Ɛsɩdɩrasɩ 9 - A SƐB-SÕW

A Zifʋ yaga kul'ɩ a nɩ-bʋʋr-yoru pɔwbɛ

¹ A yele á ŋá pùorí, a nɩ-bɛrɛ bɛ mɩnɛ tɩ wa na wa yel mɛ̃: «A Ɩsɩrayɛl nɩbɛ nɩ-zawlɛ, a bàwr-maalbɛ nɩ a levitɩ mɩnɛ, bɛ bɛ ow yi a tẽw dem pʋɔ ɩ. Bɛ cɔwr'ɩ a Kanãa tẽw dem, a Hititɩ mɩnɛ, a Perizitɩ mɩnɛ, a Zebi tẽw dem, a Amɔ̃ tẽw dem, a Mowab tẽw dem, a Eziptɩ tẽw dem nɩ a Amoritɩ mɩnɛ mɩnɛ ɩ-faar na bɛ maal'ɩ wob a.

² Bɛ de nɩ pɔwbɛ a bɛl mɩŋa nɩ a bɛ bibiir ƴãw a nɩ-bʋʋrɛ bɛ ŋa pʋɔ, ƴãw a Naaŋmɩn nɩ-bʋʋrɛ jɛr a tẽw nɩbɛ. A nɩ-bɛrɛ nɩ a nɩ-yée nɛbɛ tɩ de niwn maalɩ a yel-faa ŋa.»

³ Ɩ̃ na tɩ wõ a ƴɛ̀r-bie á ŋá a, ɩ̃ tɩ taw nɩ a ɩ̃ kpar-kpɛ̃ɛ nɩ a ɩ̃ kparɩ cɩɛrɩ, ɩ̃ taw nɩ a ɩ̃ zukɔbɛ nɩ a ɩ̃ tɩɛm kɔblʋ a mɩnɛ vɔ̃, ɛ́ dɛ bʋnɩ zɩ̃.

⁴ Ɩ̃ tɩ zɩ̃ n à à ŋá tɩ ta a zaanʋɔra bàwr maalʋ daar. Nɩ-yaga tɩ zɔrɛ nɩ a ƴɛ̀rʋ a Ɩsɩrayɛl Naaŋmɩn na na dɩ a yel-faa ŋa ƴãw, a Zifʋ bɛl na yi a diw-cenu zie wa a na maalɩ a. Bɛ tɩ ɓã n taa a ɩ̃ zie.

A Ɛsɩdɩrasɩ puore na kʋ̀rɛ a sãwna dem

⁵ A zaanʋɔra bàwr maalʋ daar, ɩ̃ tɩ bɛr'ɩ a ɩ̃ pʋ-sãwna. Ɩ̃ tɩ cãà na su a ɩ̃ kpar-kpɛ̃ɛ nɩ a ɩ̃ kparɩ na cɩɛrɩ cɩɛrɩ a. Ɩ̃ tɩ lo na gbĩ dume ɛ́ zɛw a ɩ̃ nuru cɔw a Sore ɩ̃ Naaŋmɩn,

⁶ ɛ́ puori ʋ à ŋá: «Ɩ̃ Naaŋmɩn i, vĩ bɛ na ɩrɛ mɛ̃ ɩ! Vĩ ɩrɛ mɛ̃ na tɩ zuo, ɩ̃ na na dʋɔ a zu jɩ́r'ɩ fʋ a, ɩ̃ Naaŋmɩn i. A tɩ yel-bebe yãwmɛ na do gãw a tɩ zuru bɛr, a tɩ sãwna do na tɩ tɔ a salom tɔr za.

⁷ A tɩ sãàkʋm-kore daar za wa tɩ tɔ a dɩ̃a bibir a, a tɩ nɩ-bʋʋrɛ maal'ɩ yel-bebe bɛ dɩ vuo ɩ. A al ƴãw n'a a tɩɩm, a tɩ na-mɩnɛ nɩ a tɩ bàwr-maalbɛ tɩ lo na-sãanbɛ nuru pʋɔ, tɩ bãw a zɛbr, a zi-yũo diw-cenu, a tɩ bʋ̃-tɛrɩ fáb nɩ a vĩ, mɛ̃ à à ŋá a na cãà ŋmɛ̃ tɩ a dɩ̃a a.

