Ɩzayi 14 - A SƐB-SÕW

A Ɩsɩrayɛl nɩbɛ na lɛb'a wa a bɛ tẽw pʋɔ

¹ A Sore na zɔ n a Zakɔb bʋʋrɛ nɩbaalʋ, ʋ na cãà na wul k'ʋʋ kaa na ír a Ɩsɩrayɛl. Ʋ na ɩ na a Ɩsɩrayɛl nɩbɛ lɛb zɩ̃ a bɛ tẽw pʋɔ. A nʋʋrɩ na lãw nɩ bɛ na pʋɔ a Zakɔb nɩbɛ pʋɔ.

² A nɩ-bʋʋr-yoru na tɛr'ɩ a Ɩsɩrayɛl nɩbɛ lɛb wa n a bɛ tẽw pʋɔ. Ɛ́ a be a, a tẽsɔw a Sore na so a pʋɔ a, a Ɩsɩrayɛl nɩbɛ na de nɩ a nɩbɛ bɛ ŋa bɛ ɩ gbãgbaar, a dɛbr nɩ a pɔwbɛ. Bɛ na tɛr bɛ na bɛ ɩ zɛbr nɩ-nyɔwrɩ, bɛl na dãw tɛr a bɛl Ɩsɩrayɛl nɩbɛ bɛ ɩ zɛbr nɩ-nyɔwrɩ a. A Ɩsɩrayɛl nɩbɛ na so nɩ a nɩbɛ bɛ ŋa na dãw so bɛ a.

A Babɩlɔn tẽw nãà kũu

³ Ɩsɩrayɛl i, a ʋlɩ bibir a Sore nãà wa ɩ fʋ nyɛ̃ pɩ̃ɛnʋ a fʋ kpɩɛrʋ, a fʋ wʋ̀ʋr nɩ a gbãgba-tuo fʋ na nyɛ̃ a pùorí a,

⁴ fʋ na cɛ n a yielu ŋa, kɛ́ fʋ ɩ a Babɩlɔn tẽw nãà la: Ŋmɩŋmɩn za n'a a tʋ̃ɔ́ ɩ? A nɩ-dɔwrɛ baarʋ n'a, a po-to-fãw-ɩb baarʋ n'a!

⁵ A Sore sãw nɩ a nɩ-faar kpɛnʋ bɛr, ʋ kár'ɩ a po-to-fãw sob dabɔl bɛr

⁶ na tɩ ŋmɩɛr a nɩbɛ kʋralɛ ŋmɛ-tʋlʋ tʋlʋ a, na mɩ́ tɩ tʋ̃ɔ́ a nɩ-bʋʋr-yoru nɩ suur a, ɛ́ dɔwrɛ bɛ bɛ zʋmnɛ nɩ a.

⁷ A tẽw za pãa pɩ̃ɛnɛ nɩ zoom. A nɩbɛ ŋmɩɛr'ɩ nʋ̃ɔ̀ cɛlsɩ.

⁸ A tɩɩr mɩ̀ cɩlɛ nɩ a po-to-fãw sob kũu ƴãw. A sɩpɩrɛ tɩɩr yere na kʋ̀rɛ ʋ: «A lɛ fʋ na dɛ kpɛ a bɔw a, nɩr bɛ lɛb cãà dúor waar wa cɩɛr tɩ lɔbr ɛ.»

⁹ A kpɩmɛ-tẽw damnɛ nɩ a pile a fʋ ƴãw, a fʋ waa yele bɛ na wõ a ƴãw. Ʋ sɩ̃wnɛ nɩ a nyãakpɩmɛ a fʋ ƴãw, a bɛlɩ dem za na tɩ dãw ɩ nɩ-bɛrɛ a tẽw zu a. Ʋ ƴãw na a nɩ-bʋʋrɛ na-mɩnɛ ìre a bɛ naalʋ-dà-kɔwr zuru.

¹⁰ Bɛ dier'ɩ a ƴɛ̀rʋ bɛ za, ɛ́ yere kʋ̀rɛ fʋ: «A fʋ̃ʋ mɩ̀ a, fʋ̃ʋ n'ɩ ŋan bɛ tɛr fãw ɛ, mɛ̃ a tɩɩm a. Fʋ ŋmɛ̃ na taa nɩ tɩ ƴɛrɛŋa!»

