Galasi 2 - A SƐB-SÕW

A Pol na cen a Zerizalɛm tɩ nyɛ̃ a nɩ-toni a

¹ Yome pie nɩ anaar pùorí, ɩ̃ tɩ lɛb'a cen a Zerizalɛm, mãa nɩ Banabasɩ. Ɩ̃ mɩ̀ tɩ tɛr'ɩ Títɩ̀ ƴãw pʋɔ.

² Yel-wula Naaŋmɩn na ɩ ɩ̃ bãw a n'a so ɩ̃ tɩ do. Ɩ̃ tɩ man nɩ a Yel-nʋ̃ɔ̀ ɩ̃ na hiere a nɩ-bʋʋr-yoru sɔgɔ a kʋ̀ a kɩrɩta-nɩbɛ, al pùorí, ɩ̃ man ʋ kʋ̀ a nɩ-bɛrɛ, bɛ tɛwr zie. Ɩ̃ bɛ tɩ bɔbr k'aa tome ɩ̃ na tõ ɛ́ cãà tone a ɩ zawla ɩ.

³ Ɛcɛ a Títɩ̀ na bɩɛlɛ mɛ̃, ɛ́ ɩ Gɩrɛkɩ a, bɛ bɛ tɩ fɛr ʋ k'ʋʋ ɩ bɛ ŋmãa a ʋ yʋ̀ɔr ɛ,

⁴ yɛb-bɛlɛbɛlɛ bɛ mɩnɛ kãw na saa tɩ kpɛ jɛr a tɩ pʋɔ, ɛ́ bɔbr kɛ́ bɛ ŋmãa ʋ a yʋ̀ɔr a. A nɩbɛ bɛ ŋa tɩ sɔwl'a kpɛ a tɩ pʋɔ, kɛ́ bɛ piwre a só-tɩ-tʋɔra tɩ na páw a Yeezu Kɩrɩta zie a, ɛ́ lɛb tɛr tɩ tɩ ƴãw a Naaŋmɩn wulu sàwfʋ gbãgbaalʋ pʋɔ.

⁵ Tɩ bɛ tɩ sàw kʋ̀ a nɩbɛ bɛ ŋa ɛ́ a ɩ zaa pʋrɩ ɛ, k'aa Yel-nʋ̃ɔ̀ yel-mɩŋa cãà be be a nyɩ ƴãw.

⁶ Ɛcɛ a nɩ-bɛrɛ ƴãw a, — bɛlɩ nɩbɛ nɛ bʋʋrɛ bɛ na tɩ ɩ a lɛn daar a, ɩ̃ bɛ cɛlɛ a ɩ, bʋ̃ʋ n'ʋ vɛ̃, Naaŋmɩn bɛ jɩ́rɛ nɩr niwn ɛ — a nɩ-bɛrɛ bɛ ŋa bɛ tɩ ƴãw mɛ̃ fɛrʋ kãw dɔwlɩ ɛ.

⁷ Bɛ nɩ̃ɛ na tɩ nyɛ̃ k'aa Naaŋmɩn kʋ̀ m'ɩ a Yel-nʋ̃ɔ̀ hieru ton a bɛl na bɛ ɩ Zifʋ a ƴãw, mɛ̃ a lɛn tɔr za ʋ na tɩ kʋ̀ a Yel-nʋ̃ɔ̀ hieru ton a Pɩɛr a Zifʋ mɩnɛ ƴãw a.

⁸ Bʋ̃ʋ n'ʋ vɛ̃, a Naaŋmɩn na ƴãw a Pɩɛr ʋ ɩ a nɩ-tona a Zifʋ mɩnɛ zie a, lɛ mɩ̀ n'a ʋ ƴãw ɩ̃ ɩ a nɩ-tona a nɩ-bʋʋr-yoru zie.

⁹ Zakɩ, Pɩɛr, nɩ Zã, bɛl a nɩbɛ na tɩ nyɛ̃ bɛ ɩ mɛ̃ a Lãw-yir kpule a, tɩ nyɔw tɩ nɩ nũú puori, mãa nɩ a Banabasɩ, a wul kɛ́ tɩɩm nɩ bɛl lãw nɩ taa. À ŋá n'a tɩ za lãw wõ taa, kɛ́ tɩɩm na cen nɩ a nɩ-bʋʋr-yoru zie, ɛ́ bɛl cen a Zifʋ mɩnɛ zie.

¹⁰ A bɛ zɛlʋ tɛwr tɩ n'ɩ kɛ́ tɩ tɛr a Zerizalɛm Lãw-yir nan dem tɩɛrʋ, ɛ́ lɛn tɔr za n'a ɩ̃ ƴãw fãw ɩ.

A Pol yere nɩ a Pɩɛr Ãtɩɔsɩ

¹¹ Ɛcɛ, a Pɩɛr na tɩ wa a Ãtɩɔsɩ a, ɩ̃ tɩ zɛb'ɩ ʋ nɩ cãàmɩlɛ, ʋ na tɩ sãw a ƴãw.

