Galasi 3 - A SƐB-SÕW

A Naaŋmɩn wulu bɩɩ a naaŋmɩn-sàw-deb

¹ 'Woi Galasi tẽw dãbole bɛ ŋan i! Ãa n'ʋ ɩ a ʋ sɔ-ɩb nyɔw nɩ nyɩ? Nyɩɩm na wõ a Yeezu Kɩrɩta yele vla, a ɩ mɛ̃ a nyɩ mimié n'a bɛ kpa ʋ a da-gara zu a!

² Nyɩ caalɩ mɛ̃ niwn a yel ŋa tɛwr ƴãw: a Naaŋmɩn wulu sàwfʋ zũú n'a nyɩ páw a Vʋʋrʋ Sõw bɩɩ nyɩ na bɛr wõ ɛ́ sàw de a Yel-nʋ̃ɔ̀ a ƴãw n'a?

³ À ŋá n'a nyɩ bol sɛw ɩ? A yel nyɩ na tĩ nɩ a Naaŋmɩn Vʋʋrʋ a, ƴɛrɛŋa nyɩ bɔbr'a kɛ́ nyɩ baar'ʋ nɩ nyɩ mɩŋa fãw ʋ?

⁴ Zawlalɛ ƴãw n'a nyɩ bãw a yele sɛw à ŋá bɩɩ? A kʋ̃ tʋ̃ɔ́ ɩ zawlalɛ ɩ!

⁵ A Naaŋmɩn na kʋ̀rɛ nyɩ a ʋ Vʋʋrʋ ɛ́ maalɛ a nɔ-ɓãa-yele a nyɩ sɔgɔ a, a Wulu sàwfʋ zũú n'a bɩɩ nyɩ na bɛr wõ ɛ́ sàw de a Yel-nʋ̃ɔ̀ a n'a so?

⁶ À ŋá n'a a tɩ ŋmɛ̃ a Abraham zie. Bʋ̃ʋ n'ʋ vɛ̃, a Sɛb-sõw yel'a: «A Abraham tɩ sàw na de a Naaŋmɩn, a Naaŋmɩn sàw k'ʋʋ ɩ n nɩ-mɩŋa, a ʋ naaŋmɩn-sàw-deb zũú.»

⁷ A na ɩ à ŋá a, nyɩ bãw vla: a bɛlɩ dem na sàw de a Naaŋmɩn a, bɛlɛ nɛbɛ sɩrɩ ɩ a Abraham bibiir.

⁸ A Sɛb-sõw na tɩ bãw kɛ́ Naaŋmɩn na ɩ n a nɩ-bʋʋr-yoru bɛ ɩ nɩ-mɩn a bɛ naaŋmɩn-sàw-deb zũú a, ʋ tɩ de nɩ niwn yel a yel-vla ŋa kʋ̀ a Abraham: «A nɩ-bʋʋrɛ za na páw nɩ maalʋ a fʋ zũú.»

⁹ A Abraham tɩ sàw na de ɛ́ páw a maalʋ. Lɛ mɩ̀ n'a a bɛlɩ dem na sàw de a, mɩ́ páw a maalʋ mɛ̃ a Abraham.

¹⁰ Ɛcɛ a bɛlɩ dem na ɩrɛ ƴãwn a Naaŋmɩn wulu sàwfʋ ƴãw tɛwr'a, ŋmɛ-ƴãw tuur bɛ na. Mɛ̃ a Sɛb-sõw taa yel à ŋá: «Sob nɛ za na bɛ tuur a al za na sɛb a Wulu sɛbɛ pʋɔ kʋralɛ a, ŋmɛ-ƴãw a páw ʋ!»

