Filib 2 - A SƐB-SÕW

Nyɩ wone taa ɛ́ tɛr tʋɔra-siwru

¹ A na ɩ à ŋá a, nyɩmɛ wa sɩrɩ mɔwlɛ taa nyɩmɛ nɩ a Kɩrɩta na lãw taa a zũú a, nyɩmɛ wa kpaalɛ taa a nɔ̃wfʋ pʋɔ a, lãw-taa wa be be a Vʋʋrʋ Sõw pʋɔ a, nɔ̃wfʋ nɩ nɩbaal-zɔba wa be be a,

² nyɩɩm ɩ a ɩ̃ nʋ̃ɔ̀ paalɩ tɩ tɔ. Nyɩ ɩ a nyɩ socie lãw taa, a nyɩ nɔ̃wfʋ nɩ a nyɩ tɩɛrʋ, a ɩ been. Nyɩ bɔbr kɛ́ nyɩ lãw taa ɩ been.

³ Nyɩ ta ɩrɛ bom nɩ cier-taa yã bɔbr'ɩ yúor ɛ. Ɛcɛ, nyɩ ɩrɛ nɩ tʋɔra-siwru, ɛ́ mɩ́ sàw kɛ́ a nyɩ taabɛ zuo nyɩ na.

⁴ Ŋa za ta mɩ́ tɩɛrɛ ʋl yõ yele ɩ, ʋ mɩ̀ mɩ́ tɩɛrɛ a ʋ taabɛ yele.

⁵ Nyɩ ɩrɛ à à ŋá a nyɩ cara pʋɔ, mɛ̃ a lɛ bɛ na mɩ́ ɩrɛ bɛlɛ wa lãw nɩ a Yeezu Kɩrɩta a.

⁶ Ʋl na tɛr a naaŋmɩnʋ a pɛr-tib daar za a, ʋ bɛ tɩ fɩɩrɩ ʋlɛ nɩ a Naaŋmɩn sɛw-taa ŋa tɛr bɛ sàwr'ɩ ɛ.

⁷ Ʋ nɩ̃ɛ na tɩ yàalɩ ʋ tʋɔra, ɛ́ de tõ-tõ-bie ŋmɛ̃a, ŋmɛ̃ mɛ̃ nɩsaal a, ɛ́ a tɩ sãá a ʋ ŋmɛ̃a pʋɔ k'ʋʋ ɩ n nɩsaal.

⁸ Ʋ siwr'ɩ ʋ tʋɔra lɩɛbɩ nɔ-sàwrɛ tɩ kpi n, tɩ kpi n a da-gara zu kũu.

⁹ Al zũú n'a Naaŋmɩn zɛw ʋ yaga za, ɛ́ por ʋ yúor na yi zuo a yée za a,

¹⁰ kɛ́ a Yeezu yúor ƴãwfʋ ƴãw, bʋ̃-vʋʋrɩ za gbine dume a salom zu, a tẽw zu nɩ a tẽw pile,

¹¹ ɛ́ bɛ za sàw yere kɛ́ a Yeezu Kɩrɩta n'ɩ a Sore, a Naaŋmɩn sãà yúor-vɩɛlʋ-danʋ ƴãw.

A kɩrɩta-nɩbɛ tõ-nʋɔr a tẽ-daa zu

¹² A na ɩ à ŋá a, ɩ̃ nɩ-nɔnɩ i, nyɩɩm na sàwr a ɩ̃ nʋɔr kʋralɛ a, nyɩ cãà ɩrɛ a lɛ ɩ̃ na mɩ́ wa be a nyɩ sɔgɔ a, ɛ́ mɩ̀ ɩrɛ gãw lɛ a ƴɛrɛŋa ɩ̃ na bɛ ka be a. Nyɩ tɛr zɔba nɩ mawfʋ tone nɩ a nyɩ faafʋ tome.

¹³ Bʋ̃ʋ n'ʋ vɛ̃, Naaŋmɩn be n a nyɩ sɔgɔ tone, ʋlɛ n'ʋ mɩ́ ƴãw nyɩ bɔbr ɛ́ maalɛ bom nɛ na tu a ʋ pʋ-tɩɛrʋ a.

¹⁴ Bom nɛ za nyɩ na ɩrɛ a, nyɩ ta ɩrɛ zɛbr'ɩ bɩɩ ŋmɩɛr'ɩ nɔkpɛn ɛ,

¹⁵ lɛ n'a nyɩ kʋ̃ tɛr sãwna bɛ yere ɩ, ɛ́ vɩɛl ɩ Naaŋmɩn bibiir na bɛ tɛr faalʋ a, vʋʋrɛ nɩ a tẽ-daa zu nɩbɛ sɔgɔ na fa ɛ́ sãw bɛ za a, nyɩwrɛ a bɛ sɔgɔ mɛ̃ ŋmar-bie salom zu a,

¹⁶ nyɩɩm na tɛr a nyɔ-vʋʋrʋ ƴɛ̀rʋ a: à ŋá n'a nyɩ na zɛw a ɩ̃ yúor a Kɩrɩta waa bibir, bʋ̃ʋ n'ʋ vɛ̃, a ɩ̃ tome nɩ a ɩ̃ hanʋ kʋ̃ ɩ zawla ɩ.

