Ɛsɩdɩrasɩ 5 - A SƐB-SÕW

¹ Ɛcɛ bibir kãw, a naaŋmɩn-ƴɛ̀r-manbɛ Aze nɩ Zakari na ɩ Ido bidɛb a, tɩ ƴɛ̀r'ɩ a Zerizalɛm nɩ a Zuda tẽw Zifʋ mɩnɛ zie, a bɛ Naaŋmɩn, a Ɩsɩrayɛl Naaŋmɩn yúor ƴãw.

² Lɛ n'a a Saltɩɛl bidɛb, Zorobabɛl, nɩ Yosadakɩ bidɛb, Zozue, tɩ ìr tĩ a Ŋmɩn-yir-kpɛ̃ɛ lɛb-mɛb tome a Zerizalɛm. A naaŋmɩn-ƴɛ̀r-manbɛ tɩ sõwne bɛ na.

³ Daadaalɛ, Tatɩnaɩ na ɩ a Efaratɩ gãwn na be a mʋ̃tɔ̃w-kpɛb-lowr a na-kpɛ̃ɛ-lɩɛrɛ a, Setaar-Bozɩnaɩ nɩ a bɛ taabɛ tɩ wa na wa páw bɛ sowri bɛ: «Ãa n'ʋ kʋ̀ nyɩ a sɔ́r kɛ́ nyɩ lɛb mɛ a Ŋmɩn-yir-kpɛ̃ɛ ŋa ɛ́ lɛb maalɩ a dacine ƴãw?

⁴ A fɛr'a kɛ́ nyɩ kʋ̀ tɩ a bɛlɩ dem na pʋɔ a yir ŋa lɛb-mɛb pʋɔ a yée.»

⁵ Ɛcɛ a Naaŋmɩn tɩ gùre nɩ a Zifʋ mɩnɛ nɩ-bɛrɛ. Nɩr bɛ tɩ ƴãw bɛ bɛr a tome ɩ, ɛ́ gù kɛ́ manʋ tɩ cen tɩ páw a Daarisɩ, ʋʋ mɩ̀ lɛb tɩr a ʋ sɔwfʋ.

A tẽw dem sɛb'a wo a Zifʋ mɩnɛ a nãà Daarisɩ zie

⁶ A sɛb-tʋɔla a na-kpɛ̃ɛ-lɩɛrɛ Tatɩnaɩ, a Setaar-Bozɩnaɩ nɩ a ʋ tõ-tõ-nɩ-bɛr-taabɛ na be a Efaratɩ gãwn a mʋ̃tɔ̃w-kpɛb-lowr a na tɩr kʋ̀ a nãà Daarisɩ a, ƴɛ̀r-bie n'ɩ á ŋá.

⁷ A sɛb-tʋɔla tɩ sɛb'ɩ à ŋá: «Tɩ puore nɩ a nãà Daarisɩ a ƴã-ɓaarʋ yãanɩ yaga za!»

⁸ «Tɩ yere na kʋ̀rɛ a nãà k'ʋʋ bãwnɩ a tɩ na cen a Zuda tẽ-ŋmãa-kʋ̀ra pʋɔ, a Naaŋmɩn na ɩ kpɛ̃ɛ a yir a. A Zifʋ mɩnɛ lɛb'a mɩɛr a Ŋmɩn-yir-kpɛ̃ɛ nɩ kʋsɛ-pɛnɩ nɩ dà-wowr bɛ na ƴãw ƴãw a dacine pʋɔ a. A ton tone nɩ vla vla, ɛ́ tone páwr.

⁹ Tɩ tɩ sowr'ɩ a tome nɩ-bɛrɛ: “Ãa n'ʋ yel kɛ́ nyɩ lɛb mɛ a Ŋmɩn-yir ŋa ɛ́ lɛb maalɩ a dacine ƴãw?”

¹⁰ Tɩ mɩ̀ tɩ sowr'ɩ a bɛ yée, kɛ́ tɩ tʋ̃ɔ́ ƴãw a bɛlɩ dem na kaarɛ a tome zie a yée sɛbɛ zu kʋ̀ b.

¹¹ Bɛ tɩ sɔw tɩ na: “A Naaŋmɩn na ír a salom nɩ a tẽw a tõ-tõ-biir'ɩ tɩ. Tɩ lɛb'a mɩɛr a Ŋmɩn-yir-kpɛ̃ɛ a Ɩsɩrayɛl nãà kãw na tɩ dãw ŋmãa a daar bɛ gbʋ́r a.

¹² Ɛcɛ a tɩ sãàkʋm-kore tɩ ɩ na a Naaŋmɩn na be a salom zu a, ʋ nyɛ̃ suur, ƴãw bɛ a Nabikodonozɔɔr na yi Kalde tẽw ɛ́ ɩ Babɩlɔn nãà a, nuru pʋɔ. Ʋlɛ n'ʋ ŋmɛr a Ŋmɩn-yir-kpɛ̃ɛ bɛr ɛ́ diw a nɩbɛ cen nɩ a Babɩlɔn.

¹³ Ɛcɛ, a Babɩlɔn tẽw nãà Siirisɩ naalʋ-dɩb yũon-dãw-niwn sob a, ʋ tɩ tɩr'ɩ sɔ́r kɛ́ bɛ lɛb mɛ a Naaŋmɩn yir.

¹⁴ A nãà Nabikodonozɔɔr tɩ de nɩ a salm-zɩɛ nɩ a salm-pla bome na be a Naaŋmɩn yir pʋɔ a Zerizalɛm a, kul'ɩ tɩ bin a Babɩlɔn tẽw ŋmɩn-yir pʋɔ. A nãà Siirisɩ tɩ lɛb'a de a bome á ŋá a Babɩlɔn tẽw ŋmɩn-yir pʋɔ kʋ̀ Sɛsɩbasaar ʋ na tɩ kaa ír ƴãw k'ʋ ɩ a Zuda tẽw na-kpɛ̃ɛ-lɩɛrɛ a.

¹⁵ Ʋ tɩ yel ʋ nɩ à ŋá: De a bome á ŋá cen nɩ tɩ ƴãw a Zerizalɛm Ŋmɩn-yir-kpɛ̃ɛ pʋɔ, bɛlɛ wa lɛb mɛ ʋ a ʋ zi-kʋra pʋɔ baar'a.

¹⁶ A lɛ n'a a Sɛsɩbasaar wa a Zerizalɛm ka, wa lɛb bin a Naaŋmɩn yir pɛr. A lɛn daar za n'a a tome cãà tone, ɛcɛ a bɛ baarɩ sɛr ɛ.”

¹⁷ Ƴɛrɛŋa a, a nãà wa sàw a, bɛ bɔ a Babɩlɔn tẽw na-mɩnɛ sɛb-kore pʋɔ nyɛ̃, a nãà Siirisɩ wa sɩrɩ tɩr nʋɔr kɛ́ bɛ lɛb mɛ a Naaŋmɩn yir a Zerizalɛm a. Al pùorí, bɛ tɩr a lɛ a nãà na yel a yel ŋa ƴãw a kʋ̀ tɩ.»