¹¹ A mɔ̃ mɩ̀ ɩ n cãà kɛ́ nɩr kʋ̃ tʋ̃ɔ́ ɩ nɩ-mɩŋa a Naaŋmɩn wulu sàwfʋ tɛwr zũú ɛ. Bʋ̃ʋ n'ʋ vɛ̃, bɛ sɛb'ɩ à ŋá: «Sob nɛ na ɩ nɩ-mɩŋa a sàw-deb zũú a, ʋ na vʋʋrɛ na.»

¹² Ɛcɛ a Naaŋmɩn wulu bɛ yi a naaŋmɩn-sàw-deb pʋɔ ɩ, bɛ nɩ̃ɛ na mɩ̀ cãà sɛb: «Sob nɛ na tuur a Wulu nɛ-ƴãwnɩ a, a na ɩ na ʋ vʋʋrɛ.»

¹³ A Kɩrɩta ya na ír tɩ bɛr a Naaŋmɩn wulu ŋmɛ-ƴãw pʋɔ, ʋl mɩŋa na lɩɛbɩ nɩ-ŋmɛ-ƴãwna a tɩ ƴãw a. Bʋ̃ʋ n'ʋ vɛ̃, a Sɛb-sõw yel'ɩ à ŋá: «Nɩr za na yawlɩ dàa zu a ɩ n nɩ-ŋmɛ-ƴãwna.»

¹⁴ À ŋá n'a a ɩ, k'aa maalʋ a Naaŋmɩn na yel k'ʋʋ na kʋ̀ n a Abraham a, mɩ̀ ta a nɩ-bʋʋr-yoru a Yeezu Kɩrɩta ƴãw, ɛ́ a sàw-deb zũú, tɩ za páw a Vʋʋrʋ a Naaŋmɩn na yel k'ʋʋ na tɩr'a a.

A Naaŋmɩn wulu nɩ a maalʋ a Naaŋmɩn na yel k'ʋʋ na tɩr'a a

¹⁵ Yɛbr i, ɩ̃ na de nɩ manʋ a nɩsaalbɛ ɩ-ɩrɩ pʋɔ: nɩr na maalɩ a ʋ kũu daar pʋ-tɩɛrʋ sɛbɛ mɛ̃ a lɛ a na tu sɔ́r a, nɩr kʋ̃ tʋ̃ɔ́ sãw a sɛbɛ ŋa bɛr bɩɩ ƴãw bom dɔwlɩ ɛ.

¹⁶ Ɛcɛ, a Abraham nɩ a ʋ bʋ̃-dɔwra nɛbɛ a Naaŋmɩn tɩ ƴãw a ʋ maalʋ nɛ́ɛ kʋ̀. A Sɛb-sõw bɛ yel kɛ́ nɩ a ʋ bʋ̃-dɔwrɩ ɛ, mɛ̃ nɩ-yaga nɛbɛ bɛ yere a ɩ, ʋ yel'a kɛ́: «Nɩ a fʋ bʋ̃-dɔwra», a wul kɛ́ nɩ-been yõ n'ʋ bɛ yere, a Kɩrɩta.

¹⁷ À ŋá n'a ɩ̃ bɔbr k'ɩ̃ɩ yel: Naaŋmɩn tɩ de nɩ niwn maalɩ Wõ-taa ɛ́ yel k'ʋʋ na maal'a tɛr ʋ. A Naaŋmɩn wulu na wa wa yome kɔbr anaar dɔwlɩ lɩzɛr'ɩ pie (430) pùorí a kʋ̃ tʋ̃ɔ́ sãw a wõ-taa bɛr ɛ́ ír a maalʋ nʋɔr a Naaŋmɩn na ƴãw a bɛr ɛ.

¹⁸ Ɛcɛ, a gbã-dɩ-bom páwfʋ wa yi a Naaŋmɩn wulu sàwfʋ zie a, a bɛ cãà ɩ nʋɔr Naaŋmɩn na ƴãw a zũú n'a ɩ, ɛcɛ nʋɔr Naaŋmɩn na ƴãw a zũú n'a ʋ kʋ̀ a ʋ maalʋ a Abraham.

