Galasi 5 - A SƐB-SÕW

Kɩrɩta-nɩr tʋɔra-sob yele

¹ A Kɩrɩta ír tɩ na bɛr a gbãgbaalʋ pʋɔ, kɛ́ tɩ sɩrɩ so tɩ tʋɔra. A na ɩ à ŋá a, nyɩ ƴãw fãw ta lɛb de a gbãgba-mie ɩ.

² Nyɩ nyɛ̃, a mãa Pol, ɩ̃ yere na kʋ̀rɛ nyɩ: nyɩmɛ wa ƴãw bɛ ŋma nyɩ a yɛɛ a, a Kɩrɩta kʋ̃ cãà tɛr yel-ɩra kãw za a nyɩ zie ɩ.

³ Ɩ̃ɩ lɛb'a maal yere kʋ̀rɛ nɩsaal za na ƴãw bɛ ŋmãa ʋ a yʋ̀ɔr a, k'aa fɛr'a k'ʋʋ sàwr a Wulu ʋ za.

⁴ Nyɩɩm na bɔbr k'aa Wulu ɩ nyɩ ɩ nɩ-mɩn a, a baar'a nyɩɩm nɩ a Kɩrɩta cara pʋɔ, ɛ́ nyɩ mɩ̀ kʋ̃ lɛb páw a Naaŋmɩn maalʋ ɛ.

⁵ Ɛcɛ a tɩɩm a, tɩ ƴãw nɩ a tɩ tɩɛrʋ a Naaŋmɩn ƴãw, ʋl na na ɩ tɩ ɩ nɩ-mɩn a ʋ niŋé a. A yel ŋa n'ʋ tɩ gùre nɩ a Vʋʋrʋ Sõw fãw, ʋl na tone a tɩ naaŋmɩn-sàw-deb pʋɔ a.

⁶ Bʋ̃ʋ n'ʋ vɛ̃, sob nɛ na lãw nɩ a Yeezu Kɩrɩta a, a yʋɔr-ŋmãafʋ bɩɩ a bɛ-ŋmãafʋ bɛ ɩ bom za ɩ, a bom'ɩ a naaŋmɩn-sàw-deb na tɛr nɔ̃wfʋ ɩ-ɩrɩ a.

⁷ Nyɩ tɩ tĩ na zɔrɛ vla za! Ãa n'ʋ wa piw nyɩ a sɔ́r, bɛ bɔbr kɛ́ nyɩ tuur a yel-mɩŋa?

⁸ À à ŋá bɛ na ƴɛ̀r nyɩ sàw a, a bɛ yi a Naaŋmɩn na bʋɔlɛ nyɩ a zie ɩ.

⁹ Mɛ̃ a lɛ bɛ na mɩ́ yel a: «Dãbɩl blã mɩ́ ɩ n a zɔ̃-bura za ír.»

¹⁰ Mãa a, a Sore ɩ na ɩ̃ bɛr tɩɛrʋ a nyɩ ƴãw: ɩ̃ bãwnɩ a na nyɩ na kʋ̃ tɩɛrɛ bʋ̃-yoru a. Ɛcɛ a sob nɛ na ƴãwnɛ a damnʋ a nyɩ pʋɔ a na páw nɩ dɔwrʋ, ʋlɛ saa ŋmɛ̃ ŋmɩŋmɩn a.

¹¹ Mãa ƴãw a, yɛbr i, mãa tɩ ɩ mɛ̃ ɩ̃ cãà na kanɛ k'aa fɛr'a kɛ́ bɛ mɩ́ ŋmãa a yʋ̀ɔr a, bʋ̃ʋ ƴãw n'a bɛ nãá cãà dɔwrɛ mɛ̃? A lɛ pʋɔ a, a Kɩrɩta da-gara zu kũu ƴɛ̀rʋ kʋ̃ʋ damnɛ nɩr za ɩ.

¹² A bɛlɩ dem na ƴãwnɛ a damnʋ a nyɩ pʋɔ a, bɛ nãá mɩ́ tɛr lɛɛɛ tɩ ír a bɛ lamɛ mɩ̀.

