Ɛsɩdɩrasɩ 8 - A SƐB-SÕW

A Zifʋ bɛl na páw a Ɛsɩdɩrasɩ a Babɩlɔn lɛb wa a

¹ A yie nɩ-bɛrɛ bɛl na páw a mãa Ɛsɩdɩrasɩ a Babɩlɔn lɛb wa a Zerizalɛm, a nãà Artazɛrsɛsɩ naalʋ daar a, yée n'ɩ á ŋá a bɛ sãà mɩnɛ dɔw-tu-taa sɛbr pʋɔ.

² Pɩnasɩ dɔwlʋ pʋɔ: Gɛrsom. Itamaar dɔwlʋ pʋɔ: Danɩɛl. Daviir dɔwlʋ pʋɔ: Hatusɩ.

³ Sekanɩa bidɛb kãw. Pareɔsɩ dɔwlʋ pʋɔ: Zekarɩa, ʋlɛ nɩ ʋ yir dɛbr lɩz'a ayopõi nɩ pie (150).

⁴ Pahatɩ-Mowab dɔwlʋ pʋɔ: Zeraya bidɛb Ɛlyehonaɩ, ʋlɛ nɩ dɛbr kɔbr ayi (200).

⁵ Zatu dɔwlʋ pʋɔ: Yahazɩɛl bidɛb Sekanɩa, ʋlɛ nɩ dɛbr kɔbr ata (300).

⁶ Adin dɔwlʋ pʋɔ: Yonatan bidɛb Evɛdɩ, ʋlɛ nɩ dɛbr lɩz'a ayi nɩ pie.

⁷ Elam dɔwlʋ pʋɔ: Atalɩa bidɛb Yesaya, ʋlɛ nɩ dɛbr lɩz'a ata nɩ pie.

⁸ Sefatɩa dɔwlʋ pʋɔ: Mɩkayɛl bidɛb Zevadɩa, ʋlɛ nɩ dɛbr lɩz'a anaar.

⁹ Yoavʋ dɔwlʋ pʋɔ: Yehɩɛl bidɛb Ovadɩa, ʋlɛ nɩ dɛbr kɔbr ayi dɔwlɩ pie nɩ ani (218).

¹⁰ Bani dɔwlʋ pʋɔ: Yosifɩa bidɛb Selomitɩ, ʋlɛ nɩ dɛbr lɩz'a ani (160).

¹¹ Bevaɩ dɔwlʋ pʋɔ: Bevaɩ bidɛb Zekarɩa, ʋlɛ nɩ dɛbr lɩzɛr'ɩ ani.

¹² Azɩgadɩ dɔwlʋ pʋɔ: Ha-Katan bidɛb Yohanan, ʋlɛ nɩ dɛbr kʋba nɩ pie (110).

¹³ Adonikam dɔwlʋ pʋɔ nɩbɛ na bɩɛrɩ dɔw a: Elifelɛtɩ, Yeyɩɛl nɩ Semaya, bɛlɛ nɩ dɛbr lɩz'a ata.

¹⁴ Bigɩwaɩ dɔwlʋ pʋɔ: Utaɩ nɩ Zabudɩ, bɛlɛ nɩ dɛbr lɩz'a ata nɩ pie.

A Zerizalɛm tẽw lɛb cenu cɔbrʋ

¹⁵ Ɩ̃ tɩ ƴãw nɩ a nɩbɛ bɛ ŋa za ɓã taa a Ahawa bà-gbɛ́r ƴãw, ɛ́ tɩ tɩ kpɛ a tɩ pɛnɛ-sɛwr pʋɔ a be maalɩ bibie ata. Ɩ̃ na tɩ nyɛ̃ kɛ́ nɩ-zawlɛ nɩ bàwr-maalbɛ be n a bɛ pʋɔ, ɛ́ levitɩ kãw za bɛ ka be a,

¹⁶ ɩ̃ tɩ kʋ̀ n tõ-nʋɔr Eliezɛɛr, Arɩɛl, Semaya, Ɛlnatan, Yarivʋ, Ɛlnatan, Natan, Zekarɩa nɩ Mesulam na tɩ ɩ a nɩ-bɛrɛ a, nɩ Yoyarivʋ nɩ Ɛlnatan na tɩ ɩ a Naaŋmɩn wulu wul-wulbɛ ayi a.

