Ɩzayi 13 - A SƐB-SÕW

A Babɩlɔn tẽw loba pɩɛl'a

¹ Ƴɛ̀rʋ na càarɩ a Babɩlɔn tẽw bɛ ƴɛ̀r kʋ̀ Amɔtɩsɩ bidɛb, Ɩzayi, yel-nyɛra pʋɔ a.

² A Sore yere na: «Nyɩ zɛw bãwfʋ tã-kpalɛ zu. Nyɩ lɔbr nʋ̃ɔ̀ cɛlsɩ yere kʋ̀rɛ a zɛbr-nɩbɛ. Nyɩ wul bɛ nɩ a nũu, bɛ tu a nɩ-yée dɩ̃dɛɛ ƴãw kpɛ.

³ Mãa n'ʋ tɩr a ɩ̃ nʋɔr kʋ̀ a bɛlɩ dem ɩ̃ na so a. Ɩ̃ bʋɔl'ɩ a ɩ̃ soja-gãdaar, a bɛl a ɩ̃ zɛb-tʋ̃ɔ́fʋ na ɩrɛ nʋ̃ɔ̀ a, k'ɩ̃ɩ wa wul'ɩ a ɩ̃ suur.»

⁴ Nyɩ bɛrɛ wone a gɔmɛ á ŋá a tan pʋɔ, a ɩ na mɛ̃ zu-sɛbla na bɛ dɩ vuo a nɛbɛ a. Nyɩ bɛrɛ wone a naalʋ-ten damnʋ ŋa, nɩ-bʋʋrɛ na ɓã taa a. A Sore, a kpɛnʋ-za-sob'ʋ jɩ́rɛ a zɛbr-nɩbɛ kaar a zɛbr ƴãw.

⁵ A Sore nɩ a bɛlɩ dem ʋ na na wul'ɩ a ʋ suur a, yi n tẽ-zãána, bɛ yi n a tẽw tʋra ƴãw waar. Bɛ na wa sãw nɩ a tẽw za bɛr.

⁶ Nyɩ ŋmɩɛr kuor cɛlsɩ! A Sore bibir pɩɛl'a, ʋ tarɛ na mɛ̃ bom-za-sãwfʋ na yi a Kpɛnʋ-za-sob zie a.

⁷ Alɛ n'a so a kpãkpamɛ za kpi, ɛ́ nɩsaal za kanyir baarɩ.

⁸ Pʋl-vʋ̃ɔ nyɔw bɛ na, 'wɔbrʋ nɩ vãwkuur tɛr bɛ na, bɛ ŋmɩɩlɛ na mɛ̃ pɔw na dɔwr a. Bɛ háa háa nɩ nɛ́ɛ jɩ́rɛ nɩ taa. A bɛ niŋe mʋ̃ɔ̀ nɩ kãkãkã.

⁹ A Sore bibir'ɩ ŋan tarɛ, bibir nɩbaalʋ zɔba na bɛ ka be a, su-tʋlʋ kpãkpã bibir tɛwr na na ɩ a tẽw lɩɛbɩ wɛja-kpalɛ ɩrɛ nɩbaalʋ, ɛ́ ɩ a yel-bebe dem kpi pàw pɛr a ʋ pʋɔ a.

¹⁰ A saa ŋmar-bi-beƴeni nɩ a al na mɩ́ ɓã taa a kʋ̃ cãà nyɩwrɛ ɩ. A mʋ̃tɔ̃w na mɩ́ pure na wa báarɛ ɛ́ liw, ɛ́ a cuw cãà kʋ̃ cãà caalɛ ɩ.

¹¹ A Sore yere na: «Ɩ̃ na dɔwr'ɩ a tẽ-daa a ʋ faalʋ ƴãw, a nɩ-faar a bɛ ɩ-faar ƴãw. Ɩ̃ na ɩ na a pɔ̀lʋ dem nyɔka-ɩb baarɩ, ɩ̃ na siwr'ɩ a bɛlɩ dem na dɩrɛ gãda-nɩ-kpɛ̃ɛnʋ a pɔ̀l-ɩb.

