A naaŋmɩn-ƴèr-manɛ Oze sɛbɛ 8 - A SƐB-SÕW

A Ɩsɩrayɛl zawr'ɩ a Naaŋmɩn ɛ́ bʋ̀nɛ ɩrɛ

¹ Dʋ̃ a wɩ́ɛ! Kpɩɛrʋ siwr'ɩ a Sore tẽw pʋɔ mɛ̃ sɩla a. Bʋ̃ʋ n'ʋ vɛ̃, à ŋá n'a a Sore yere: «A Ɩsɩrayɛl nɩbɛ sãw nɩ mãa nɩ a bɛl wõ-taa bɛr, bɛ zawr'ɩ a ɩ̃ wulu bɛr.

² Bɛ kone na cɔwr mɛ̃ yere nɩ: “Ɩ̃ Naaŋmɩn i, tɩɩm Ɩsɩrayɛl, tɩ bãw fʋ na!''

³ Bɛ zawr'ɩ a vla bɛr, lɛ so a dɔ̃ sob diwr bɛ.

⁴ Bɛ zɩɩl'ɩ a bɛ na-mɩnɛ ɛ́ bɛ sowri mɛ̃ bom ɛ. Bɛ kaa na ír a bɛ niw-dierbɛ ɩ̃ɩ bɛ bãwnɩ a ɩ. A bɛ salm-pla nɩ a bɛ salm-zɩɛ n'a bɛ de maal'ɩ a tɩbɛ a bɛl mɩŋa loba ƴãw.

⁵ Samaari tẽw dem i, a nyɩ nadele ɩrɛ mɛ̃ nɩ kɔkɔrʋ. Nyɩ ɩ na a ɩ̃ suur ìr. Debor'a a na tɩ ta, nyɩ na kʋ̃ tʋ̃ɔ́ bɛ tɛr a sãwna a?

⁶ Ɩsɩrayɛl tẽw n'a ʋ yi, bʋ̃-maalɛ kãw n'ʋ maalɩ ʋ, ʋ bɛ ɩ Naaŋmɩn ɛ. Ʋ̃ʋ, a Samaari tẽw nadele na ŋmɛr'a yaarɩ pɩrɩsɩsɩ.

⁷ Nyɩ na bʋ̀rɛ a sɛsɛb a, sɛsɛb'ʋ nyɩ na cɛ. Bʋ̃ʋ n'ʋ vɛ̃, mɛ̃ a lɛ a zʋkpar na yel a: “Ble na bɛ yi zu a, bɛ tɛr zɔ̃ ɩ''. Ɛ́ ʋlɛ saa ɩ mɛ̃ ʋ tɛr'ɩ zɔ̃ a, nɩ-sãanbɛ nɛbɛ na dɩ ʋ.

⁸ Bɛ vɔl'ɩ a Ɩsɩrayɛl. Ʋlɛ n'ɩ ŋan a nɩ-bʋʋr-yoru sɔgɔ mɛ̃ bom na bɛ tɛr pɛr a.

⁹ Ʋ nyɛ̃ nɩ ʋ tʋɔra cen Asiiri. Bõw-gaara mɩ́ so nɩ ʋ tʋɔra, ɛcɛ a Efarayim nɩbɛ dàar'ɩ sɛnbɛ.

¹⁰ Bɛ na saa kʋ̀rɛ bʋ̃-kʋ̀rɩ a nɩ-bʋʋr-yoru a, a daar ʋl ɩ̃ na na ɓã bɛ taa a ta na. Ɛ́ ka nɩ blã blã a, bɛ na nyɛ̃ nɩ a wʋ̀ʋr a na-mɩnɛ za nãà na na ƴãw bɛ a.

¹¹ A Efarayim maal'ɩ a bàwr-maal-kube yaga yaga a yel-bier ír-bɛrʋ ƴãw, ɛcɛ a bàwr-maal-kube á ŋá nɩ̃ɛ na ɩ ʋ maalɛ a yel-bebe.

¹² Mãa saa ɩ mɛ̃ ɩ̃ sɛb'ɩ a ɩ̃ nɛ-ƴãwnɩ tu-tu-túr kʋ̀ ʋ a, ʋ bɛ ŋmɛlɛ kaar a ɩ.

¹³ Nɛnɛ n'a bɛ kʋrɛ 'wɔbr ɛ́ yel kɛ́ bàwr'a bɛ maalɛ. A bɛ pɛlɛ a mãa Sore pʋɔ towtow ɛ, ɩ̃ bɛ yiire a bɛ sãwna bɛrɛ ɩ, ɩ̃ sɔrɛ nɩ a bɛ yel-bebe. Bɛ na lɛb'a cen a Eziptɩ tẽw.

¹⁴ A Ɩsɩrayɛl yiir'ɩ a mãa ʋ Íre bɛr ɛ́ mɛ yir-vɩɛlɩ vɩɛlɩ. Zuda ʋl a, tẽ-bɛrɛ bɛ na gù vla a n'a ʋ mɛ paalɩ a ziir za. Ɛcɛ ɩ̃ na ƴãw nɩ vũu a ʋ tẽ-bɛrɛ, a vũu na dɩ n a bɛ yir-vɩɛlɩ vɩɛlɩ.»