¹¹ A fʋ korijom ŋmɩɛrʋ pʋɔ n'a a fʋ dɛpaalʋ siw a kpɩmɛ-tẽw. Pʋɔrʋ n'ɩ a bʋ̃-zʋmzʋm zu fʋ na gã a, ɛ́ a zãzule n'ɩ a fʋ gãw-vaara.

¹² Ŋmɩŋmɩn za n'a fʋ yi a salom zu lo, fʋ̃ʋ, zi-vɩɛ-ŋmar-bir-nyɩwra? Ŋmɩŋmɩn za n'a bɛ lɔb fʋ bɛr a tẽw zu, fʋ̃ʋ na mɩ́ tɩ tʋ̃ɔ́ a nɩ-bʋʋrɛ a?

¹³ Fʋ mɩ́ tɩ yere na: «Ɩ̃ na do na tɩ tɔ a salom, ɩ̃ na bin nɩ a ɩ̃ naalʋ-dà-kɔw a Naaŋmɩn ŋmar-bie zu-sɔw, ɩ̃ na zɩ̃ n a tãw ʋl zu a ŋmɩmɛ na mɩ́ tuori taa a, a saa-pɛrɩ́-gʋba-lowr saa-zu za.

¹⁴ Ɩ̃ na do n a zũzuwe nyʋɔrɩ́, ɩ̃ na ɩ na mɛ̃ a Naaŋmɩn-na-do-saa-bɛ-pɩɛl-a.»

¹⁵ Ɛcɛ a kpɩmɛ-tẽw n'a a wa fɛr fʋ siw, a bɔw-zulu pɛrɩ́.

¹⁶ A bɛlɩ dem na nyɛrɛ fʋ a, mɩ́ maal'a bɛl fʋ, bɛ mɩ́ jɩ́rɛ fʋ nɩ gbẽgbẽ, tɩ́ɛrɛ nɩ bɛ pʋɔ: «A nɩr ʋl na mɩ́ tɩ ɩ a tẽw màwr a, a ʋl na mɩ́ tɩ damnɛ a naalʋ-ten a, ʋlɛ sɩrɩ n'ɩ à ŋà a?

¹⁷ Ʋlɛ sɩrɩ n'ʋ mɩ́ tɩ ɩ a tẽ-daa ʋ lɩɛbɩ wɛja-kpalɛ, mɩ́ tɩ sãw a tẽ-bɛrɛ bɛr, ɛ́ bɛ sàw na lɛb bɛr a zɛbr nɩ-nyɔwrɩ ɛ?»

¹⁸ A nɩ-bʋʋrɛ na-mɩnɛ za, bɛ za nyɛ̃ nɩ ƴãwfʋ gã nɩ, ŋa za a ʋ yàa pʋɔ.

¹⁹ Ɛcɛ a fʋ̃ʋ a, bɛ lɔb fʋ na bɛr zãá nɩ a fʋ ũùfʋ zie, mɛ̃ bi-cur-bɛra na ɩrɛ kɔkɔrʋ a, mɛ̃ kũu bɛ na nɛb'ɩ gbɛ́ɛ a. Nɩbɛ bɛ na kʋ a nɛbɛ pàw fʋ, Nɩbɛ a zɛbr-sɔ-kpɛ̃ɛ na kʋ a. Bɛ bin bɛ nɩ a kʋsɛbɛ na pɩɛrɩ pàw a bɔw-zulu pɛr a zu.

²⁰ Ɛcɛ bɛ kʋ̃ ũù fʋ lãwnɩ bɛ ɩ, fʋ na sãw a fʋ tẽw bɛr a ƴãw, fʋ na kʋ a fʋ nɩ-bʋʋrɛ a. A nɩ-faar bʋʋrɛ yúor kʋ̃ lɛb por towtow ɛ.

²¹ Nyɩ cɔbrɩ a bidɛbr kʋb a bɛ sãà mɩnɛ sãwna ƴãw, bɛ taa wa mab ìr lɛb zɛb de a tẽw, ɛ́ mɛ tẽ-bɛrɛ paalɩ a tẽ-daa ɩ.

²² A Sore, a kpɛnʋ-za-sob, yere na: «Ɩ̃ na ìr'ɩ a Babɩlɔn tẽw dem ƴãw. Ɩ̃ na ɩ na a Babɩlɔn yúor bɔr, lãwnɩ a ʋ nɩbɛ na cãà vʋʋrɛ a, a bɛ bibiir nɩ a bɛ pùorí nɩbɛ.

