Ɩzayi 19 - A SƐB-SÕW

Ƴɛ̀rʋ na ƴɛ̀r a Eziptɩ tẽw ƴãw a

¹ Ƴɛ̀rʋ na ƴɛ̀r a Eziptɩ tẽw ƴãw a. A Sore be n zũzuwr na cere fɔ̃w fɔ̃w a zu, ʋ tarɛ nɩ a Eziptɩ tẽw. A Eziptɩ tẽw tɩbɛ màwr'ɩ a ʋ niŋé, ɛ́ a Eziptɩ tẽw dem kanyir baarɩ.

² A Sore yere na: «Ɩ̃ na ƴãw nɩ a Eziptɩ tẽw dem tãá, bɛ na zɛbr'ɩ taa a bɛ cara pʋɔ, yɛb nɩ yɛb, tɔ nɩ tɔ, tẽ-kpɛ̃ɛ nɩ tẽ-kpɛ̃ɛ naalʋ-tẽw nɩ naalʋ-tẽw.

³ A Eziptɩ tẽw dem yã na yi na, ɩ̃ na dam'ɩ a yele bɛ na tɩ́ɛrɩ bin a nyaw taa. Lɛ n'a bɛ na sowre a bɛ tɩbɛ, a tɩtɩlbɛ nɩ a bàwr-bʋwrbɛ.

⁴ Ɩ̃ na bɛr'ɩ a Eziptɩ tẽw kʋ̀ zu-sob na tɛr mimi-kõw a, na-po-tuo sob'ʋ na so ʋ.» À à ŋá n'a a Sore Naaŋmɩn, a kpɛnʋ-za-sob, yere.

⁵ A Nɩl kʋ̃ɔ báarɛ na, a man ŋa ko n pelẽpelẽ.

⁶ A bɔw-wɛrɩ kʋ̃ɔ nyùur'a, a Nɩl man gbɛ́ɛ kʋ̃ɔ síwre na, a síwre na na tɩ sɩr. A bàa-kɛkɛɛ nɩ jimie vàrɛ na.

⁷ A bà-mʋ̃ɔ na lanɩ a Nɩl man, ɛ́ be a zie ʋl a ʋ kʋ̃ɔ na zɔrɛ kpɩɛr a kʋ̃ɔ-kpɛ̃ɛ kʋ̃ɔ pʋɔ a kòre na. Sɛsɛb wobr a na cere nɩ, bom za bɛ cãà be ɩ.

⁸ A zʋm-nyɔwrbɛ kone na, a bɛlɩ dem za na lɔbr a zʋm-pime a Nɩl man pʋɔ a kone nɩ a bɛ kpɩɛrʋ. A bɛlɩ dem na lɔbr a mɩ̃ɛ a kʋ̃ɔ zu a fãw báarɛ na.

⁹ A bɛlɩ dem na tone a lɛ̃ tome a tɩɛrʋ na wɛ na. A pɔwbɛ na mɩ́ càarɩ a lɛ̃ fomie na lɩr taa a, nɩ a dɛbr na mɩ́ wób a a sãá nɩ bàalbɛ a pʋl-vʋ̃ɔ zũú.

¹⁰ A pɛn-wobrbɛ bɛ cãà laar ɛ, a bɛlɩ dem na tɩ páwr a bɛ nyɔ-vʋʋrʋ à à ŋá a, bɛ bãw ŋmɩŋmɩn za n'a ɩ.

¹¹ A Tanisɩ tẽ-kpɛ̃ɛ nɩ-bɛrɛ ɩ n dãbole. A yã-bãwnbɛ na wule a Faarawɔ̃ a maal'ɩ gẽgemi dem lãw. Ŋmɩŋmɩn n'a a bɛ kãw za na mɩ́ sàw yel a Faarawɔ̃: «Yã-bãwnɛ nɛ m, a koro za na-mɩnɛ bie»?

¹² A fʋ yã-wulbɛ wa mɔ̃, Faarawɔ̃ i? Bɛ yel kʋ̀ b, bɛ ɩ fʋ bãw a ʋlɩ bom nɛ a Sore, a kpɛnʋ-za-sob, na yel a fʋ tẽw ƴãw a!

¹³ A Tanisɩ tẽw nɩ-bɛrɛ lɩɛb'ɩ dãbole, a Mɛmfisɩ nɩ-bɛrɛ bɛ̀lɛ nɩ bɛ tʋɔra. Bɛ ɩ na a Eziptɩ tẽw bɔrɛ, bɛl na ɩ a tẽ-ŋma-kʋ̀rɩ nɩ-bɛrɛ a.

