Ɩzayi 16 - A SƐB-SÕW

A Mowab tẽw zɛlɛ nɩ sõwfʋ a Zerizalɛm zie

¹ «A Wɛja-kpalɛ-Pìirí be a, bɛ́ tɩr a pʋ́ra kʋ̀ a tẽw sob, a Zuda tẽw nãà, a Sɩyɔ̃ tãw zu.»

² A Arnon bàa gãwfʋ ziir a, a Mowab tẽw pɔwbɛ ɩ na mɛ̃ lili bɛ na diw a cowr pʋɔ a ƴawrɩ yi cere a.

³ A Mowab tẽw dem zɛlɛ nɩ a Zerizalɛm: «Wul tɩ yã, ɩ ɩb kãw. A mʋ̃tɔ̃-tuo a, piw tɩ tɛr, gù tɩ mɛ̃ a tɩ̃ɩsɔw na mɩ́ yɛ́r a ʋ lige pàw a zie a. Sɔwlɩ a tɩ nɩbɛ na yi zɔ a, ta mɩl a tɩ nɩbɛ na zɔrɛ a ɩ.

⁴ Bɛr a tɩ nɩbɛ na zɔ a, bɛ kpɩɛr a fʋ zie, kʋ̀ bɛ sɔwlʋ zie a zi-sãwnɛ niŋé. A fɛrʋ bɛ wa cãà be a, a zie sãwfʋ wa baar'a, a zi-sãwnɛ bɛ wa cãà a tẽw pʋɔ a,

⁵ a lɛn daar a, a fʋ nɔ̃wfʋ zũú a, naalʋ-dà-kɔw na kpɛmɛ ɛ́ cɛlɛ a na be n be a Daviir bʋʋrɛ ƴãw. Ʋ na zɩ̃ na mɛ̃ ƴɛ̀r-dɩrɛ a, a ʋ tɩ́ɛrʋ za ƴãw a yel na-tu-sɔr-a ƴãw, ʋʋ tʋlɛ a mɩnʋ ƴãw.»

A Zerizalɛm kʋ̃ tʋ̃ɔ́ ɩ bom za a Mowab ƴãw ɛ

⁶ Tɩ wõ n a Mowab pɔ̀lʋ yele, a ʋ pɔ̀l-ɩb na bɛ dɩ vuo a, a ʋ nyɔka-ɩb, ʋ na manɛ kɛ́ ʋlɛ n'ʋ bɛ wõ a, a ʋ pɔ-zawlɛ.

⁷ Ƴɛrɛŋa a, a Mowab tẽw dem kone na ƴãwn bɛ tʋɔra, bɛ za kone na tɩ́ɛrɛ nɩ a divɛ̃ tɩ-wɔmɛ gatori bɛ na mɩ́ tɩ maalɩ a Kɩɩr-Harɛsɛtɩ a. Bɛ kone na bɛ bãw ŋmɩŋmɩn za n'a ɩ.

⁸ A Hɛsɩbon wɛrʋ ko na, nɩ a Sivima divɛ̃ tɩɩr póru. A divɛ̃ tɩɩr póru á ŋá divɛ̃ mɩ́ tɩ kuol'ɩ a bɛlɩ dem na so a nɩ-bʋʋrɛ a. A póru á ŋá mɩ́ tɩ cen na tɩ sãá Yazɛɛr, ɛ́ bɔr kpɛ a wɛja-kpalɛ pʋɔ. A tɩɩr wuli mɩ́ tɩ vo na tɩ gãw a kʋ̃ɔ-kpɛ̃ɛ-Kũu bɛr.

⁹ Alɛ n'a so ɩ̃ lãw nɩ a Yazɛɛr tẽw dem kone ƴãwn a Sivima divɛ̃ tɩɩr póru. Ɩ̃ na kõ na cir a ɩ̃ mʋta-kʋ̃ɔ ƴãw nyɩ, Hɛsɩbon nɩ Eleale e. Bʋ̃ʋ n'ʋ vɛ̃, zɛbr cɛl ŋmɛ n a nyɩ divɛ̃ tɩɩr wɔmɛ nɩ a nyɩ bʋ̃-dieri ƴãw.

¹⁰ A nʋ̃ɔ̀ na yaarɛ a bɛ cãà be a nyɩ tɩ-wɔnɩ zaadɛnɩ pʋɔ ɛ. Nɩr bɛ cãà wone a nʋ̃ɔ̀ cɛlsɩ nɩ a kuryii a nyɩ divɛ̃ tɩɩr póru pʋɔ ɛ. Nɩr bɛ cãà nɛ́br íre a divɛ̃ a divɛ̃ tɩɩr wɔmɛ nɛbrʋ ziir ɛ, cɛlsɩ bɛ cãà ŋmɩɛr manɛ taa cere ɩ.

¹¹ Alɛ so a ɩ̃ pʋsabɛ damnɛ a Mowab ƴãw mɛ̃ korijom fomie a, ɛ́ a ɩ̃ socir màwr a Kɩɩr-Hɛrɛsɩ ƴãw.

¹² Bɛ na nyɛ̃ nɩ a Mowab nɩbɛ bɛ bàlɛ bɛ tʋɔra dúor a maalʋ-ziir, bɛ cere a bɛ zi-sõw pʋɔ kɛ́ bɛ tɩ puori, ɛcɛ a na ɩ n zawla.

¹³ A ƴɛ̀rʋ n'ɩ à ŋà a Sore na ƴɛ̀r càar'ɩ a Mowab a koro kãw za a.

¹⁴ Ɛcɛ ƴɛrɛŋa a, a Sore yere na: «Ka nɩ yome ata gbàgbàgbà, a Mowab nɩ-yée nɩ a ʋ zu-sɛbla na bɛ dɩ vuo a kʋ̃ cãà saalɩ ɛ. A bɛl na na cɛ a na ɩ n zaa pʋrɩ, bɛ kʋ̃ cãà tɛr pɛr ɛ.»