Ɛsɩdɩrasɩ 1 - A SƐB-SÕW

A ŊMƖN-YIR-KPƐ̃Ɛ LƐB MƐB 1—6 A Siirisɩ tɩr'ɩ sɔ́r kɛ́ bɛ lɛb mɛ a Ŋmɩn-yir-kpɛ̃ɛ

¹ A Pɛrsɩ tẽw nãà, Siirisɩ, naalʋ-dɩb yũon-dãw-niwn sob, a Sore tɩ yel'a k'ʋʋ na ɩ na a ƴɛ̀rʋ ʋ na tɩ ƴãw a ʋ ƴɛ̀r-manɛ Zeremi ƴɛ̀r a, a tu a tub. Ʋ tɩ ƴãw nɩ a tɩɛrʋ ŋa a Siirisɩ, k'ʋʋ ƴãw bɛ hieri yel, ɛ́ sɛb sɛbɛ yel a ʋ naalʋ-tẽw za pʋɔ à ŋá:

² «À ŋá n'a a Pɛrsɩ tẽw nãà, Siirisɩ, yere: A Sore, a salom Naaŋmɩn kʋ̀ m'ɩ a tẽ-daa naalʋ-ten za. Ʋ yel mɛ̃ na k'ɩ̃ɩ lɛb mɛ Ŋmɩn-yir-kpɛ̃ɛ kʋ̀ ʋ a Zerizalɛm, a Zuda tẽw pʋɔ.

³ A nyɩ pʋɔ a, a bɛlɩ dem za na pʋɔ a ʋ nɩ-bʋʋrɛ pʋɔ a, bɛ lɛb cen a Zerizalɛm, a Zuda tẽw, tɩ lɛb mɛ a Sore, a Ɩsɩrayɛl Naaŋmɩn na be a Zerizalɛm a, Ŋmɩn-yir-kpɛ̃ɛ. Ɛ́ a bɛ Naaŋmɩn be a bɛ zie!

⁴ Zie nɛ za a Ɩsɩrayɛl nɩbɛ na be a, a fɛr'a k'aa zie nɛ dem sõw bɛ nɩ salm-pla nɩ salm-zɩɛ nɩ bome a mɩnɛ nɩ dʋn, nɩ de-kʋ̀b bome bɛ na nɔ̃w yã tɩr a Ŋmɩn-yir-kpɛ̃ɛ na be a Zerizalɛm a ƴãw a.»

⁵ Lɛ n'a a Zuda nɩ a Bɛ̃zamɛ yie nɩ-bɛrɛ, a bàwr-maalbɛ nɩ a levitɩ mɩnɛ mɩnɛ nɩ a bɛlɩ dem za a Sore Naaŋmɩn na tɩ ƴãw a tɩɛrʋ kɛ́ bɛ cen tɩ lɛb mɛ a ʋ yir a Zerizalɛm a, bɛ tɩ cɔbrɩ a cenu.

⁶ A bɛ sɩman dem za tɩ sõw bɛ na nɩ salm-pla nɩ salm-zɩɛ, nɩ bome a mɩnɛ, nɩ bʋ̃-vɩɛlɩ bʋʋrɛ bʋʋrɛ za, nɩ dʋn, pʋɔ nɩ a de-kʋ̀b bome bɛ na nɔ̃w yã tɩr a Ŋmɩn-yir-kpɛ̃ɛ ƴãw a.

⁷ A nãà Siirisɩ tɔr za tɩ ƴãw na bɛ wob a bʋ̃-vɩɛlɩ al a Nabikodonozɔɔr na tɩ de a Sore Ŋmɩn-yir-kpɛ̃ɛ́ a Zerizalɛm tɩ ƴãw a ʋ ŋmɩmɛ yir pʋɔ a, ʋ tɩ ƴãw na bɛ wob a ɓã taa.

⁸ Ʋ tɩ yel'ɩ Mitɩredatɩ, a na-bome kaarɛ, k'ʋʋ de a kʋ̀ a Zuda tẽw niw-diere Sɛsɩbasaar.

⁹ A bome al n'ɩ á ŋá: salm-zɩɛ labɛ lɩzɛr'ɩ pie, salm-pla labɛ túr (1 000), sɔ̀rʋ lɩzɛr'ɩ piwaɩ,

¹⁰ salm-zɩɛ ku-la-bɛrɛ lɩzɛr'ɩ pie, salm-pla ku-la-bɛrɛ kɔbr anaar'ɩ pie (410), nɩ bome a mɩnɛ na ta túr (1 000) a.

¹¹ A salm-zɩɛ bome nɩ a salm-pla bome za na tɩ ɓã taa a, a tɩ ɩ n túr-anũu dɔwlɩ kɔbr anaar (5 400). A Sɛsɩbasaar tɩ de nɩ a bome á ŋá za cen nɩ, a lɛn daar ʋlɛ nɩ a nɩ-diw-ceni na tɩ yi a Babɩlɔn lɛb cere a Zerizalɛm a.