¹⁷ Ɛ́ alɛ mɩ̀ saa na fɛr a ɩ̃ zɩ̃ɩ cir mɛ̃ de-kʋ̀b-bom, ƴãw pʋɔ a bàwr a nyɩ naaŋmɩn-sàw-deb na maalɛ kʋ̀rɛ a Naaŋmɩn a ƴãw a, ɩ̃ cɩlɛ na, ɛ́ cɩlɛ lãwnɩ a nyɩ za.

¹⁸ Lɛ mɩ̀ n'a, a nyɩɩm, nyɩ cɩlɛ, ɛ́ lãwnɩ mɛ̃ cɩlɛ.

A Timote nɩ Epafoditɩ yele

¹⁹ A Sore Yeezu wa sàw a, ɩ̃ tɩɛrɛ na kɛ́ ka nɩ blã blã a, ɩ̃ na tõ n a Timote a nyɩ zie, kɛ́ ʋlɛ wa lɛb wa n a nyɩ yele wa manɩ kʋ̀ m a, mãa mɩ̀ tʋ̃ɔ́ nyɛ̃ mɔwlʋ a pʋɔ.

²⁰ Alɛ bɛ ɩ a ʋl yõ a, ɩ̃ bɛ nyɛ̃ nɩr na tɩɛrɛ a nyɩ yele mɛ̃ a mãa a ɩ:

²¹ bɛ za tɩɛrɛ nɩ a bɛl tɛwr yele, ɛ́ bɛr a Yeezu Kɩrɩta dem.

²² Ɛcɛ, nyɩɩm tɛɛ za bãw nɩ lɛ a Timote na ŋmɛ̃ a: ʋ lãw nɩ mɛ̃ na tone a Yel-nʋ̃ɔ̀ hieru tome mɛ̃ bie na be ʋ sãà zie a.

²³ Ʋlɛ n'ʋ ɩ̃ tɩɛrɛ k'ɩ̃ɩ tõ a nyɩ zie, mãa dɛ wa nyɛ̃ a ɩ̃ yele tɛr niwn a.

²⁴ Mɔ̃ mɩ̀, ɩ̃ bãwnɩ a na, a Sore wa sàw a, ka nɩ blã a, ɩ̃ mɩŋa na wa n a nyɩ zie.

²⁵ Ɛcɛ, ɩ̃ nyɛ̃ na a sɛw k'ɩ̃ɩ lɛb bɛr a tɩ yɛb Epafoditɩ kʋ̀ nyɩ, ʋ ɩ n a ɩ̃ lãw-tõ-tɔ, ɛ́ lãw nɩ mɛ̃ a zɛbr pʋɔ, ʋl nyɩ na tɩ tɩr kʋ̀ m k'ʋʋ sõwne mɛ̃, a lɛn daar ɩ̃ na tɩ bɔbr ʋ a.

²⁶ Ʋ tɩ bɔbr'ɩ yaga za k'ʋʋ lɛb nyɛ̃ nyɩ za. Ʋ zɩnɛ na guur, nyɩ na wõ a ʋ bàalʋ a ƴãw.

²⁷ Sɩza n'a, ʋ tɩ ɩ n bàal cɛ blã na kpi. Ɛcɛ Naaŋmɩn zɔ n a ʋ nɩbaalʋ, ɛ́ a bɛ ɩ ʋl yõ n'ʋ ɛ, ʋ mɩ̀ zɔ n a ɩ̃ nɩbaalʋ, k'ɩ̃ɩ ta páw pʋ-sãwna dɔwlɩ pʋ-sãwna zu ɛ.

²⁸ Alɛ n'a so ɩ̃ páw lɛb bɛrɛ ʋ kʋ̀rɛ nyɩ, kɛ́ nyɩ tʋ̃ɔ́ nyɛ̃ ʋ cɩlɛ a ʋ ƴãw, ɛ́ a ɩ̃ pʋ-sãwna siwri blã.

²⁹ A na ɩ à ŋá a, nyɩ tuori nyɔw ʋ nɩ nʋ̃ɔ̀ a Sore ƴãw, ɛ́ nɔnɛ a nɩbɛ bɛ ŋa taabɛ,

³⁰ ʋ na tɩ cɛ blã na kpi a Kɩrɩta tome ƴãw a. Ʋ sàw nɩ a kũu, k'ʋʋ lɩɛrɩ nyɩ tõ a tome nyɩɩm mɩŋa nãá kʋ̃ʋ tʋ̃ɔ́ tõ a ɩ̃ ƴãw a.