A naaŋmɩn-ƴèr-manɛ Oze sɛbɛ 14 - A SƐB-SÕW

A ƖSƖRAYƐL LƐB'A WA A SORE ZIE 14

¹ A Samaari tẽw dem na ya n a san, bɛ na gaarɩ zawrɩ a bɛ Naaŋmɩn bɛr a ƴãw. Zɛbr-sɔ-kpɛ̃ɛ na kʋ bɛ na, bɛ na nɛb'ɩ a bɛ bi-pɩɩlɛ kʋ, ɛ́ wɛr a bɛ pɔw-pée.

A Ɩsɩrayɛl lɛb'a wa a ʋ Sore zie

² Ɩsɩrayɛl i, lɛb wa a Sore fʋ Naaŋmɩn zie. Bʋ̃ʋ n'ʋ vɛ̃, a fʋ sãwna n'a ɩ fʋ ŋmɛ gbɛ́r lo.

³ Nyɩ tɛr ƴɛ̀r-bie á ŋá taabɛ lɛb wa n a Sore zie: «Fʋ mɩ́ de nɩ sãwna za bɛr a baarɩ, sàw de a bom nɛ na vɩɛl a. A tɩ nʋɔr ƴɛ̀rʋ n'a tɩ na de maal'ɩ bàwr kʋ̀ b, nadeli bɛ n'a ɩ.

⁴ A Asiiri kʋ̃ tʋ̃ɔ́ faa tɩ ɛ, tɩ kʋ̃ do zɔm wur zɛbr ƴãw ɛ, ɛ́ tɩ kʋ̃ lɛb yel a tɩ nuru bʋ̃-maala, k'ʋʋ ɩ n tɩ Naaŋmɩn ɛ. Bʋ̃ʋ n'ʋ vɛ̃, fʋ̃ʋ yõ n'ʋ mɩ́ zɔ a bi-kpieb nɩbaalʋ.»

⁵ À ŋá n'a a Sore yere: «A Ɩsɩrayɛl na zawrɩ mɛ̃ bɛr a, ɩ̃ na sanɩ nɩ a ʋ sãwna ŋa, ɩ̃ na nɔnɛ ʋ na bɛ dɩ vuo ɩ, a ɩ̃ suur kʋ̃ cãà ìr a ʋ ƴãw ɛ.

⁶ A Ɩsɩrayɛl zie a, ɩ̃ na ɩ na mɛ̃ ɓɩɛlʋ a, ʋ na pu na mɛ̃ mɔ̃-puuru kãw bɛ na bʋɔlɛ lisɩ a, ʋ na tɛ n nyɩgɛ mɛ̃ Libã tẽw tuw tɩɩr a.

⁷ A ʋ wuli na vore na cere, ʋ na vɩɛl'a nyɩwrɛ mɛ̃ olivʋ tɩɛ a, ɛ́ nyùur mɛ̃ Libã tẽw parfɛ̃ a.

⁸ A nɩbɛ na tɩ kpɩɛr a ʋ ɓaarʋ́ a na lɛb'a wa. Bɛ na lɛb'a kʋ́ɔr ble, bɛ na mɩ́ pu na mɛ̃ divɛ̃ tɩɩr púo a, bɛ na tɛr'ɩ yúor mɛ̃ Libã tẽw divɛ̃ a.

⁹ Efarayim i, bʋ̃ʋ n'ʋ mãa nɩ a tɩbɛ lãw? Mãa n'ʋ mɩ́ sɔw a fʋ puoru, ɛ́ kaarɛ a fʋ zie. A mãa a, ɩ̃ ɩ na mɛ̃ sɩpɩrɛ tɩɛ a váar na bɛ suore a. Mãa zie n'a a fʋ kukur bome yire.»

¹⁰ Ãa n'ʋ ɩ yã-bãwnɛ sɩza na bãw a yele á ŋá pɛr? Ãa n'ʋ tɛr yã a sɛw a bãwfʋ ƴãw? Sɩza n'a, a Sore sɛ́ɛ ɩ n dẽdẽ, nɩ-mɩn nɛbɛ cere a sɛ́ɛ á ŋá zu, ɛcɛ a nɩ-gaarɩ mɩ́ ŋmɩɛr'ɩ gbɛ́ɛ a zu.