¹⁹ A na ɩ à ŋá a, a Naaŋmɩn wulu yel-ɩra tɩ n'ɩ bo? Bɛ ƴãw ʋ na dɔwlɩ k'ʋʋ tʋ̃ɔ́ mɩ́ wul a nʋɔr-zawrʋ ɩ-ɩrɩ a sãá, gùre nɩ a Abraham bʋ̃-dɔwra ʋl bɛ na ƴãw a maalʋ nʋɔr kʋ̀ a. Malkɩ mɩnɛ nɛbɛ tu lɔ̃lʋɔrɛ ƴãw a Wulu ŋa.

²⁰ Ɛcɛ lɔ̃lʋɔrɛ bɛ dãw lɔ̃ nɩ-been yele ɩ. Ɛ́ a yele càar'ɩ Naaŋmɩn yõ.

A Naaŋmɩn wulu pɛr

²¹ A pãa ɩ lɛ a Wulu diwr a maalʋ nɛ́ɛ a Naaŋmɩn na ƴãw a bɛrɛ bɩɩ? Lɛ bɛ n'a towtow ɛ! Alɛ tɩ ɩ mɛ̃ bɛ tɩr'ɩ wulu kãw na na kʋ̀ a nɩsaalbɛ a nyɔ-vʋʋrʋ a, wulu sàwfʋ pʋɔ sɩrɩ n'a a nɩsaal nãá mɩ́ ɩ nɩ-mɩŋa a Naaŋmɩn niŋé.

²² Ɛcɛ a Sɛb-sõw yel a k'aa yel-bier fãw so nɩ a tẽ-daa za, k'aa maalʋ a Naaŋmɩn na yel k'ʋʋ na tɩr'a a, tʋ̃ɔ́ ta a bɛlɩ dem na sàw de a, bɛ na sàw de a Yeezu Kɩrɩta a zũú.

²³ A naaŋmɩn-sàw-deb na bɛ tɩ wa sɛr a, a Naaŋmɩn wulu tɩ tɛr tɩ nɩ a ʋ gaso pʋɔ gùre nɩ a naaŋmɩn-sàw-deb bɛ nãà wa wul ʋ sãá a.

²⁴ A na ɩ à ŋá a, a Naaŋmɩn wulu n'ʋ tɩ piwre tɩ, tɩ ta n a Kɩrɩta waa daar, kɛ́ tɩ ɩ nɩ-mɩn a Naaŋmɩn niŋé, a naaŋmɩn-sàw-deb ƴãw.

²⁵ Ɛcɛ a naaŋmɩn-sàw-deb na wa wa baar'a, a sob nɛ na tɩ piwre tɩ a bɛ cãà so tɩ ɛ.

²⁶ Bʋ̃ʋ n'ʋ vɛ̃, nyɩ za ɩ n Naaŋmɩn bibiir, a naaŋmɩn-sàw-deb na ɩ nyɩ lãw nɩ a Yeezu Kɩrɩta a ƴãw.

²⁷ Nyɩ za na sɩrɩ lãw nɩ a Kɩrɩta a suob deb pʋɔ a, nyɩ su n a Kɩrɩta.

²⁸ Nyɩ za lãw nɩ nɩ a Kɩrɩta ɩ nɩ-been. A na ɩ lɛ a, Zifʋ nɩ nɩ-bʋʋr-yoru yele bɛ cãà be ɩ, gbãgbaa nɩ nɩr na so ʋ tʋɔra a yele bɛ cãà be ɩ, dɛb nɩ pɔw yele bɛ cãà be ɩ.

²⁹ Ɛ́ a Kɩrɩta wa so nyɩ a, nyɩ ɩ n a Abraham bʋ̃-dɔwrɩ, ɛ́ nyɩ na páw nɩ a gbã-dɩ-bom a Naaŋmɩn na yel k'ʋʋ na tɩr'a a.