Galasi 1 - A SƐB-SÕW

A yãanɩ puoru

¹ A mãa Pol na ɩ nɩ-tona, ɛ́ a bɛ ɩ nɩsaalbɛ nɛbɛ so, bɩɩ nɩsaal zie n'a a yi, ɛ́ ɩ a Yeezu Kɩrɩta zie nɩ a Naaŋmɩn Sãà, na ɩ a Yeezu Kɩrɩta ʋ lɛb yi a kũuni pʋɔ a zie n'a a,

² mãa nɩ a yɛbr za na be a ɩ̃ zie ka a, tɩmɛ nɛbɛ sɛbr a sɛbɛ ŋa kʋ̀rɛ a Galasi tẽw Lãw-yie:

³ a Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ maalʋ nɩ ƴã-ɓaarʋ.

⁴ A Kɩrɩta de nɩ ʋ tʋɔra tɩr a tɩ yel-bebe ƴãw, k'ʋʋ tʋ̃ɔ́ faa tɩ a dɩ̃a zie ŋa na bɛ vɩɛl a pʋɔ, mɛ̃ a lɛ a Naaŋmɩn tɩ Sãà na bɔbr a.

⁵ A Naaŋmɩn so yúor-vɩɛlʋ-danʋ yome yome za. Amɛn.

A Yel-nʋ̃ɔ̀ ɩ n been yõ tẽtẽ

⁶ Nʋɔr ɓãá mɛ̃ na, nyɩ na gùr pùor fɔ̃wlɛ kʋ̀ a Naaŋmɩn na bʋɔlɩ nyɩ a Kɩrɩta maalʋ zũú, ɛ́ tu Yel-nʋ̃ɔ̀ yũo pùor a.

⁷ A bɛ kaar mɛ̃ Yel-nʋ̃ɔ̀ kãw lɛb'a be be ɩ, ɛcɛ nɩbɛ bɛ mɩnɛ kãw nɛbɛ be be damnɛ nyɩ, ɛ́ bɔbr kɛ́ bɛ lɩɛbɩ a Kɩrɩta Yel-nʋ̃ɔ̀.

⁸ Ɛcɛ nɩr wa ɩ mɛ̃ ʋ manɛ nɩ Yel-nʋ̃ɔ̀ kʋ̀rɛ nyɩ, na bɛ ɩ a ʋl tɩ na manɩ kʋ̀ nyɩ a, tɩmɛ saa nɛbɛ bɩɩ malkɩ na yi salom zu a saa n'ʋ a, a Naaŋmɩn ŋmɛ-ƴãw, a tuur ʋ!

⁹ Tɩ tɩ dãw na yel kʋ̀ nyɩ, ɩ̃ɩ lɛb yere kʋ̀rɛ nyɩ a ƴɛrɛŋa: nɩr wa manɛ Yel-nʋ̃ɔ̀ kʋ̀rɛ nyɩ na bɛ ɩ a ʋl nyɩ na wõ a, a Naaŋmɩn ŋmɛ-ƴãw, a tuur ʋ!

¹⁰ A ƴɛrɛŋa a, nɩsaalbɛ nɛbɛ ɩ̃ bɔbr kɛ́ bɛ kpɛ m bɩɩ Naaŋmɩn n'ʋ? Nɩsaalbɛ nɛbɛ ɩ̃ bɔbr k'ɩ̃ɩ ɩrɛ nʋ̃ɔ̀ kpɩɛr bɩɩ? Mãa tɩ cãà ɩ mɛ̃ ɩ̃ bɔbr'a k'ɩ̃ɩ ɩrɛ nʋ̃ɔ̀ kpɩɛr a nɩsaalbɛ a, ɩ̃ kʋ̃ʋ ɩ a Kɩrɩta tõ-tone ɩ.

