A naaŋmɩn-ƴèr-manɛ Oze sɛbɛ 5 - A SƐB-SÕW

A Ɩsɩrayɛl nɩbɛ niw-dierbɛ bɛ wule a nɩbɛ vla ɩ

¹ «A Nyɩɩm bàwr-maalbɛ, nyɩ bɛr wõ a yel ŋa! Ɩsɩrayɛl yir niw-dierbɛ ɛ, nyɩ cɛlɛ be! Nãà yir nɩbɛ ɛ, nyɩ ƴãw tobr! Nyɩmɛ nɛbɛ tɩ sɛw kɛ́ nyɩ mɩ́ dɩ a ƴɛ̀rʋ. Ɛcɛ nyɩ lɩɛb'ɩ bɛra a ɩ̃ nɩbɛ ƴãw a Misɩpa tẽw, nyɩ lɩɛb'ɩ mɩ̃ɛ bɛ na 'lẽ a ɩ̃ nɩbɛ ƴãw, a Tabɔɔr tãw zu a.

² Nyɩ tuw nɩ a Sitim tãw zu bɔw ʋ lɛb bãw zulme, ɛcɛ mãa a, a Sore n'ʋ yere, ɩ̃ na wul'ɩ nyɩ za yã.»

³ «A mãa a, ɩ̃ bãw nɩ a Efarayim ɛ́ a Ɩsɩrayɛl bɛ ɩ ɩ̃ sãan ɛ. Efarayim i, fʋ tõ n nɩ-fa-tome ɛ́ a fʋ ɩ-faar á ŋá mar a Ɩsɩrayɛl.»

⁴ A Ɩsɩrayɛl nɩbɛ ɩ-ɩrɩ kʋ̃ sàw bɛ lɛb wa a bɛ Naaŋmɩn zie ɩ. Bʋ̃ʋ n'ʋ vɛ̃, pɔw-yɛm ɩ-ɩrɩ yã be n a bɛ zie, ɛ́ bɛ bɛ bãw a Sore ɩ.

⁵ A Ɩsɩrayɛl nyʋ̀ʋ́r'a yere a ʋ sãwna. A Ɩsɩrayɛl nɩ a Efarayim ŋmɩɛr'ɩ gbɛ́ɛ a bɛ sãwna ƴãw. A Zuda mɩ̀ lãw nɩ bɛ na ŋmɩɛr a gbɛ́ɛ.

⁶ Bɛ waar'ɩ nɩ píir nɩ nĩi kɛ́ bɛ wa bɔ n a Sore, ɛ́ bɛ kʋ̃ nyɛ̃ ʋ ɛ, bʋ̃ʋ n'ʋ vɛ̃, ʋ taw na zãá nɩ bɛ.

⁷ Bɛ na dɔw zɩ̃-yir-biir a, bɛ zawr'ɩ a Sore bɛr. Ƴɛrɛŋa a, a cuw-paala na kʋ bɛ na pàw pɛr bɛlɛ nɩ a bɛ bʋ̃-tɛrɩ.

A Efarayim nɩ a Zuda zɛbr'ɩ taa

⁸ «Nyɩ pɛblɩ ɩɩl a Givea, nyɩ pɛblɩ wɩ́ɛ a Arama, nyɩ lɔb cɛl a Bɛtɩ-Awɛn. Bɛ̃zamɛ yir dɔwlʋ ʋ, gùre pùorí yoo!

⁹ A dɔwrʋ bibir a, a Efarayim na lɩɛb'ɩ debuo. À à ŋá ɩ̃ na yere a Ɩsɩrayɛl yie dɔwlʋ ƴãw a na tu na, bʋnʋ bɛ ka be ɩ.

¹⁰ A Zuda niw-dierbɛ ɩ na mɛ̃ a bɛlɩ dem na lɩɛbɛ a tʋr-bɔwrɩ a. A ɩ̃ su-yãyaar na ìr'ɩ yaga yaga a bɛ ƴãw.

¹¹ A Efarayim na tu a bʋ̃-zawlɛ pùor a, dɔwrʋ lo n a ʋ zu, bɛ na dɩ n a ƴɛ̀rʋ dĩ nɩ ʋ.

¹² Ɛ́ mãa a, ɩ̃ na ɩ na mɛ̃ zu-kpalɛ bàalʋ a, a Efarayim ƴãw, ɛ́ a Zuda yir nɩbɛ ƴãw, ɩ̃ ɩ mɛ̃ nasɩɩr bàalʋ a.

¹³ A Efarayim nyɛ̃ nɩ a ʋ bàalʋ, ɛ́ a Zuda nyɛ̃ a ʋ gbõtor. Efarayim cen nɩ a Asuur zie, ʋ tõ n nɩbɛ a na-kpɛ̃ɛ zie. Ɛcɛ, a nãà ŋa kʋ̃ tʋ̃ɔ́ sanɩ nyɩ ɛ, ʋ kʋ̃ tʋ̃ɔ́ ɩ a nyɩ gbõtor ɓãá ɩ, Efarayim yir dem i!

¹⁴ Bʋ̃ʋ n'ʋ vɛ̃, a mãa Sore, ɩ̃ na ɩ na mɛ̃ gbẽw a, a Efarayim ƴãw, ɩ̃ na ɩ na mɛ̃ gbẽw-pɔl a, a Zuda yir nɩbɛ ƴãw, mãa n'ʋ, mãa n'ʋ na taw a ɩ̃ bʋ̃-nyɔwra cɩɛrɩ, ɛ́ cab ʋ nʋɔrɩ́ cere nɩ ɛ́ nɩr kʋ̃ tʋ̃ɔ́ faa ʋ ɛ.»

A Naaŋmɩn gùr'ɩ pùor cɔw a ʋ nɩbɛ

¹⁵ «A Sore yere na: Ɩ̃ na tɔlɛ na cere, ɩ̃ na lɛb'a cen a ɩ̃ beba zie, ɛ́ gù bɛ wa tɩ sàw kɛ́ bɛ sãw na, ɛ́ bɔbr a ɩ̃ niwn. A bɛ kpɩɛrʋ pʋɔ a, bɛ na ìr'a bɔbr mɛ̃.»