²³ Ɩ̃ na ɩ na a Babɩlɔn tẽw lɩɛbɩ bà-ƴɔrɛ, zɔ̃põ kpɛb zie. Ɩ̃ na pɩɩr'ʋ na nɩ saar na pɩɩrɛ cãlãcãlã a, a Sore, a kpɛnʋ-za-sob'ʋ yere.»

A Sore na sãw nɩ a Asiiri tẽw dem kpɛnʋ bɛr

²⁴ A Sore, a kpɛnʋ-za-sob, pɔ na yel à ŋá: «A lɛ ɩ na tɩ́ɛrɩ a, lɛ n'a a na ɩ, a lɛ ɩ̃ na yel a, lɛ n'a na maalɩ.

²⁵ Ɩ̃ na sãw nɩ a Asiiri tẽw dem kpɛnʋ bɛr a ɩ̃ tẽw pʋɔ, ɩ̃ na nɛb'ɩ bɛ nɩ gbɛ́ɛ a ɩ̃ tan zu. A bɛ kpɛnʋ dĩ nɩ a ɩ̃ nɩbɛ mɛ̃ ni-kʋ́ɔrɩ dàa a, ɩ̃ na ír ʋ na bɛr. Bɛ dɔwl'ɩ to-tɩbrʋ a bɛ bawŋmamɛ zu, ɩ̃ na tow ʋ na bɛr.»

²⁶ A lɛ a Sore na yel a tẽ-daa za ƴãw a n'ɩ à à ŋá, nɩ a nũu ʋ na zɛw a nɩ-bʋʋrɛ za ƴãw a.

²⁷ A Sore, a kpɛnʋ-za-sob, wa yel k'ʋʋ na ɩ n bom, ãa n'ʋ na ɩ a bɛ tʋ̃ɔ́? Ʋlɛ wa zɛw a nũu a, ãa n'ʋ na ɩ ʋ lɛb bɛr?

Filisɩtɛ̃ mɩnɛ ɛ, nyɩ ta cɩlɛ ɩ

²⁸ Yel ŋa n'ʋ bɛ tɩ yel a nãà Akaazɩ kũu yũon.

²⁹ Nyɩɩm, Filisɩtɛ̃ mɩnɛ za a, nyɩ ta cɩlɛ a dabɔl na tɩ ŋmɩɛr nyɩ a na kar a ƴãw ɛ. Bʋ̃ʋ n'ʋ vɛ̃, dɔpan na yi n a wa-kũu pʋɔ, ɛ́ wa-bɩɛ, na mɩ́ ƴaw a, yi a dɔpan pʋɔ.

³⁰ A nɩ-kɔmɛ za pʋɔ nɩ-kɔmɛ na tɛr'ɩ bʋ̃-dɩrɩ, a bãbàalbɛ na pɩ̃ɛnɛ na, ɛ́ bom bɛ damnɛ bɛ ɩ. Ɛcɛ a nyɩɩm, Filisɩtɛ̃ mɩnɛ a, a nyɩ dɔ̃ dem na ɩ na nyɩ kpi kɔ̃ pàw pɛr, ɛ́ bɛ na kʋ n a bɛlɩ dem nãà wa cãà vʋʋrɛ a.

³¹ Tẽ-bɛrɛ dɩ̃dɛɛ ɛ, nyɩ kone! Nyɩɩm tẽ-bɛrɛ ɛ, nyɩ lɔbr cɛlsɩ! A Filisɩtɛ̃ tẽw za kanyir baar'a, bʋ̃ʋ n'ʋ vɛ̃, zʋ̀ʋ́r yi n a saa-pɛrɩ́-gʋba-lowr waar. A dɔ̃ dem zie a, nɩr bɛ tawr yire a zɛbr-nɩbɛ pʋɔ ɩrɛ ʋ yõ ɩ.

³² Bɛ sɔw kɛ́ bʋnʋ kʋ̀ a nɩbɛ a Filisɩtɛ̃ mɩnɛ na tõ a? K'aa Sore mɩŋa n'ʋ mɛ a Sɩyɔ̃ tẽw. Be n'a a ʋ nɩ-bʋʋrɛ bãbàalbɛ kʋ̃ bãw damnʋ ɛ.