Eziptɩ tẽw yib 7 - A SƐB-SÕW

¹ Lɛ n'a a Sore tɩ yel ʋ: «Nyɛ̃, ɩ̃ ɩ na fʋ ɩ naaŋmɩn a Faarawɔ̃ zie, ɛ́ a fʋ yɛb Aarɔ̃ n'ʋ na ɩ a fʋ ƴɛ̀r-manɛ.

² Fʋ na yel'ɩ a alɩ bome nɛ za ɩ̃ na yere kʋ̀rɛ fʋ a, kʋ̀ a fʋ yɛb, ɛ́ ʋlɛ n'ʋ na ƴɛ̀r a Faarawɔ̃ zie, ʋ bɛr a Ɩsɩrayɛl nɩbɛ bɛ yi a ʋ tẽw pʋɔ.

³ Ɛcɛ ɩ̃ na ɩ na a Faarawɔ̃ kpãa tobr. Ɩ̃ na maal'ɩ yel-yaga na ɩ bãwfʋ ɛ́ ɩ nɔ-ɓãa-yele a, a ʋ tẽw pʋɔ,

⁴ ɛ́ a Faarawɔ̃ kʋ̃ bɛr wõ a nyɩ ƴɛ̀rʋ ɛ. Lɛ n'a ɩ̃ na ɩ dɔwrʋ na ta dɔwrʋ a ta, a Eziptɩ bãw k'ɩ̃ɩ tɛr'ɩ fãw, ɩ̃ɩ ɩ a ɩ̃ zɛbr-nɩbɛ, a ɩ̃ nɩ-bʋʋrɛ, a Ɩsɩrayɛl nɩbɛ, yi a tẽw ŋa pʋɔ.

⁵ A Eziptɩ tẽw dem na bãw na kɛ́ mãa n'ɩ a Sore, a lɛn daar ɩ̃ nãà wa zɛw a nũu a bɛ ƴãw, k'ɩ̃ɩ ɩ a Ɩsɩrayɛl nɩbɛ yi zaa a bɛ tẽw pʋɔ a.»

⁶ A Moyiir nɩ a Aarɔ̃ tɩ ɩ n a lɛ tɔr za a Sore na yel kʋ̀ bɛ a.

⁷ A Moyiir tɩ tɛr'ɩ yome lɩz'a anaar, ɛ́ a Aarɔ̃ tɛr yome lɩz'a anaar nɩ ata, a lɛn daar bɛ na tɩ cen tɩ ƴɛ̀r a Faarawɔ̃ zie a.

A Faarawɔ̃ bɛ sàw bɛr wõ a Moyiir nɩ a Aarɔ̃ ƴɛ̀rʋ ɛ

⁸ A Sore tɩ yel'ɩ a Moyiir nɩ a Aarɔ̃:

⁹ «A Faarawɔ̃ wa yel kɛ́ nyɩ maalɩ nɔ-ɓãa-yel kãw a, a fʋ̃ʋ Moyiir, fʋ na yel'ɩ a Aarɔ̃ k'ʋʋ de a ʋ dabɔl lɔb bin a Faarawɔ̃ niŋé. A dabɔl na lɩɛb'ɩ waab.»

¹⁰ A Moyiir nɩ a Aarɔ̃ tɩ cen na tɩ páw a Faarawɔ̃, ɛ́ ɩ mɛ̃ a lɛ a Sore na yel kʋ̀ bɛ a: a Aarɔ̃ tɩ lɔb'ɩ a ʋ dabɔl bin a Faarawɔ̃ nɩ a ʋ tõ-tõ-nɩ-bɛrɛ niŋé, a dabɔl lɩɛbɩ waab.

¹¹ A nãà mɩ̀ tɩ bʋɔl'ɩ a Eziptɩ yã-bãwnbɛ nɩ a tɩtɩlbɛ wa n bɛ wa ɩ a bɛ tɩtɩblʋ mɩ̀ maal'ɩ a lɛ tɔr za.

¹² Ŋa za tɩ lɔb'ɩ a ʋ dabɔl bin a tẽw, a dabɔlɛ lɩɛbɩ wɩɩr. Ɛcɛ a Aarɔ̃ dabɔl tɩ vɔl'ɩ a bɛ dabɔlɛ.

¹³ A na saa ɩ à à ŋá a, a Faarawɔ̃ tɩ cãà na kpãa tobr, bɛ bɛr wõ a Moyiir nɩ a Aarɔ̃ ƴɛ̀rʋ ɛ, mɛ̃ a lɛ a Sore na tɩ yel a.

A dɔwr-kpɛ̃ɛ dãw-niwn sob: a kʋ̃ɔ na lɩɛbɩ zɩ̃ɩ a

¹⁴ A Sore tɩ yel'ɩ a Moyiir: «A Faarawɔ̃ dɩrɛ nɩ zu-kpɛnʋ, ɛ́ bɛ sàwr bɛrɛ a Ɩsɩrayɛl nɩbɛ bɛ cere ɩ.

¹⁵ A na ɩ lɛ a, cen tɩ páw ʋ biɓaar-pipi, a lɛn daar ʋ na siwr a man nʋɔr a. Àr gù ʋ a Nɩl nʋɔr. Tɛr a dabɔl ʋl na lɩɛbɩ waab a, a fʋ nũú.

