Ɛsɩdɩrasɩ 10 - A SƐB-SÕW

A Zifʋ mɩnɛ na lɛb bɛr a nɩ-bʋʋr-yoru pɔwbɛ a

¹ A Ɛsɩdɩrasɩ na tɩ kone gbĩ n dume a Ŋmɩn-yir-kpɛ̃ɛ niŋé, puore ɛ́ zɛlɛ k'aa Naaŋmɩn dɩ suur a, a Ɩsɩrayɛl nɩbɛ yaga, dɛbr, pɔwbɛ nɩ bibiir tɩ wa na wa ɓã taa a ʋ zie. Bɛ za tɩ kone nɩ minminmin.

² Lɛ n'a a Elam bʋʋrɛ Yehɩɛl bidɛb, Sekanɩa, tɩ yel a Ɛsɩdɩrasɩ: «Tɩ maal'ɩ faa a tɩ Naaŋmɩn zie, tɩ na kul nɩ-bʋʋr-yoru na kpɩɛr a tẽw ŋa pʋɔ a pɔwbɛ a. Ɛcɛ a na saa ɩ à ŋá a, a cãà na tɛr ɩb a Ɩsɩrayɛl nɩbɛ zie:

³ Tɩ na yel'ɩ a Naaŋmɩn niŋé kɛ́ tɩ na lɛb'a bɛr a nɩ-bʋʋr-yoru pɔwbɛ bɛ ŋa za, bɛlɛ nɩ a bɛ bibiir. À ŋá n'a tɩ na tu a lɛ fʋ̃ʋ nɩ a bɛlɩ dem za na tuur a tɩ Naaŋmɩn nɛ-ƴãwnɩ vla vla a, na yel kʋ̀ tɩ a. Tɩ tu a lɛ a wulu na yel a!

⁴ Ìr! Fʋ̃ʋ n'ʋ a yel ŋa jɩ́rɛ. Tɩ na sõw fʋ na. Ƴãw fãw nyɔw a tome.»

⁵ Lɛ n'a a Ɛsɩdɩrasɩ tɩ ìr, ɛ́ ƴãw a levitɩ mɩnɛ bɛl na ɩ bàwr-maalbɛ a nɩ-bɛrɛ nɩ a Ɩsɩrayɛl nɩbɛ nɩ-bɛrɛ za pɔ yel kɛ́ bɛ na tu n a lɛ a Sekanɩa na yel a. Bɛ za tɩ pɔ na.

⁶ Lɛ n'a a Ɛsɩdɩrasɩ tɩ yi a Naaŋmɩn yir davʋra pʋɔ, cen Ɛlyasivʋ bidɛb, Yehohanan, yir tɩ be a be. Ɛcɛ ʋ tɩ zawr'ɩ a dɩb nɩ a nyub, bʋ̃ʋ n'ʋ vɛ̃, a nɩbɛ na yi a diw-cenu zie lɛb wa a sãwna kpɛ̃ɛ ŋa tɩ ƴãw ʋ nɩ pʋ-sãwna.

⁷ Al pùorí, bɛ tɩ hier'ɩ a Zerizalɛm nɩ a Zuda ten pʋɔ yel a nɩbɛ za na yi a bɛ diw-cenu zie lɛb wa a, kɛ́ bɛ ɓã taa a Zerizalɛm.

⁸ Nɩr bɛ wa wa ka nɩ bibie ata a, mɛ̃ a lɛ a nɩ-bɛrɛ nɩ nɩ-kore na yel a, bɛ na de nɩ a ʋ bʋ̃-tɛrɩ za, ɛ́ ír ʋ bɛr a nɩ-diw-ceni lãw pʋɔ.

⁹ Lɛ n'a a Zuda tẽw nɩbɛ nɩ a Bɛ̃zamɛ tẽw nɩbɛ tɩ wa ɓã taa a Zerizalɛm, a bibie ata pùorí, a pɛr lɛ k'aa cuwr piwaɩ sob, bibie lɩzɛr sob. Bɛ za tɩ àr'ɩ a Naaŋmɩn yir zi-yɛlʋ pʋɔ, ɛ́ màwr bɛ za, a yel ŋa ƴãw, nɩ a saa mɩ̀ na tɩ waar a ƴãw.