¹⁴ A Sore ɩ na a bɛ yã bɔr, ɛ́ bɛ ƴãw a Eziptɩ tẽw bɔrɛ a ʋ yele za pʋɔ. Ʋ ŋmɛ̃ na mɛ̃ dã-kuole na mɩ́ dẽdere tire nɩ a.

¹⁵ Nɩr za kʋ̃ lɛb tʋ̃ɔ́ ɩ bom a Eziptɩ tẽw ɛ, a zú nɩ a zʋʋr ɛ, a kpãkparmɛ wule nɩ a bàa-kɛkɛr ɛ.

A lɛ a nãà wa ŋmɛ̃ a Eziptɩ tẽw ƴãw a nɩdaar a

¹⁶ Bibir kãw, a Eziptɩ tẽw dem na ɩ na mɛ̃ pɔwbɛ a. Dɛ̃bɩ̃ɛ na mɩ́ ɩrɛ bɛ na bɛ màwr, a lɛn daar a Sore, a kpɛnʋ-za-sob, nãà mɩ́ wa zɛw a nũu a bɛ ƴãw a.

¹⁷ A Zuda tẽw tɩ́ɛrʋ na mɩ́ ɩ bɛ nɩ vĩ. Lɛn daar za bɛ nãà mɩ́ wa ƴɛ̀rɛ a ʋ ƴɛ̀rʋ a bɛ niŋé a, dɛ̃bɩ̃ɛ na mɩ́ ɩrɛ bɛ na, a lɛ a Sore, a kpɛnʋ-za-sob, na yel k'ʋʋ na ɩ bɛ na a ƴãw.

¹⁸ Bibir kãw, tẽ-bɛrɛ anũu na be n a Eziptɩ tẽw, bɛ ƴɛ̀rɛ ebre a be, ɛ́ a nɩbɛ mɩ́ pɔ yel k'aa Sore, a kpɛnʋ-za-sob, so bɛ. A tẽ-bɛrɛ á ŋá kãw yúor na dɩ na kɛ́ Mʋ̃tɔ̃w-tẽ-kpɛ̃ɛ.

¹⁹ Bibir kãw, bàwr-maal-kuur na be n a Eziptɩ tẽw sɔwlɩsɔw a Sore ƴãw, ɛ́ kʋsɛ-tela be a ʋ ƴãw a tẽw tʋr-bɔw ƴãw.

²⁰ Ʋ na ɩ n bãwfʋ na wule k'aa Sore, a kpɛnʋ-za-sob, be n a Eziptɩ tẽw pʋɔ a. A Eziptɩ tẽw dem wa kone cɔwr a Sore, a bɛlɩ dem na dɔwrɛ bɛ a ƴãw a, ʋ na kʋ̀ bɛ nɩ faarɛ na na gù bɛ ɛ́ faa bɛ a.

²¹ A Sore na ɩ na a Eziptɩ tẽw dem bãw ʋ, ɛ́ a ʋlɩ bibir nɛ a, a Eziptɩ tẽw dem na bãw nɩ a Sore. Bɛ na tɛr'ɩ a bàwr-maal-tome nɩ a de-kʋ̀b bome tome a ʋ zie. Bɛ na kone nɩ nɛ́ɛ a Sore zie ɛ́ íre a.

²² A Sore na ŋmɛ n a Eziptɩ tẽw dem, ʋ na ŋmɛ bɛ na, ɛcɛ ʋ na sanɩ bɛ na. Bɛ na lɛb'a wa a Sore zie, ʋʋ na bɛr'a wõ a bɛ zɛlʋ ɛ́ sanɩ bɛ.

²³ Bibir kãw, sɔ́r na yi n a Eziptɩ tẽw ɛ́ cen a Asiiri tẽw. A Asiiri tẽw dem na mɩ́ cen nɩ a Eziptɩ tẽw, ɛ́ a Eziptɩ tẽw dem cen a Asiiri tẽw. Bɛ za na lãw na tone a Sore tome.

²⁴ Bibir kãw, a Sore na kʋ̀ n a ʋ maalʋ a tẽ-daa: a Ɩsɩrayɛl na ɩ n a ata sob na na páw a maalʋ lãwnɩ a Eziptɩ nɩ a Asiiri a.

²⁵ A Sore, a kpɛnʋ-za-sob, na maal'ɩ a tẽ-daa yel à ŋá: «Ɩ̃ maalɛ nɩ a Eziptɩ tẽw dem, a ɩ̃ nɩ-bʋʋrɛ, a Asiiri tẽw dem, a ɩ̃ nuru bʋ̃-maalɩ, nɩ a Ɩsɩrayɛl nɩbɛ, a mãa mɩŋa bom.»