a lɩɛb'ɩ mɩlmɩlɛ, a zi-sãwnɛ sãwnɛ nɩ a zie. A Sore yere na: «Elam tẽw dem i, nyɩ ìr'ɩ a zɛbr! Mɛdɩ mɩnɛ ɛ, nyɩ piw a tẽ-kpɛ̃ɛ! Ɩ̃ na ɩ na a ʋ pɔ̀l-ɩb za baarɩ.»

³ Alɛ n'a so a ɩ̃ pʋsabɛ za màwr. 'Wɔbrʋ 'wɔbr mɛ̃ na, mɛ̃ pɔw na dɔwr a 'wɔbrʋ a. A damnʋ dam mɛ̃ na zuo ɩ̃ kʋ̃ tʋ̃ɔ́ wõ bom ɛ, pʋl-vʋ̃ɔ tɛr mɛ̃ na zuo ɩ̃ kʋ̃ tʋ̃ɔ́ nyɛ̃ bom ɛ.

⁴ A ɩ̃ yã bɔrɛ na, dɛ̃bɩ̃ɛ ɩrɛ mɛ̃ na ɩ̃ màwr. Ɩ̃ tɩ gùre nɩ a zaanʋɔra zie na mɩ́ ɓãa a, ʋʋ wa lɩɛbɩ zaanʋɔra pʋl-vʋ̃ɔ a ɩ̃ zie.

⁵ Bɛ cɔbrɛ nɩ a bʋ̃-dɩrɩ, bɛ yɛ́rɛ nɩ a pɛnɛ a zɩma ƴãw, bɛ dɩrɛ na ɛ́ nyúur. Bɛ wa bere na cɛl ŋmɛ: «Nyɩ ìr, zɛbr-nɩbɛ nɩ-bɛrɛ ɛ! Nyɩ cɔbrɩ a nyɩ zɛbr bome!»

⁶ Bʋ̃ʋ n'ʋ vɛ̃, à ŋá n'a a Sore ƴɛ̀r a ɩ̃ zie: «Cen tɩ ƴãw zi-piwre ʋ̀ mɩ́ yel ʋlɩ bom nɛ ʋ na na nyɛ̃ a.

⁷ Ʋlɛ wa nyɛ̃ zɛbr-torko wie ayi na tawr a, nɩbɛ na zɔm bòn a, nɩbɛ na zɔm nyɔ̃wmɩ a, ʋ̃ʋ cɛlɛ be vla, ʋ cɛlɛ be vla vla!»

⁸ A zi-piwre cɩɩr'a: «Zu-sob i, ɩ̃ àr'ɩ a zie piwru zie a bibi-ɓil za, ɩ̃ àr'ɩ a ɩ̃ zie gub zie a tɩ̃ɩsɔw za.

⁹ Nyɩ cɛlɛ be! Nɩr'ʋ waar. Ʋ be n zɛbr-torko wie ayi na tawr a zu. Ʋ de nɩ a ƴɛ̀rʋ yel: “A Babɩlɔn tẽw lo na, a Babɩlɔn tẽw lo na! A ʋ ŋmɩmɛ dasuli za gã nɩ tẽw, a kar kar a gã.”»

¹⁰ Ɩ̃ nɩbɛ ɛ, nyɩɩm bɛ na ŋmɛ mɛ̃ ble a gbãgbala pʋɔ a, a yel n'ɩ à ŋà, a Sore, a kpɛnʋ-za-sob, a Ɩsɩrayɛl Naaŋmɩn, na ɩ k'ɩ̃ bãw a. A yel n'ɩ à ŋà ɩ̃ na wa yere kʋ̀rɛ nyɩ a.

Nyɩnɛ n'a a tɩ̃ɩsɔw cen ta?

¹¹ Ƴɛ̀rʋ na ƴɛ̀r Duma ƴãw a. Nɩr'ʋ be Seyiir ɛ́ cɩɩrɛ yere a ɩ̃ zie: «Zi-gùre e, nyɩnɛ n'a a tɩ̃ɩsɔw cen ta? Zi-gùre e, nyɩnɛ n'a a tɩ̃ɩsɔw cen ta?»

¹² A zi-gùre sɔw: «A biɓaara tarɛ na, al pùorí a tɩ̃ɩsɔw lɛb waar. Nyɩmɛ wa bɔbr kɛ́ nyɩ lɛb sowri a, nyɩ sowri, ɛ́ a pùorí nyɩ lɛb wa daar kãw.»

Ƴɛ̀rʋ na ƴɛ̀r a Arabi tẽw ƴãw a

¹³ Ƴɛ̀rʋ na ƴɛ̀r a Arabi tẽw ƴãw a. Nyɩ na gã nɩ a Arabi tẽw wɩ̀ɛ pʋɔ, nyɩɩm na tɔlɛ a wɛja-kpalɛ pʋɔ cere Dedan a.

¹⁴ Nyɩɩm na kpɩɛr a Tema a, nyɩ tuori a kʋ̃ɔ-nyúur dem, nyɩ cen nɩ kʋ̃ɔ tɩ kʋ̀ bɛ. Nyɩ tuori a nɩbɛ na zɔrɛ a, nyɩ cen nɩ bʋ̃-dɩrɩ tɩ kʋ̀ bɛ.

¹⁵ Bʋ̃ʋ n'ʋ vɛ̃, bɛ zɔ n a zɛbr-sɔ-kpɛ̃ɛ niŋé, a zɛbr-sɔ-kpɛ̃ɛ na gù a cɛb a niŋé, a tam na dúori a bɛ ƴãw a niŋé, a zɛbr na tʋl kpãkpã a niŋé.

¹⁶ À ŋá sɩrɩ n'a a Sore ƴɛ̀r a ɩ̃ zie: «Ka nɩ yũon-been gbàgbàgbà, ɛ́ a Kedaar tẽw vɩɛlʋ za na baar'a.

¹⁷ A tam-tɛbrbɛ na cɛ nɩ zaa pʋrɩ a Kedaar zɛbr-nɩbɛ pʋɔ.» A Sore, a Ɩsɩrayɛl Naaŋmɩn n'ʋ yel.