¹⁷ Ɩ̃ tɩ yel bɛ na kɛ́ bɛ cen Ido zie, na ɩ a Kasifɩa tẽw nɩ-kpɛ̃ɛ a. Ɩ̃ tɩ yel'ɩ a ʋlɩ bom nɛ a na fɛr kɛ́ bɛ yel kʋ̀ a Ido a kʋ̀ bɛ, ʋlɛ nɩ a ʋ lãw-tõ-taabɛ, a zi-sõw tõ-tõ-biir na kpɩɛr a Kasifɩa a, kɛ̀ bɛ tʋ̃ɔ́ tɛr nɩbɛ wa n a tɩ Naaŋmɩn yir tome tob ƴãw.

¹⁸ A tɩ Naaŋmɩn na gùre tɩ a zũú, bɛ tɩ tʋ̃ɔ́ na tɛr Serevɩa wa n. A Serevɩa tɩ ɩ n Mali dɔwlʋ nɩr na bãw yã a, ɛ́ ɩ Zakɔb bidɛb Levi bʋʋrɛ. Ʋlɛ nɩ a ʋ bidɛbr nɩ a ʋ yɛbr nɛbɛ tɩ wa. Bɛ za tɩ ɩ n nɩbɛ pie nɩ ani.

¹⁹ Bɛ mɩ̀ tɩ tɛr'ɩ Hasavɩa wa n, ʋlɛ nɩ Yesaya na ɩ Merari dɔwlʋ nɩr a, nɩ a ʋ yɛbr nɩ a ʋ bidɛbr. Bɛ za tɩ ɩ n nɩbɛ lɩzɛr.

²⁰ Bɛ tɩ baa na tɛr nɩbɛ kɔbr ayi dɔwlɩ lɩzɛr (220) wa n, nɩbɛ bɛ na sʋ̃ɔmɩ bul kaa ír a zi-sõw tõ-tõ-biir pʋɔ a, nɩbɛ bʋʋrɛ a Daviir nɩ a ʋ lãw-tõ-taabɛ na tɩ kʋ̀ a levitɩ mɩnɛ a bɛ tome tob ƴãw a.

²¹ A Ahawa bà-gbɛrɩ́ be a, ɩ̃ tɩ yel'a k'aa fɛr'a kɛ́ tɩ tɛr mʋta-tuo, siwri tɩ tʋɔra a tɩ Naaŋmɩn niŋé, ʋ tʋ̃ɔ́ ɩ a tɩ sɔ́r ʋ vɩɛl, a tɩɩm nɩ a tɩ yie dem nɩ a tɩ bʋ̃-tɛrɩ ƴãw.

²² Vĩ nãà ɩrɛ mɛ̃ na, ɩ̃ na na zɛlɩ a nãà k'ʋʋ kʋ̀ tɩ sojarɩ nɩ wi-zɔmnbɛ bɛ gùre tɩ a tɩ dɔ̃ dem ƴãw, a sɔ́r zu a. Bʋ̃ʋ n'ʋ vɛ̃, tɩ tɩ yel ʋ na: «A tɩ Naaŋmɩn mɩ́ gùre nɩ a bɛlɩ dem za na tu ʋ a, ɛcɛ a ʋ suur mɩ́ ìr'ɩ faa faa a bɛlɩ dem za na zawrɩ ʋ bɛr a ƴãw.»

²³ Lɛ n'a tɩ tɩ tɛr a mʋta-tuo, ɛ́ zɛlɩ a tɩ Naaŋmɩn k'ʋʋ gùre tɩ, ʋʋ tɩ wõ a tɩ puoru.

²⁴ Al pùorí, ɩ̃ tɩ kaa na ír a bàwr-maal-nɩ-bɛrɛ pʋɔ nɩbɛ pie nɩ ayi, lãwnɩ Serevɩa, Hasavɩa nɩ a bɛ levitɩ taabɛ pie.

²⁵ A bɛ niŋé n'a ɩ̃ tɩ ker a salm-pla, a salm-zɩɛ nɩ a bʋ̃-vɩɛlɩ a nãà, a ʋ yã-wulbɛ, a ʋ tõ-tõ-bi-bɛrɛ nɩ a Ɩsɩrayɛl nɩbɛ bɛl na tɩ be a tẽw pʋɔ a, na tɩ tɩr a tɩ Naaŋmɩn yir ƴãw a.

²⁶ À ŋá n'a ɩ̃ tɩ kʋ̀ bɛ salm-pla kilo tùr-lɩzɛr (20 000), salm-pla bʋ̃-vɩɛlɩ kilo túr ata (3 000), salm-zɩɛ kilo túr ata (3 000),

²⁷ salm-zɩɛ ku-labɛ lɩzɛr na ta salm-zɩɛ libie túr a (1 000), nɩ kur-zɩɛ na nyɩwrɛ a bʋ̃-vɩɛlɩ ayi kãw na vɩɛl vɩɛl mɛ̃ salm-zɩɛ a.

