A naaŋmɩn-ƴèr-manɛ Oze sɛbɛ 1 - A SƐB-SÕW

A OZE KUL-TAA YELE 1—3

¹ Ƴɛ̀rʋ ŋa n'ʋ a Sore ƴɛ̀r kʋ̀ a Beeri bidɛb Oze. A Zuda tẽw na-mɩnɛ Ozɩasɩ, Yotam, Akaazɩ nɩ Ezekɩasɩ daar tɩ n'a, ɛ́ a Ɩsɩrayɛl tẽw, a tɩ ɩ a Zowasɩ bidɛb, Zerobowam, naalʋ daar.

A Sore ƴãw na a Oze kul pɔw-yɛm

² A ƴɛ̀rʋ a Sore na ƴãw a Oze ƴɛ̀r kʋ̀ a ʋ nɩ-bʋʋrɛ a tib zie n'ɩ a ka. A Sore tɩ yel'ɩ a Oze: «Cen tɩ de ŋmɩmɛ maalʋ-ziir pɔw-yɛm, dɔw nɩ ŋmɩmɛ maalʋ-ziir pɔw-yɛm bibiir. Bʋ̃ʋ n'ʋ vɛ̃, a tẽw nɩbɛ na zawrɩ a mãa Sore bɛr a, pɔw-yɛm ɩ-ɩrɩ tɛɛ za n'a bɛ ɩrɛ.»

³ Lɛ n'a a Oze tɩ cen tɩ de Divilayim pɔwyaa Gomɛɛr. Ʋ tɩ tɛr'ɩ pʋɔ dɔw dɛble kʋ̀ ʋ,

⁴ ɛ́ a Sore tɩ yel a Oze: «Por ʋ a yúor kɛ́ Izireyɛl, bʋ̃ʋ n'ʋ vɛ̃, ka nɩ blã a, ɩ̃ na wa n a Zeyi yir dem ƴãw, a nɩbɛ bɛ na kʋ a Izireyɛl a ƴãw. Ɩ̃ na ɩ na a Ɩsɩrayɛl yir naalʋ-dɩb nʋɔr kʋ.

⁵ A ʋlɩ bibir nɛ, ɩ̃ na ɩ n a Ɩsɩrayɛl kpɛnʋ baarɩ a Izireyɛl bà-fʋɔla pʋɔ.»

⁶ A Gomɛɛr tɩ lɛb'a tɛr pʋɔ dɔw powle, ɛ́ a Sore tɩ yel a Oze: «Por ʋ a yúor kɛ́ Lo-Uruhama, a pɛr lɛ kɛ́: Ɩ̃ bɛ nɔ̃w ʋ ɛ. Bʋ̃ʋ n'ʋ vɛ̃, ɩ̃ kʋ̃ lɛb wul a ɩ̃ nɔ̃wfʋ a Ɩsɩrayɛl yir nɩbɛ ɩ. Ɩ̃ kʋ̃ lɛb nɔ̃w bɛ towtow ɛ.

⁷ Ɛcɛ a Zuda yir nɩbɛ a, ɩ̃ na nɔnɛ bɛ na. A mãa Sore bɛ Naaŋmɩn, ɩ̃ na faa bɛ na, ɛ́ a bɛ faafʋ ƴãw a, ɩ̃ kʋ̃ tɛr tam nɩ zɛbr-sɔ-kpɛ̃ɛ yel-ɩra ɩ, ɩ̃ kʋ̃ tɛr zɛbr nɩ wie nɩ wi-zɔmnbɛ yel-ɩra ɩ.»

⁸ A Gomɛɛr tɩ kpɩr'ɩ a Lo-Uruhama, ɛ́ tɛr pʋɔ dɔw dɛble.

⁹ Ɛ́ a Sore tɩ yel a Oze: «Por ʋ a yúor kɛ́ Lo-Ami, a pɛr lɛ kɛ́: Bɛ-bɛ-ɩ-ɩ̃-nɩ-bʋʋrɛ-ɩ. Bʋ̃ʋ n'ʋ vɛ̃, a nyɩɩm Ɩsɩrayɛl nɩbɛ, nyɩ bɛ ɩ ɩ̃ nɩ-bʋʋrɛ ɩ, ɛ́ a nyɩ zie a, ɩ̃ bɛ be ɩ.»