¹⁰ A bàwr-maalɛ Ɛsɩdɩrasɩ tɩ ìr'a àr ɛ́ yel bɛ à ŋá: «Ɩsɩrayɛl nɩbɛ ɛ, nyɩ maal'ɩ faa, nyɩ na kul a nɩ-bʋʋr-yoru pɔwbɛ a ƴãw. Yel-bier'ʋ nyɩ maalɩ dɔwlɩ a tɩ nɩbɛ yel-bebe za zu.

¹¹ Ƴɛrɛŋa a, a fɛr'a kɛ́ nyɩ sàw a nyɩ sãwna a Sore, nyɩ sãàkʋm-kore Naaŋmɩn niŋé, ɛ́ sàwr a ʋ pʋ-tɩɛrʋ. Nyɩ taa lãwnɛ nɩ a tẽw ŋa nɩbɛ ɩ, ɛ́ lɛb bɛr a nɩ-bʋʋr-yoru pɔwbɛ nyɩ na kul a.»

¹² A lãw nɩbɛ za tɩ yel'ɩ kpɛ̃w kpɛ̃w za: «Fʋ tɛr'ɩ yel-mɩŋa! A fɛr'a kɛ́ tɩ ɩ a lɛ fʋ na yel kʋ̀ tɩ a.

¹³ Ɛcɛ tɩ yãwmɛ na, ɛ́ a ɩ saa daar, tɩ kʋ̃ tʋ̃ɔ́ àr a yẽw ɛ. Lɛb waar mɩ̀, a kʋ̃ ɩ bibi-been bɩɩ bibie ayi yel ɛ, bʋ̃ʋ n'ʋ vɛ̃, a tɩ yaga tɛr'ɩ sãwna a yel ŋa pʋɔ.

¹⁴ A tɩ nɩ-bɛrɛ, bɛ be a ka a lãw za yúor ƴãw: a Ɩsɩrayɛl nɩbɛ bɛl za na kul nɩ-bʋʋr-yoru pɔwbɛ a na mɩ́ wa n a bɛ niŋé, a daar ʋl bɛ na ƴãw kʋ̀ bɛ a, bɛlɛ nɩ a bɛ tẽ-bɛrɛ nɩ-kore nɩ a ƴɛ̀r-dɩrbɛ. Tɩ na tu n a yel ŋa pùor ɛ́ gù a tɩ Naaŋmɩn su-tʋlʋ tɩ ɓãá a tɩ ƴãw.»

¹⁵ Asayɛl bidɛb Yonatan nɩ Tikɩwa bidɛb Yazeya bɛ tɩ sàw de a tub ŋa ɩ, ɛ́ Mesulam nɩ Sabɩtaɩ na ɩ levitɩ mɩnɛ a tɩ sàw kʋ̀ bɛ.

¹⁶ Ɛcɛ a Ɩsɩrayɛl nɩbɛ ŋmãa bɛl na yi a diw-cenu zie lɛb wa a tɩ sàw nɩ a tub ŋa. A bàwr-maalɛ Ɛsɩdɩrasɩ tɩ kaa na ír yie nɩ-bɛrɛ a dɔwlʋ za pʋɔ mɩ́ bʋɔlɩ ŋa za yúor. A nɩbɛ bɛ ŋa tɩ zɩ̃ n a yel ŋa maalʋ ƴãw a cuwr pie sob bibi-dãw-niwn sob.

¹⁷ A vɩɛr daarɩ́ cuw-dãw-niwn sob bibi-dãw-niwn sob a, bɛ tɩ jɛl'ɩ a nɩbɛ za na kul nɩ-bʋʋr-yoru pɔwbɛ a yele baarɩ.

A Zifʋ mɩnɛ bɛl na kul a nɩ-bʋʋr-yoru pɔwbɛ a yée

¹⁸ A bàwr-maalbɛ pʋɔ a, a bɛl na tɩ kul a nɩ-bʋʋr-yoru pɔwbɛ a tɩ n'ɩ bɛ ŋa: Yosadakɩ bidɛb Zozue nɩ a ʋ yɛbr bʋ̃-dɔwrɩ pʋɔ: Maaseya, Eliezɛɛr, Yarivʋ nɩ Gedalɩa.