A Pol manɛ nɩ a lɛ ʋ na lɩɛbɩ a nɩ-tona a

¹¹ Yɛbr i, ɩ̃ yere na kʋ̀rɛ nyɩ, a Yel-nʋ̃ɔ̀ ɩ̃ na manɩ kʋ̀ nyɩ a bɛ yi nɩsaal zie ɩ.

¹² Ɩ̃ mɩ̀ bɛ páw ʋ nɩsaal zie ɩ, ɛ́ nɩsaal mɩ̀ bɛ n'ʋ zànɩ nɩ mɛ̃ ɩ̃ bãw ʋ ɛ, a Yeezu Kɩrɩta mɩŋa n'ʋ wul mɛ̃.

¹³ Nyɩ wõ na bɛ na manɩ a ɩ̃ ɩb, a lɛn daar ɩ̃ na tɩ cãà be a Zifʋ mɩnɛ puoru pʋɔ a: a lɛ ɩ̃ na tɩ dɔwrɛ a Naaŋmɩn Lãw-yir bɛ dɩ vuo, ɛ́ ƴãw fãw ɩrɛ k'ʋʋ lo a.

¹⁴ Ɩ̃ tɩ gãw nɩ a ɩ̃ yɛbr yaga zie na ɩ a ɩ̃ lãw-dɔw-taabɛ a, a Zifʋ mɩnɛ puoru yele pʋɔ. Ɩ̃ tɩ tʋlɛ na gãw bɛ a tɩ sãàkʋm-kore yele pʋɔ.

¹⁵ Ɛcɛ, a Naaŋmɩn na kaa ír mɛ̃ bʋɔlɩ mɛ̃ a ʋ maalʋ zũú a ʋ tome ƴãw, ɩ̃ɩ cãà a ɩ̃ mã pùorí a, ʋ na tɩ nyɛ̃ a sɛw

¹⁶ k'ʋʋ wul mɛ̃ a ʋ Bie ɩ̃ tʋ̃ɔ́ manɛ ʋ kʋ̀rɛ a nɩ-bʋʋr-yoru a, ɩ̃ bɛ tɩ sowri bom nɩsaal kãw za ɩ.

¹⁷ Ɩ̃ mɩ̀ bɛ tɩ do a Zerizalɛm a bɛl na tɩ de niwn ɩ nɩ-toni a ɩ̃ ƴãw a zie ɩ, ɛcɛ ɩ̃ tɩ ìr'ɩ daadaalɛ cen Arabi, a pùorí ɩ̃ lɛb wa Damasɩ.

¹⁸ Yome ata pùorí n'a ɩ̃ tɩ do a Zerizalɛm k'ɩ̃ɩ tɩ bãw a Pɩɛr, ɩ̃ɩ tɩ maal'ɩ bibie pie nɩ anũu a ʋ zie.

¹⁹ Ɩ̃ bɛ tɩ nyɛ̃ nɩ-tona kãw za ƴãw pʋɔ, ʋ bɛ ɩ a Sore yɛb Zakɩ ɛ.

²⁰ À à ŋá ɩ̃ na sɛbr nyɩ a ɩ n sɩza, Naaŋmɩn niŋé n'a ɩ̃ yere, ɩ̃ bɛ ŋmarɛ ziri ɛ.

²¹ Al pùorí ɩ̃ cen Siiri nɩ Silisi ten voru pʋɔ.

²² Ɛcɛ a Zude tẽw Kɩrɩta Lãw-yie nɩbɛ bɛ tɩ càarɩ bãw mɛ̃ ɩ.

²³ Wob tɛwr'a bɛ tɩ wõ bɛ yere kɛ́: «A sob nɛ na tɩ dãw dɔwrɛ tɩ a, a ƴɛrɛŋa a, ʋ manɛ nɩ a naaŋmɩn-sàw-deb ʋ na tɩ ɩrɛ k'ʋʋ lo a.»

²⁴ Ɛ́ bɛ tɩ danɛ nɩ a Naaŋmɩn a ɩ̃ ƴãw.