²⁸ Ɩ̃ tɩ yel bɛ na: «Mɛ̃ a lɛ nyɩ na ɩ nɩbɛ bɛ na de kʋ̀ a Sore a ʋ tome tob ƴãw a, lɛ mɩ̀ n'a bɛ de a bome á ŋá kʋ̀ ʋ. A salm-pla nɩ a salm-zɩɛ á ŋá ɩ n bome bɛ na nɔnɛ de kʋ̀ a nyɩ sãàkʋm-kore Naaŋmɩn a.

²⁹ Nyɩ maal tɛr a vla tɩ ta n a Zerizalɛm. A be a, nyɩ na ker a nɩ a bàwr-maalbɛ nɩ-bɛrɛ niŋé, a levitɩ mɩnɛ nɩ a yie nɩ-bɛrɛ niŋé, a Sore Ŋmɩn-yir-kpɛ̃ɛ diru pʋɔ.»

³⁰ Lɛ n'a a bàwr-maalbɛ nɩ a levitɩ mɩnɛ tɩ de a bome za bɛ na ker a, a salm-pla, a salm-zɩɛ nɩ a bʋ̃-vɩɛlɩ vɩɛlɩ, kɛ́ bɛ cen nɩ a Zerizalɛm, a tɩ Naaŋmɩn yir pʋɔ.

A Zerizalɛm tẽw cenu nɩ a ʋ tab yele

³¹ A cuw-dãw-niwn sob bibie pie nɩ ayi sob, tɩ tɩ yi n a Ahawa bà-gbɛrɩ́ lo a Zerizalɛm tẽw sɔ́r. A tɩ Naaŋmɩn tɩ piw tɩ na tɛr a sɔ́r zu, a tɩ dɔ̃ dem nɩ a nɩ-farbɛ na jɩɛrɛ tɩ a ƴãw.

³² Tɩ tɩ ta n a Zerizalɛm tẽw zɩ̃ pɩ̃ɛnɩ bibie ata.

³³ A bibie anaar sob a, tɩ tɩ ker'ɩ a salm-pla, a salm-zɩɛ nɩ a bʋ̃-vɩɛlɩ vɩɛlɩ a tɩ Naaŋmɩn yir pʋɔ, ɛ́ bãw de a kʋ̀ a bàwr-maalɛ Meremɔtɩ na ɩ Uriya bidɛb a. Eleazaar na ɩ Pɩnasɩ bidɛb a mɩ̀ tɩ be n be, de nɩ Yesua bidɛb Yozavadɩ nɩ Binuwi bidɛb Nowadɩa na ɩ levitɩ mɩnɛ a.

³⁴ A bome za tɩ sɔ́r a ɛ́ ker, a tɩbrʋ za sɛb ƴãw sɛbɛ zu daadaalɛ.

³⁵ A bɛlɩ dem za na tɩ be a diw-cenu zie na wa lɛb wa a, bɛ tɩ maal'ɩ bagɛ kʋ̀ a Ɩsɩrayɛl Naaŋmɩn: a Ɩsɩrayɛl nɩbɛ za yúor ƴãw a, bɛ tɩ maal'ɩ nyɩw-a-za-bagɛ nɩ nadɛɛ pie nɩ ayi, pʋ́rɩ lɩz'a anaar nɩ pie nɩ ayʋɔb, nɩ peli lɩz'a ata nɩ pie nɩ a ayopõi, de nɩ bʋrɩ pie nɩ ayi a yel-bebe suur páwfʋ ƴãw. Bɛ tɩ nyɩw nɩ a dʋn á ŋá za a dɩ kʋmkʋm a Sore ƴãw.

³⁶ Al pùorí, bɛ tɩ yel'ɩ a lɛ a nãà na yel a, kʋ̀ a Pɛrsɩ tẽw tõ-tõ-bi-bɛrɛ nɩ a na-kpɛ̃ɛ-lɩɛrbɛ na be a Efaratɩ gãwn a mʋ̃tɔ̃w-kpɛb-lowr a. Lɛ n'a a nɩbɛ bɛ ŋa tɩ tɩɛ a Ɩsɩrayɛl nɩbɛ yel za na càarɩ a Naaŋmɩn yir a ƴãw.