A naaŋmɩn-ƴèr-manɛ Oze sɛbɛ 10 - A SƐB-SÕW

A Sore sãwnɛ nɩ a Ɩsɩrayɛl tɩbɛ bɛrɛ

¹ Divɛ̃ tɩɩr púo na vɩɛl, ɛ́ a tɩɩr wɔnɛ yaga a tɩ n'ɩ a Ɩsɩrayɛl. Ɛcɛ a lɛ a tɩɩr na tɩ wɔnɛ yaga a, lɛ n'a ʋ mɩ̀ tɩ mɩɛr a bàwr-maal-kube dɔwlɛ cere nɩ, lɛ n'a ʋ mɩ̀ tɩ wobr a kʋsɛbɛ tele nɩ pɔ̀lʋ.

² Nɩsaal-libelibe nɛbɛ. Ƴɛrɛŋa a, bɛ na nyɛ̃ nɩ dɔwrʋ yáa a san. A Sore tɔr za n'ʋ na ŋmɛ a bɛ bàwr-maal-kube lɔb, ɛ́ ŋmɛr a kʋsɛbɛ bɛ na wob teli a bɛr.

³ Ƴɛrɛŋa bɛ yere na: «Tɩ bɛ cãà tɛr nãà ɩ, tɩ na bɛ ƴãwnɛ a Sore a ƴãw. Ɛcɛ a nãà yel-ɩra pãa nɔ̃w n'ɩ bo a tɩ zie a?»

⁴ Ƴɛ̀rʋ ƴɛ̀rɛ na, pɔ-ziri pɔrɛ, wõ-taa nɛ́ɛ bine. Ɛcɛ a bɛ zie a, a yel-na-tu-sɔr-a ɩ na mɛ̃ mɔ̃-tuo na búle púo pʋɔ a.

⁵ Dɛ̃bɩ̃ɛ nyɔw nɩ a Samaari tẽw dem a Bɛtɩ-Awɛn tẽw nadele ƴãw, bɛ màwr bɛ za. Bʋ̃ʋ n'ʋ vɛ̃, a ʋ nɩbɛ nɩ a ʋ bàwr-maalbɛ maalɛ nɩ ko-kpɛ̃ɛ a ʋ ƴãw. Ƴɛrɛŋa bɛ na nyɔw ʋ cen nɩ zi-zãána a, bɛ na tʋ̃ɔ́ na cáarɛ a ʋ yúor na tɩ yi a.

⁶ Bɛ mɩ̀ na nyɔw nɩ a nadele cen nɩ Asiiri, tɩ kʋ̀ a na-kpɛ̃ɛ, lɛ n'a a Efarayim na nyɛ̃ vĩ, ɛ́ a kpɛ a Ɩsɩrayɛl, ʋ na lãw nɩ a nɩbɛ bɛ ŋa a.

⁷ A Samaari tẽw yele baar'a, a ʋ nãà ɩ na mɛ̃ dà-ŋmale na duwre kʋ̃ɔ zu a.

⁸ Bɛ sãw nɩ a bɛ maalʋ-ziir za bɛr. Alɛ tɩ n'ɩ a Ɩsɩrayɛl yel-bier. Karnyã nɩ gʋʋr na bul'a do a bàwr-maal-kube zu. Lɛ n'a bɛ na yel a tan: «Nyɩ pàw tɩ!», ɛ́ yel a tãli: «Nyɩ lo gùri pàw tɩ!»

A bom nɛ a Ɩsɩrayɛl na bʋ̀r a, ʋlɛ n'ʋ ʋ na cɛ̀

⁹ A Givea tẽw yele daar za n'a a Ɩsɩrayɛl maalɩ a yel-bier. Ʋ bɛ lɩɛbɩ a ʋ ɩb ɛ! Lɛ so, a Givea tɛɛ za bɛ n'a a sɛw k'aa zɛbr ta a nɩ-kʋrbɛ bɛ ŋa ɩ?

¹⁰ Ɩ̃ na dɔwrɩ bɛ na, bɛ na tu a bɛ ɩ-faar ayi a ƴãw. A nɩ-bʋʋr-yoru na wõ n taa a bɛ ƴãw.

¹¹ A Efarayim tɩ ɩ na mɛ̃ náab bɛ na pɔwlɩ ʋ nɔnɛ a ble vab a: ɩ̃ na tɩ nyɛ̃ a ʋ nyũu ʋ ta a, ɩ̃ de nɩ a ni-kɔ-dàa dɔwlɩ a ʋ nyũu zu: Zuda buwr'ɩ a tẽw, ɛ́ Zakɔb tawr a kur-jajaa.

¹² Nyɩ bʋ̀rɛ a yel-mɩnʋ, ɛ́ nyɩ na cɛ̀ n a nɔ̃wfʋ. Nyɩ cɛ pire, ƴɛrɛŋa n'a a sɛw kɛ́ nyɩ bɔbr a Sore, ɛ́ gù ʋ wa tɩ ɩ a faafʋ ta nyɩ.

¹³ Nyɩ̀ kɔ n a po-tuolu ɛ́ cɛ̀ a faalʋ, nyɩ dɩ n ziri wɔm. «Ɩsɩrayɛl ɩ, fʋ ƴãw nɩ a fʋ tɩɛrʋ a fʋ fãw ƴãw, a fʋ soja-yaga yaga ƴãw.

¹⁴ Alɛ so zɛbr gɔmɛ ìre dúor a fʋ nɩ-bʋʋrɛ sɔgɔ, ɛ́ bɛ na sãw a fʋ tẽ-kpɛn kpɛn za bɛr. A na ɩ na mɛ̃ a nãà Salman na tɩ sãw a Bɛtɩ-Arvɛl tẽw bɛr a. A zɛbr ʋl pʋɔ a, ʋ tɩ kʋ n a mã mɩnɛ lãwnɩ a bɛ bibiir.

¹⁵ À ŋá n'a a Betɛl ɩ nyɩ, a nyɩ po-tuolu na bɛ tɛr manʋ a ƴãw. Zie wa vɩɛrɛ a, a Ɩsɩrayɛl nãà yele na baar'a.»