¹⁶ Fʋ na yel'ɩ a nãà: “A Ebre mɩnɛ Naaŋmɩn, a Sore, tõ m'a k'ɩ̃ɩ wa yel fʋ à ŋá: Bɛr a ɩ̃ nɩbɛ bɛ cen a wɛja-kpalɛ pʋɔ tɩ maalɩ mɛ̃. Ɛcɛ, wa tɔ ka a, fʋ bɛ bɛr wõ ɩ.

¹⁷ A lɛ n'a so a Sore yere kɛ́ ƴɛrɛŋa ʋl a, fʋ na bãw na ãa na n'ʋ a. Ɩ̃ na ŋmɛ n a Nɩl kʋ̃ɔ nɩ a dabɔl ɩ̃ na ƴãw a nũú a, a lɩɛbɩ zɩ̃ɩ.

¹⁸ A zʋ́mɛ́ na kpi na, a man kʋ̃ɔ na nyùur a, a Eziptɩ tẽw dem kʋ̃ lɛb tʋ̃ɔ́ a nyũ ɛ”.»

¹⁹ A Sore tɩ cãà na yel a Moyiir: «Yel a Aarɔ̃ k'ʋʋ de a ʋ dabɔl, ɛ́ tùr a ʋ nũu cɔw a Eziptɩ tẽw kʋ̃ɔnɩ za, a bàrʋ, a fʋɔlɩ bɛ na wɛr a nɩ a gbãtarɩ. A kʋ̃ɔ á ŋá za na lɩɛbɩ zɩ̃ɩ. Lɛ n'a a tẽw za na ɩ zɩ̃ɩ tɩ lãw nɩ a kʋ̃ɔ bʋ̃-ƴãwnɩ bɛ na maal'ɩ dàar bɩɩ kʋsɛbɛ a.»

²⁰ A Moyiir nɩ a Aarɔ̃ tɩ ɩ n a lɛ a Sore na yel kʋ̀ bɛ a: a Aarɔ̃ tɩ zɛw nɩ a ʋ dabɔl ŋmɛ n a Nɩl kʋ̃ɔ a Faarawɔ̃ nɩ a ʋ tõ-tõ-nɩ-bɛrɛ niŋé, a kʋ̃ɔ al za lɩɛbɩ zɩ̃ɩ.

²¹ A zʋ́mɛ́ tɩ kpi na, a man kʋ̃ɔ nyùur, a Eziptɩ tẽw nɩbɛ kʋ̃ lɛb tʋ̃ɔ́ a nyũ ɛ. A tẽw ziir za tɩ ɩ n a zɩ̃ɩ.

²² Ɛcɛ a Eziptɩ tɩtɩlbɛ mɩ̀ tɩ ɩ n a bɛ tɩtɩblʋ, maalɩ a ʋlɩ bʋ̃-been nɛ. Lɛ n'a a Faarawɔ̃ tɩ cãà kpãa tobr, bɛ bɛr wõ a Moyiir nɩ a Aarɔ̃ ƴɛ̀rʋ ɛ, mɛ̃ a lɛ a Sore na tɩ yel a.

²³ A Faarawɔ̃ tɩ lɩɛb'a tɔl kul a ʋ yir, ɛ́ nyɛ̃ a yel ŋa bɛ ɩ yel-sɩza a ʋ zie ɩ.

²⁴ A Eziptɩ tẽw dem za tɩ tuw nɩ bɔwrɩ a Nɩl nʋɔr, kɛ́ bɛ tʋ̃ɔ́ páw kʋ̃ɔ-vla. Bʋ̃ʋ n'ʋ vɛ̃, a man kʋ̃ɔ bɛ tɩ tɛr nyub ɛ.

²⁵ A Sore na tɩ ƴãw a Nɩl a dɔwrʋ ŋa baar'a, bibie ayopõi tɩ tɔl a.

A dɔwrʋ ayi sob: a lɔn

²⁶ Al pùorí, a Sore tɩ yel'ɩ a Moyiir: «Cen tɩ páw a Faarawɔ̃ yel ʋ: “À ŋá n'a a Sore yere: Bɛr a ɩ̃ nɩbɛ bɛ cen tɩ maalɩ mɛ̃.

²⁷ Fʋ̃ʋ wa zawrɩ na bɛr bɛ bɛ cen a, ɩ̃ na ɩ na lɔn yi paalɩ pàw a fʋ tẽw za:

²⁸ a na paal'ɩ a Nɩl, ɛ́ yi kpɛ a fʋ yir, a fʋ di-gana pʋɔ, ɛ́ do a fʋ gado tɔr za zu. A na kpɛ n a fʋ tõ-tõ-nɩ-bɛrɛ nɩ a fʋ nɩbɛ za yie pʋɔ, a dipɛ̃ sɛ́b ziir nɩ a dipɛ̃ zɔ̃-nawfʋ dawr pʋɔ.

²⁹ A na tɛr'a tɩ dúor fʋ̃ʋ nɩ a fʋ tõ-tõ-nɩ-bɛrɛ nɩ a fʋ nɩbɛ za zu”.»