¹² Bʋ̃ʋ n'ʋ vɛ̃, a nɩbɛ a Zakɩ na tɩ tõ a na bɛ tɩ ta sɛr a, a Pɩɛr mɩ́ tɩ lãw na dɩrɛ nɩ a kɩrɩta-nɩbɛ bɛl na bɛ ɩ a Zifʋ mɩnɛ a. Ɛcɛ bɛ na wa ta baar'a, ʋ taw na yi pùor bɛ cãà lãwnɛ nɩ bɛ ɩ. A bɛl na tu a yʋɔr-ŋmãafʋ pùor a dɛ̃bɩ̃ɛ n'a ʋ tɩ zɔrɛ.

¹³ A Zifʋ ŋmãa bɛl na cɛ a, mɩ̀ na tɩ ɩrɛ a lɛ a Pɩɛr na ɩ a, a Banabasɩ tɔr za mɩ̀ tɩ bɛr'ɩ a bɛ nɩsaal-libelibe ɩb á ŋá bɛlɩ nyɔw ʋ, ʋ mɩ̀ ɩrɛ mɛ̃ a bɛl a.

¹⁴ Ɛcɛ ɩ̃ na wa nyɛ̃ k'aa bɛ ɩb bɛ tori tu a Yel-nʋ̃ɔ̀ yel-mɩŋa a, ɩ̃ yel'ɩ a Pɩɛr a nɩbɛ za niŋé: «Fʋ̃ʋ na ɩ Zifʋ a, fʋ bɛ ɩrɛ mɛ̃ Zifʋ a ɩ, ɛ́ ɩrɛ mɛ̃ nɩ-bʋʋr-yoru nɩr a, ŋmɩŋmɩn za n'a, fʋ na tʋ̃ɔ́ fɛr nɩ-bʋʋr-yoru nɩbɛ ƴãw bɛ ɩrɛ mɛ̃ Zifʋ mɩnɛ a?»

A Zifʋ mɩnɛ nɩ a nɩ-bʋʋr-yoru páw nɩ a faafʋ

¹⁵ A tɩɩm a, tɩ dɔw na ɩ Zifʋ mɩnɛ, tɩ bɛ yi nɩ-bʋʋr-yoru pʋɔ ɩ, bɛl na bɛ bãw a Naaŋmɩn wulu a.

¹⁶ Ɛcɛ, tɩ bãwnɩ a na a nɩsaal na bɛ mɩ́ ɩ nɩ-mɩŋa a Naaŋmɩn niŋé a Moyiir wulu sàwfʋ ɩ-ɩrɩ zũú a, a Yeezu Kɩrɩta sàw-deb tɛwr zũú mɩ́ n'a. A tɩɩm a, tɩ sàw na de a Yeezu Kɩrɩta kɛ́ tɩ tʋ̃ɔ́ páw a mɩnʋ a Kɩrɩta sàw-deb zũú, ɛ́ a ta ɩ Wulu sàwfʋ ɩ-ɩrɩ ƴãw n'a ɩ. Bʋ̃ʋ n'ʋ vɛ̃, nɩr za bɛ be na ɩ nɩ-mɩŋa a Wulu sàwfʋ ɩ-ɩrɩ zũú ɛ.

¹⁷ Ɛcɛ tɩɩm na bɔbr kɛ́ tɩ ɩ nɩ-mɩn a Kɩrɩta ƴãw a, tɩmɛ wa sãá ɩ yel-bebe dem mɩ̀ a, a wul'a k'aa Kɩrɩta tone nɩ yel-bier tome bɩɩ? Lɛ bɛ n'a towtow ɛ!

¹⁸ Bʋ̃ʋ n'ʋ vɛ̃, mãa wa lɛb de a Wulu ɩ̃ na zawrɩ bɛr a, mãa mɩŋa n'ʋ wul k'ɩ̃ɩ ɩ n nɔ-zawrɛ.

¹⁹ Bʋ̃ʋ n'ʋ vɛ̃, alɛ wa ɩ a Naaŋmɩn wulu ƴãw a, ɩ̃ kpi na, ɛ́ a ɩ̃ kũu yi a Naaŋmɩn wulu zie, k'ɩ̃ɩ tʋ̃ɔ́ vʋʋrɛ a Naaŋmɩn ƴãw. Bɛ kpa m'ɩ a da-gara zu lãwnɩ a Kɩrɩta.

²⁰ Ɩ̃ vʋʋrɛ na, ɛcɛ mãa bɛ cãà n'ʋ vʋʋrɛ ɩ, Kɩrɩta n'ʋ vʋʋrɛ a ɩ̃ pʋɔ. Bʋ̃ʋ n'ʋ so, a ɩ̃ nɩsaal nyɔ-vʋʋrʋ a ƴɛrɛŋa a, ɩ̃ vʋʋrɛ ʋ nɩ a Naaŋmɩn Bie sàw-deb pʋɔ, ʋl na nɔ̃w mɛ̃ ɛ́ de ʋ tʋɔra tɩr a ɩ̃ ƴãw a.

²¹ Ɩ̃ bɛ zawrɛ a Naaŋmɩn maalʋ bɛrɛ ɩ, bʋ̃ʋ n'ʋ vɛ̃, alɛ wa ɩ a Wulu sàwfʋ zũú n'a a nɩsaal mɩ́ páw a mɩnʋ a Naaŋmɩn niŋé a, a Kɩrɩta kpi n zawlalɛ.