Eziptɩ tẽw yib 6 - A SƐB-SÕW

¹ A Sore tɩ sɔw nɩ a Moyiir: «Ƴɛrɛŋa a, fʋ na nyɛ̃ nɩ a ʋlɩ bom nɛ ɩ̃ na na ɩ a Faarawɔ̃ a. A ɩ̃ kpãkpãw-kpɛ̃w na fɛr ʋ na, ʋ bɛr a Ɩsɩrayɛl nɩbɛ bɛ cen: mɔ̃ mɩ̀, a ɩ̃ kpãkpãw-kpɛ̃w na ɩ na ʋ diw bɛ a ʋ tẽw pʋɔ!»

A Naaŋmɩn yel'ɩ a Moyiir k'ʋʋ na faa nɩ a Ɩsɩrayɛl nɩbɛ

² A Naaŋmɩn tɩ lɛb'a ƴɛ̀r a Moyiir zie yel ʋ: «Mãa n'ɩ a Sore.

³ A koro za a, ɩ̃ tɩ ɩ na a Abraham, a Ɩzaakɩ nɩ a Zakɔb nyɛ̃ m, mɛ̃ a Naaŋmɩn kpɛnʋ-za-sob a. Ɛcɛ, ɩ̃ bɛ tɩ ɩ bɛ bãw a ɩ̃ yúor na dɩ “a Sore” a ɩ.

⁴ Ɩ̃ maal'ɩ bɛ nɩ wõ-taa yel k'ɩ̃ɩ na kʋ̀ bɛ nɩ a Kanãa tẽw bɛ na ɩ nʋʋrɩ kpɩɛr a.

⁵ A Ɩsɩrayɛl nɩbɛ na ɩ a Eziptɩ tẽw nɩbɛ gbãgbaar a, ɩ̃ wõ n a kon bɛ na kone a, ɛ́ lɛb tɩ́ɛrɩ bãwnɩ a ɩ̃ wõ-taa.

⁶ Alɛ so ɩ̃ yel kɛ́ fʋ yel à ŋá kʋ̀ a Ɩsɩrayɛl nɩbɛ: “Mãa n'ɩ a Sore. Ɩ̃ na ír nyɩ nɩ a pɔ̃tɔrɩ tome pʋɔ, ɛ́ faa nyɩ a gbãgbaalʋ pʋɔ a Eziptɩ tẽw nɩbɛ na ƴãw nyɩ a. Ɩ̃ na tõ n gãda-tome wul a ɩ̃ kpɛnʋ, lɛb de nɩ nyɩ.

⁷ Ɩ̃ na de nyɩ na, nyɩ ɩ a ɩ̃ nɩbɛ, ɩ̃ɩ ɩ a nyɩ Naaŋmɩn. Nyɩ na bãw na k'aa mãa, a Sore, mãa n'ɩ a nyɩ Naaŋmɩn na íre nyɩ bɛrɛ a Eziptɩ tẽw pɔ̃tɔrɩ tome pʋɔ a.

⁸ Ɩ̃ na tɛr nyɩ na ta n a tẽw ʋl ɩ̃ na pɔ yel k'ɩ̃ɩ na kʋ̀ n a Abraham, a Ɩzaakɩ nɩ a Zakɔb a. Ɩ̃ na kʋ̀ nyɩ na nyɩ só ʋ. Mãa n'ɩ a Sore”.»

⁹ À à ŋá n'a a Moyiir tɩ ƴɛ̀r a Ɩsɩrayɛl nɩbɛ zie, ɛcɛ bɛ bɛ tɩ bɛr wõ a ʋ ƴɛ̀rʋ ɛ: a bɛ gbãgbaalʋ tɩ ɩ bɛ nɩ tuo zuo bɛ bɛ cãà laar ɛ.

¹⁰ A Sore tɩ lɛb'a yel a Moyiir:

¹¹ «Cen tɩ ƴɛ̀r'ɩ a Eziptɩ tẽw nãà Faarawɔ̃, yel ʋ k'ʋʋ bɛr a Ɩsɩrayɛl nɩbɛ bɛ yi a ʋ tẽw pʋɔ.»

¹² Ɛcɛ a Moyiir tɩ sɔw nɩ a Sore: «A Ɩsɩrayɛl nɩbɛ tɛɛ za bɛ bɛr wõ a ɩ̃ ƴɛ̀rʋ ɛ. Ŋmɩŋmɩn n'a a Faarawɔ̃ na bɛr wõ a ɩ̃ ƴɛ̀rʋ, mãa na bɛ tʋ́ɔr ƴɛ̀rɛ a?»

¹³ Lɛ n'a a Sore tɩ yel a Moyiir nɩ a Aarɔ̃ za kɛ́ bɛ cen tɩ páw a Ɩsɩrayɛl nɩbɛ nɩ a Eziptɩ tẽw nãà Faarawɔ̃, a Ɩsɩrayɛl nɩbɛ tʋ̃ɔ́ yi a Eziptɩ.