¹³ Yɛbr i, a nyɩɩm a, a tʋɔra-sob ƴãw n'a bɛ bʋɔlɩ nyɩ. Ɛcɛ nyɩ taa wa yel kɛ́ a tʋɔra-sob ŋa ƴãw ɛ́ tuur a nyɩ nɩsaal yel-bɔbrɩ na bɛ vɩɛl a ɩ. Nyɩ nɩ̃ɛ mɩ́ kaarɛ taa zie a nɔ̃wfʋ zũú.

¹⁴ Bʋ̃ʋ n'ʋ vɛ̃, a Naaŋmɩn wulu za zu n'ɩ: «Fʋ na nɔnɛ nɩ a fʋ tɔ sob mɛ̃ a fʋ mɩŋa a.»

¹⁵ Ɛcɛ, nyɩmɛ wa dʋnɛ taa ɛ́ vɔlɛ taa mɛ̃ wɛ-dʋ̃-faar a, nyɩ gù vla, nyɩ na baar'ɩ taa.

A Vʋʋrʋ Sõw yel-bɔbrɩ nɩ a nɩsaal yel-bɔbrɩ

¹⁶ A na ɩ à ŋá a, yel ŋa n'ʋ ɩ̃ bɔbr k'ɩ̃ɩ yel kʋ̀ nyɩ: nyɩ bɛr a nyɩ nyɔ-vʋʋrʋ kʋ̀ a Vʋʋrʋ Sõw ɛ́ nyɩ kʋ̃ ɩrɛ a lɛ a nyɩ nɩsaalʋ na bɔbr a ɩ.

¹⁷ Bʋ̃ʋ n'ʋ vɛ̃, a tɩ nɩsaalʋ yel-bɔbrɩ nɩ a Vʋʋrʋ Sõw dem bɛ lãw taa ɩ, ɛ́ a Vʋʋrʋ Sõw yel-bɔbrɩ nɩ a tɩ nɩsaalʋ dem mɩ̀ bɛ lãw taa ɩ, mɔb'a be a za ayi cara pʋɔ. Alɛ n'a so nyɩ bɛ tʋɔr ɩrɛ a lɛ nyɩ na bɔbr a ɩ.

¹⁸ A Vʋʋrʋ Sõw wa n'ʋ wule nyɩ a, a Moyiir wulu bɛ cãà fɛrɛ nyɩ ɛ.

¹⁹ A nɩsaalʋ tõ-toni sãá nɩ nyɩraalɛ, alɛ n'ɩ á ŋá: pɩ̃ɔ-yele, dɛwr, faalʋ,

²⁰ tɩbɛ maalʋ, sʋɔlʋ, dɔ̃, zɛb-taa, nyuur, suur, cier-taa, bɛ-wõ-taa, bʋ́r-taa,

²¹ nyɛ̃ a fʋ tɔ bom bɔbr, dãa kuolu, dɩ tɩ gãw nɩ taa, nɩ a yele á ŋá taabɛ. Nyɩ páw bãwnɩ a, mɛ̃ a lɛ ɩ̃ na tɩ dãw yel kʋ̀ nyɩ a, a bɛlɩ dem na tɛr a ɩ-ɩrɩ á ŋá taabɛ a kʋ̃ nyɛ̃ zie a Naaŋmɩn Naalʋ pʋɔ ɩ.

²² Ɛcɛ a Vʋʋrʋ Sõw bom'ɩ: nɔ̃wfʋ, nʋ̃ɔ̀, ƴã-ɓaarʋ, su-nyɔwra, vɩɛlʋ, nɩ-vla-ɩb, naaŋmɩn-sàw-deb,

²³ nɩsaal bàálʋ-ɩb, tʋɔra-nyɔwfʋ. A Moyiir wulu bɛ diwr a yele á ŋá taabɛ bɛrɛ ɩ.

²⁴ A bɛlɩ dem a Kɩrɩta na so a, bɛ kpa n a nɩsaalʋ a da-gara zu lãwnɩ a ʋ vʋla bʋʋrɛ na mɩ́ be a ʋ zie a, nɩ a ʋ yel-bɔbrɩ.

²⁵ A Vʋʋrʋ na n'ʋ so tɩ vʋʋrɛ a, tɩ mɩ̀ bɛr tɩ tʋɔra kʋ̀ ʋ.

²⁶ Tɩ ta mɩ́ pɔrɛ ɩ, a nɔhaarʋ nɩ a nyu-ɩb, a ta be a tɩ cara pʋɔ ɩ.