A naaŋmɩn-ƴɛ̀r-manɛ Aaze sɛbɛ 1 - A SƐB-SÕW

A Ŋmɩn-yir-kpɛ̃ɛ lɛb-mɛb daar ta na

¹ A Daarisɩ naalʋ-dɩb yome ayi sob daar, a cuwr ayʋɔb sob bibir dãw-niwn sob, a Sore tɩ ƴɛ̀r'ɩ a ʋ ƴɛ̀r-manɛ Aze zie. Ʋ tɩ ƴãw na k'ʋʋ cen tɩ ƴɛ̀r a ʋ ƴɛ̀rʋ á ŋá kʋ̀ Saltɩɛl bidɛb, Zorobabɛl, na ɩ a na-kpɛ̃ɛ-lɩɛrɛ a Zuda tẽw a, nɩ a bàwr-maal-kara Zozue, na ɩ Yehosadakɩ bidɛb a.

^2-3 Ɛcɛ a Sore tɩ ƴãw na a ʋ ƴɛ̀r-manɛ Aze ƴɛ̀r a bɛ zie à ŋá: «À ŋá n'a a Sore, a kpɛnʋ-za-sob, yere: “A nɩbɛ bɛ ŋa yere na k'aa ɩ̃ yir-kpɛ̃ɛ lɛb-mɛb bɛ ta sɛr ɛ.

⁴ A sɛw na kɛ́ nyɩ kpɩɛr a nyɩ yir-vɩɛlɩ vɩɛlɩ, ɛ́ a ɩ̃ yir lo gã ʋ?

⁵ Ƴɛrɛŋa a, a mãa Sore, a Kpɛnʋ-za-sob, ɩ̃ yere na kɛ́ nyɩ tɩɛrɩ nyɛ̃ a lɛ a na ŋmɛ̃ nyɩ a.

⁶ Nyɩ bʋ̀r'ɩ yaga, ɛ́ wa cɛ blãlɛ. Nyɩ mɩ́ dɩ na, ɛ́ bɛ tɩw ɛ. Nyɩ mɩ́ nyũ na, ɛ́ bɛ sɛw ɛ. Nyɩ mɩ́ su n kparɩ, ɛ́ a nyɩ ƴã-gamɛ bɛ mɩ́ tʋl ɛ, ɛ́ a sã-ya-diere sã-ya libie mɩ́ baarɩ fɔ̃w, mɛ̃ wɛr-wɔ-puo pʋɔ n'a ʋ de ƴãw a!

⁷ A mãa Sore, a kpɛnʋ-za-sob, yere na kɛ́ nyɩ tɩɛrɩ nyɛ̃ a bom nɛ na ta nyɩ a.

⁸ Nyɩ do tãw zu tɩ bɔ dàar wa lɛb mɛ n a ɩ̃ yir-kpɛ̃ɛ, lɛ n'a a ɩ̃ pʋɔ na pɛlɩ, ɩ̃ɩ wul a ɩ̃ yúor-vɩɛlʋ-danʋ, a mãa Sore n'ʋ yere.

⁹ Nyɩ tɩ tɩɛrɛ na kɛ́ nyɩ na cɛ n yaga za, ɛ́ a wa ɩ pʋrɩlɛ. A pʋrɩ al nyɩ na kul'ɩ a, ɩ̃ pɛblɩ a na yaarɩ. Bʋnʋ ƴãw n'a? Ɩ̃ sowre nyɩ na, a mãa Sore Kpɛnʋ-za-sob. A ɩ̃ yir-kpɛ̃ɛ na lo gã, ɛ́ ŋa za mɩ́ su zu kaarɛ a ʋ yir zie a ƴãw n'a.

¹⁰ Alɛ n'a so sa-bir za bɛ lo ɩ, ɛ́ bom za bɛ bul ɛ.

¹¹ Ɩ̃ ɩ na a wɛr nyɔw a tẽw: a tan zu, a ble póru nɩ a divɛ̃ tɩɩr póru pʋɔ, a olivʋ tɩɩr póru nɩ a bʋ̃-kʋ́ɔrɩ a mɩnɛ póru pʋɔ. A nɩbɛ nɩ a dʋn wõ n tuo, ɛ́ a nyɩ tome za sãw.”»

¹² A Saltɩɛl bidɛb Zorobabɛl, nɩ a Yehosadakɩ bidɛb Zozue, na tɩ ɩ a bàwr-maal-kara a, nɩ a nɩbɛ na cɛ lɛb wa a, tɩ bɛr'a wõ a Sore bɛ Naaŋmɩn ƴɛ̀rʋ, ʋ na tɩ ƴãw a ʋ ƴɛ̀r-manɛ Aze ƴɛ̀r a. À à ŋá n'a a Aze tɩ tõ a ton a Sore na kʋ̀ ʋ a, ɛ́ a nɩbɛ tɩ zɔrɛ a Sore.

¹³ Al pùorí, a Sore nɩ-tona Aze tɩ yel'ɩ yel ŋa kʋ̀ a nɩbɛ: «Mãa n'ʋ yere kʋ̀rɛ nyɩ, a mãa Sore, ɩ̃ na be n a nyɩ zie.»

¹⁴ A Sore tɩ sɩ̃w nɩ a Saltɩɛl bidɛb, Zorobabɛl, na ɩ a na-kpɛ̃ɛ-lɩɛrɛ a Zuda tẽw a tɩɛrʋ, ɛ́ sɩ̃w a Yehosadakɩ bidɛb, Zozue, tɩɛrʋ, ʋl na ɩ a bàwr-maal-kara a, ɛ́ sɩ̃w a Naaŋmɩn nɩ-bʋʋrɛ bɛl na cɛ lɛb wa a tɩɛrʋ. Bɛ tɩ nyɔw nɩ a Sore kpɛnʋ-za-sob bɛ Naaŋmɩn, yir-kpɛ̃ɛ lɛb-mɛb tome

¹⁵ a ʋlɩ yũon nɛ, a cuwr ayʋɔb sob bibie lɩzɛr'ɩ anaar sob daar.