A Moyiir nɩ a Aarɔ̃ sãàkʋm-kore

¹⁴ A Ɩsɩrayɛl nɩbɛ sãàkʋm-kore yie a mɩnɛ nɩ-bɛrɛ yée n'ɩ á ŋá: A Zakɔb bidɛb-kpɛ̃ɛ Urubɛn bidɛbr: Hanɔkɩ, Palu, Hɛsɩron nɩ Karmi. Bɛlɛ tɩ n'ɩ a Urubɛn yie dɔwlʋ sãàkʋm-kore.

¹⁵ A Sɩmɩ̃ɔ bidɛbr: Yemuwɛl, Yamin, Ohadɩ, Yakin, Sohaar nɩ Sawul na ɩ Kanãa tẽw pɔw bie a. Bɛlɛ tɩ n'ɩ a Sɩmɩ̃ɔ yie dɔwlʋ sãàkʋm-kore.

¹⁶ A Levi yir dem yée n'ɩ á ŋá, mɛ̃ a lɛ a dɔwfʋ na dɔw tu taa a: A Levi tɩ dɔw nɩ bidɛbr ata: Gɛrson, Kehatɩ nɩ Merari. Ʋ tɩ vʋʋr'ɩ yome lɩz'a ayʋɔb nɩ pie nɩ ayopõi (137).

¹⁷ A Gɛrson bidɛbr'ɩ bɛ ŋa: Livini nɩ Simeyi. Ŋa za tɩ ɩ n a ʋ yir dɔwlʋ sãàkʋm-kʋra.

¹⁸ A Kehatɩ bidɛbr'ɩ bɛ ŋa: Amɩram, Yisehaar, Ebrɔ̃ nɩ Uzɩɛl. A Kehatɩ tɩ vʋʋr'ɩ yome lɩz'a ayʋɔb nɩ pie nɩ ata (133).

¹⁹ A Merari bidɛbr'ɩ bɛ ŋa: Mali nɩ Musi. A Levi yie dɔwlʋ sãàkʋm-kore n'ɩ a bɛ ŋa, mɛ̃ a lɛ a dɔwfʋ na dɔw tu taa a.

²⁰ Amɩram tɩ kul'ɩ a ʋ pure Yokevɛdɩ, ʋ dɔw bidɛbr ayi kʋ̀ ʋ: Aarɔ̃ nɩ Moyiir. A Amɩram yome za tɩ ɩ n lɩz'a ayʋɔb nɩ pie nɩ ayopõi (137).

²¹ A Yisehaar bidɛbr'ɩ bɛ ŋa: Koore, Nefɛgɩ nɩ Zikiri.

²² A Uzɩɛl bidɛbr'ɩ bɛ ŋa: Mɩkayɛl, Elisafan nɩ Sitiri.

²³ A Aarɔ̃ tɩ kul'ɩ Eliseba na ɩ Aminadab pɔwyaa ɛ́ mɩ̀ ɩ Nason yeepuule a. A Eliseba tɩ dɔw nɩ bidɛbr anaar kʋ̀ ʋ: Nadavʋ, Avihu, Eleazaar nɩ Itamaar.

²⁴ A Koore bidɛbr'ɩ bɛ ŋa: Asɩɩr, Ɛlkana nɩ Avɩasafʋ. Bɛlɛ tɩ n'ɩ a Koore yie dɔwlʋ sãàkʋm-kore.

²⁵ A Aarɔ̃ bidɛb, Eleazaar, tɩ kul'ɩ Putiyɛl pɔwyaa kãw, ʋ dɔw bidɛb kʋ̀ ʋ, ʋ dɩ Pɩnasɩ. A Levi dɔwlʋ yie nɩ-bɛrɛ n'ɩ a bɛ ŋa.

²⁶ A Aarɔ̃ nɩ a Moyiir nɛbɛ a Sore tɩ yel: «Nyɩ ɩ a Ɩsɩrayɛl nɩbɛ cɔrɩ zɛbr-nɩbɛ cɔrʋ yi a Eziptɩ.»

²⁷ Lɛ n'a a Moyiir nɩ a Aarɔ̃ tɩ cen tɩ ƴɛ̀r'ɩ a Eziptɩ tẽw nãà Faarawɔ̃, k'ʋʋ bɛr a Ɩsɩrayɛl nɩbɛ bɛ yi a ʋ tẽw pʋɔ.

A Naaŋmɩn lɛb'a yel a Moyiir ʋ na na faa a ʋ nɩbɛ a

²⁸ A ʋlɩ bibir nɛ a Sore na tɩ ƴɛ̀r a Moyiir zie a Eziptɩ a,

²⁹ ʋ tɩ yel ʋ na: «Mãa n'ɩ a Sore. A alɩ bome nɛ za ɩ̃ na yere kʋ̀rɛ fʋ a, cen lɛb tɩ yel a kʋ̀ a Eziptɩ tẽw nãà Faarawɔ̃.»

³⁰ Ɛcɛ a Moyiir tɩ sɔw ʋ na: «Ɩ̃ bɛ tʋ́ɔr ƴɛ̀rɛ ɩ! Ŋmɩŋmɩn n'a a Faarawɔ̃ na bɛr wõ a ɩ̃ ƴɛ̀rʋ?»