Ɩzayi 2 - A SƐB-SÕW

¹ A ʋlɩ bom nɛ a Amɔtɩsɩ bidɛb, Ɩzayi, na nyɛ̃ càar'ɩ a Zuda naalʋ-tẽw nɩ a Zerizalɛm tẽ-kpɛ̃ɛ a.

A nɩ-bʋʋrɛ za na darɛ nɩ taa cere a Zerizalɛm

² Daar waar'a na ta, a Ŋmɩn-yir-kpɛ̃ɛ tãw na wɩɛr tɩ àr a tan nyʋɔrɩ́, ɛ́ kɛrɩ do gãw a tãli. Lɛ n'a a nɩ-bʋʋrɛ za na darɛ taa cere a ʋ zu.

³ Nɩ-bʋʋr-yaga na ìr'a lo a sɔ́r ɛ́ yere: “Nyɩ wa! Nyɩ wa tɩ do a Sore tãw zu, tɩ do a Zakɔb Naaŋmɩn yir. Ʋ na tɩ wul tɩ nɩ a ʋ sɛ́ɛ, ɛ́ tɩ na cere nɩ a ʋ soli zu.” Sɩza, Sɩyɔ̃ n'a a Sore wulu yire waar, Zerizalɛm'a a ʋ ƴɛ̀rʋ yire waar wa páwr tɩ.

⁴ Ʋ na mɩ́ dɩ n a ƴɛ̀rʋ kʋ̀ nɩ-bʋʋrɛ na tɛr taw-taa a, ʋ na mɩ́ bãw nɩ nɩ-bʋʋr-yaga yele kʋ̀ bɛ. Bɛ na mɩ́ de nɩ a bɛ zɛbr-sɔ-bɛrɛ zuw maal'ɩ kue, ɛ́ de a bɛ kafine maal'ɩ sɔ-nɔ-gori. Tẽw kãw kʋ̃ mɩ́ lɛb ŋmãa nɩ tẽw kãw zɛbr ɛ, nɩr kʋ̃ lɛb cãà zanɛ zɛbr zɛbrʋ ɛ.

⁵ Nyɩ wa, Zakɔb yir dem i! Nyɩ ɩ tɩ cere a Sore cãà pʋɔ.

A Sore bibir

⁶ Sore e, fʋ zawr'ɩ a fʋ nɩ-bʋʋrɛ bɛr, a Zakɔb yir dem. Bʋ̃ʋ n'ʋ vɛ̃, a Saa-pɛrɩ́ bàwr-bʋwrbɛ paal'ɩ a bɛ tẽw. A tɩtɩlbɛ yãwmɛ na man a Filisɩtɛ̃ mɩnɛ. A fʋ nɩ-bʋʋrɛ maalɛ nɩ yɛ̀rʋ́ nɩ a nɩ-sãanbɛ.

⁷ A bɛ tẽw paal'ɩ salm-pla nɩ salm-zɩɛ, nɩ na-bome bɛ na kʋ̃ tʋ̃ɔ́ sɔ́r a. Ʋ paal'ɩ wie nɩ zɛbr-torkori.

⁸ A bɛ tẽw paal'ɩ tɩbɛ: bɛ gbine nɩ dume a bɛ nuru bʋ̃-maalɩ niŋé, bome nɩsaalbɛ na maalɩ a.

⁹ Alɛ n'a so a nɩsaalbɛ za na gũu zu, ɛ́ bɛ siwri bɛ. Sore e, taa dɩrɛ suur kʋ̀rɛ bɛ ɩ.

¹⁰ Nyɩ sɔwlɩ a pìe pʋɔ, nyɩ mʋr a tẽw, a Sore na ɩrɛ dɛ̃bɩ̃ɛ a niŋé, nɩ a ʋ dɛpaalʋ vɩɛlʋ niŋé.

¹¹ A nɩsaal na mɩ́ jɩ́r a pɔ̀l-jɩ́rʋ a, a na fɛr'a ʋ mɩ́ jɩ́r pile, ɛ́ a fɛr a pɔ̀lʋ sob ʋ gũu zu. A ʋlɩ bibir nɛ a, a Sore yõ n'ʋ na ɩ kpɛ̃ɛ.

¹² A Sore, a kpɛnʋ-za-sob, tɛr'ɩ bibir ʋ na na ìr bom za na ɩrɛ pɔ̀lʋ a ƴãw, bom za na zɛwr ʋ tʋɔra ɛ́ tɩɛrɛ k'ʋʋ zuo nɩ za a ƴãw k'ʋʋ siwri ʋ.

¹³ Ʋ na ìr'ɩ a Libã tẽw sɛɛdɩr tɩɩr za ƴãw, a tɩɩr á ŋá na kɛrɩ kɛrɩ a, nɩ a Basan tẽw sɛn tɩɩr ƴãw,

¹⁴ a tã-kɛrɩ za ƴãw, nɩ a tãli na do do a ƴãw,

¹⁵ a yir-cõcowli za na kɛrɩ a ƴãw, nɩ a dacĩ-bɛrɛ na bɛ tɛr dob a ƴãw,

¹⁶ a gbor-bɛrɛ za ƴãw, nɩ a gbor-vɩɛlɩ vɩɛlɩ za ƴãw.

¹⁷ A na fɛr'a pɔ̀lʋ sob za gũu zu, ɛ́ a bɛlɩ dem na ɩrɛ nyɔka-ɩb a siwri bɛ tʋɔra. A ʋlɩ bibir nɛ a, a Sore yõ n'ʋ na ɩ kpɛ̃ɛ.

¹⁸ A tɩbɛ za na bɔr a.

¹⁹ Nyɩ kpɛ a pìe bɔwrɩ pʋɔ nɩ a tẽw bɔwrɩ pʋɔ, a Sore na ɩrɛ dɛ̃bɩ̃ɛ a niŋé, nɩ a ʋ dɛpaalʋ vɩɛlʋ niŋé, ʋ nãà wa ìr k'ʋʋ ƴãw a tẽw pʋl-vʋ̃ɔ a.

²⁰ A ʋlɩ bibir nɛ a, a nɩbɛ na lɔb'ɩ a bɛ salm-pla nɩ a bɛ salm-zɩɛ tɩbɛ ƴãw cʋcʋɛ nɩ zãzã-cili, a tɩbɛ bɛ na maalɩ kɛ́ bɛ puore a.

²¹ Bɛ na cen nɩ a pìe bɔwrɩ pʋɔ nɩ a pìe haba, a Sore na ɩrɛ dɛ̃bɩ̃ɛ a niŋé, nɩ a ʋ dɛpaalʋ vɩɛlʋ niŋé, ʋ nãà wa ìr k'ʋʋ ƴãw a tẽw pʋl-vʋ̃ɔ a.

²² A na ɩ à ŋá a, nyɩ bɛr a nɩsaal, pɩɛlʋ tɛwr'ʋ a nyɔbɔwɛ pʋɔ. A ʋ pɛr pãa n'ɩ bo a?