¹⁹ Bɛ tɩ pɔ na yel kɛ́ bɛ na lɛb'a bɛr a bɛ pɔwbɛ, ɛ́ nyɔw pʋ́ra maal'ɩ bàwr a Naaŋmɩn dɩ suur kʋ̀ bɛ.

²⁰ Ɩmɛɛr bʋ̃-dɔwrɩ pʋɔ: Hanani nɩ Zevadɩa.

²¹ Harim bʋ̃-dɔwrɩ pʋɔ: Maaseya, Eliya, Semaya, Yehɩɛl nɩ Uziya.

²² Pasehuur bʋ̃-dɔwrɩ pʋɔ: Ɛlyoenaɩ, Maaseya, Yisɩmayɛl, Netanɛl, Yozavadɩ nɩ Eleasa.

²³ A levitɩ mɩnɛ pʋɔ: Yozavadɩ, Simeyi, Kelaya (bɩɩ Kelita), Petaya, Yehuda nɩ Eliezɛɛr.

²⁴ A yiel-yielbɛ pʋɔ: Ɛlyasivʋ. A dɩ̃dɔ-gùrbɛ pʋɔ: Salum, Telɛm nɩ Uuri.

²⁵ A Ɩsɩrayɛl nɩbɛ bɛl na cɛ a pʋɔ: Pareɔsɩ bʋ̃-dɔwrɩ pʋɔ: Aramɩa, Yiziya, Malkɩa, Miyamin, Eleazaar, Malkɩa nɩ Benaya.

²⁶ Elam bʋ̃-dɔwrɩ pʋɔ: Matanɩa, Zekarɩa, Yehɩɛl, Avidi, Yeremɔtɩ nɩ Eliya.

²⁷ Zatu bʋ̃-dɔwrɩ pʋɔ: Ɛlyoenaɩ, Ɛlyasivʋ, Matanɩa, Yeremɔtɩ, Zavadɩ nɩ Aziza.

²⁸ Bevaɩ bʋ̃-dɔwrɩ pʋɔ: Yehohanan, Hananɩa, Zabaɩ nɩ Atɩlaɩ.

²⁹ Bani bʋ̃-dɔwrɩ pʋɔ: Mesulam, Malukɩ, Adaya, Yasuvʋ, Seal nɩ Yeramɔtɩ.

³⁰ Pahatɩ-Mowab bʋ̃-dɔwrɩ pʋɔ: Adɩna, Kelal, Benaya, Maaseya, Matanɩa, Besalɛl, Binuwi nɩ Manase.

³¹ Harim bʋ̃-dɔwrɩ pʋɔ: Eliezɛɛr, Yisiya, Malkɩa, Semaya, Sɩmɩ̃ɔ,

³² Bɛ̃zamɛ, Malukɩ nɩ Semarɩa.

³³ Hasum bʋ̃-dɔwrɩ pʋɔ: Matenaɩ, Matata, Zavadɩ, Elifelɛtɩ, Yeremaɩ, Manase nɩ Simeyi.

³⁴ Bani bʋ̃-dɔwrɩ pʋɔ: Maadaɩ, Amɩram, Uwɛl,

³⁵ Benaya, Bedɩa, Keluhi,

³⁶ Wanɩa, Meremɔtɩ, Ɛlyasivʋ,

³⁷ Matanɩa, Matenaɩ, Yaasaɩ,

³⁸ Bani, Binuwi, Simeyi,

³⁹ Selemɩa, Natan, Adaya,

⁴⁰ Makɩnadevaɩ, Sasaɩ, Saraɩ,

⁴¹ Azarɛl, Selemɩahu, Semarɩa,

⁴² Salum, Amarɩa nɩ Yosɛfʋ.

⁴³ Nebo bʋ̃-dɔwrɩ pʋɔ: Yeyɩɛl, Matitɩa, Zavadɩ, Zevina, Yadaɩ, Yowɛl nɩ Benaya.

⁴⁴ A dɛbr bɛ ŋa za tɩ kul'ɩ nɩ-bʋʋr-yoru pɔwbɛ, ɛ́ a pɔwbɛ bɛ mɩnɛ tɩ dɔw bibiir.