¹² Ɩ̃ na ɩ na a nɩsaalbɛ bɛ cãà nyɛrɛ mɛ̃ a salm-zɩɛ mɩŋa mɩŋa a ɩ, bɛ bɛ cãà nyɛrɛ mɛ̃ a Ofɩɩr tẽw salm-zɩɛ a ɩ.»

¹³ Al ƴãw n'a a salom na dam, ɛ́ a tẽsɔw gbiwri a ʋ pɛr zu, a Sore, a kpɛnʋ-za-sob, su-yãyaar ƴãw, a ʋ su-tʋlʋ kpãkpã bibir.

¹⁴ Lɛ n'a ŋa za na mɩ́ lɛb tɩ páw a ʋ bʋʋrɛ, ŋa za na mɩ́ lɛb zɔ tu a ʋ tẽw lowr, mɛ̃ mɔlʋ bɛ na diwr a, mɛ̃ píir nɩr za na bɛ kparɛ ɓanɛ taa a.

¹⁵ Bɛlɩ dem za bɛ na na nyɛ̃ a, bɛ na baw bɛ na nɩ pime, ɛ́ bɛlɩ dem za bɛ na na nyɔw a, zɛbr-sɔ-kpɛ̃ɛ n'ʋ bɛ na kʋ n bɛ.

¹⁶ Bɛ na ƴɛ́r'ɩ a bɛ bi-cãpʋrmɛ ŋmɛr a bɛ mimié, bɛ na za n a bɛ yie, ɛ́ fɛr a bɛ pɔwbɛ gã nɩ.

¹⁷ A Sore yere na: «Ɩ̃ na ƴãw na Mɛdɩ mɩnɛ wa a bɛ ƴãw, nɩbɛ a salm-pla na bɛ ɩrɛ bɛ bom a, ɛ́ bɛ tobr bɛ ka a salm-zɩɛ ƴãw a.

¹⁸ A bɛ pime tɛbr'ɩ a pɔlbili lɔbr, bɛ bɛ jɩɩrɛ a bi-pɩɩlɛ bɛrɛ ɩ, bɛ bɛ zɔrɛ a bibiir nɩbaalʋ ɛ.»

¹⁹ A Babɩlɔn tẽw, a naalʋ-tẽw tẽ-kpɛ̃ɛ na vɩɛl zuo a za a, a Babɩlɔn tẽw dem pɩ̃ɛmɛ na tɛr yúor a, na ɩ na mɛ̃ a Sodɔm nɩ a Gomɔɔr ten a Naaŋmɩn na sãw bɛr a.

²⁰ Nɩr kʋ̃ lɛb kpɛ ʋ towtow ɛ, ʋ na gã nɩ zawla a yome yome za. A wɛja-kpalɛ nɩ-yʋɔrɩ tɛɛ za kʋ̃ lɛb maalɩ a bɛ pɛnɛ-sɛwr a be ɩ, dʋ̃-cɩɩnbɛ kʋ̃ lɛb tɛw àr a be ɩ.

²¹ Ɛcɛ a nyãanyũ-gaarɩ na kpɩɛr'ɩ a be, ɛ́ a vìíri paalɩ a yie. A kʋlãdisowli na kpɩɛr'ɩ a be, ɛ́ a bʋrali ƴáwr dɩ̃ɛnɛ a be.

²² A jɩbʋrɩ na kpɛ na paalɩ a ʋ yir-bɛrɛ, ɛ́ a gbõgbo-cili kpɩɛr a ʋ na-yir-vɩɛlɩ pʋɔ. A Babɩlɔn baarʋ daar pɩɛl'a, ʋ tarɛ na, bibi-been bɛ lɛb dɔwlɛ ɩ.