⁸ Ɛcɛ a ƴɛrɛŋa a, Sore tɩ Naaŋmɩn i, a bɛ cɛlɩ ɛ, fʋ na wul tɩ a fʋ nɔ̃wfʋ a, fʋ sàw na tɩ ŋmaarɛ cãà vʋʋrɛ ɛ́ lɛb wa zɩ̃ a fʋ tẽ-sora pʋɔ. À ŋá n'a, fʋ̃ʋ tɩ Naaŋmɩn i, fʋ ɩ a tɩ mimie lɛb nyɛ̃ a cãà, fʋ lɛb kʋ̀ tɩ a nyɔ-vʋʋrʋ blã a tɩ gbãgbaalʋ pʋɔ.

⁹ Sɩza n'a, tɩ Naaŋmɩn i, tɩ tɩ ɩ n gbãgbaar, ɛ́ fʋ bɛ jɛ tɩ bɛr a gbãgbaalʋ ŋa pʋɔ ɩ. Fʋ ɩ na a Pɛrsɩ na-mɩnɛ tɛr pʋ-pɩɛlʋ a tɩ zie, ɩ tɩ lɛb vʋʋrɛ. Lɛ n'a tɩ tʋ̃ɔ́ lɛb mɛ a fʋ yir, lɛb mɛ a ʋ dacine na lo a, ɛ́ nyɛ̃ kpɛb zie tɩ na kʋ̃ bãw damnʋ a, a Zerizalɛm nɩ a Zuda ten pʋɔ.

¹⁰ Ƴɛrɛŋa a, tɩ Naaŋmɩn i, tɩ yel kɛ́ bʋnʋ a yele á ŋá pùorí? Tɩ zawr'ɩ a fʋ nɛ-ƴãwnɩ

¹¹ fʋ na ƴãw a fʋ tõ-tõ-biir, a fʋ ƴɛ̀r-manbɛ, yel kʋ̀ tɩ a bɛr. Fʋ tɩ de nɩ niwn yel kʋ̀ tɩ à ŋá: “A tẽw nyɩ na na kpɛ so ʋ a ɩ n tẽ-dɛwr, bʋ̃ʋ n'ʋ vɛ̃, a nɩbɛ bɛl na kpɩɛr a ʋ pʋɔ a ɩ n nɩ-dɛgɛ ɛ́ paalɩ ʋ a ziir za nɩ a bɛ ɩ-faar na bɛ maal'ɩ wob a.

¹² A na ɩ à ŋá a, nyɩ taa kʋ̀rɛ a nyɩ pɔwyaar a bɛ bidɛbr bɛ kule ɩ, ɛ́ taa kaarɛ íre pɔwbɛ a bɛ pʋɔ kʋ̀rɛ a nyɩ bidɛbr ɛ. Nyɩ taa bɔbr a bɛ ƴã-ɓaarʋ nɩ a bɛ vla towtow ɛ. Lɛ n'a nyɩ na tɛr fãw, ɛ́ dɩrɛ a tẽw bome wone nɩ nʋ̃ɔ̀ wa bɛr a kʋ̀ a nyɩ bibiir bɛ so a kʋralɛ.”

¹³ 'Woi! Tɩ Naaŋmɩn i, a tɩ ɩ-faar nɩ a tɩ sãwna na bɛrmɛ a n'a so a tɩ kpɩɛrʋ á ŋá za páw tɩ. Ɛcɛ fʋ bɛ dɔwrɩ tɩ man nɩ a tɩ yel-bebe ɩ, fʋ bɛr tɩ na tɩ cãà vʋʋrɛ, a tɩɩm na be a ka a.

¹⁴ A na ɩ à ŋá a, tɩ na tʋ̃ɔ́ na lɛb tĩ zawrɛ a fʋ nɛ-ƴãwnɩ, ɛ́ tɩɩm nɩ a nɩ-faar bɛ ŋa lɛb tɛr wõ-taa a kul-taa pʋɔ ɔ? Fʋ kʋ̃ nyɛ̃ suur kʋ tɩ za pàw pɛr bɛ jɩɩrɩ nɩr bɛr ɛ?

¹⁵ Sore e, Ɩsɩrayɛl Naaŋmɩn i, fʋ ɩ n su-ɓaarʋ sob, a dɩ̃a a, fʋ sàw na tɩ mɩnɛ cãà vʋʋrɛ. Bʋ̃ʋ n'ʋ vɛ̃, tɩmɛ n'ɩ bɛ ŋa tuo a tɩ sãwna àr'ɩ a fʋ niŋé, ɛcɛ nɩr bɛ tɛr k'ʋʋ àr a fʋ niŋé a yele wa ŋmɛ̃ à à ŋá a ɩ.»