Eziptɩ tẽw yib 5 - A SƐB-SÕW

A Moyiir nɩ a Aarɔ̃ na cen tɩ páw a Faarawɔ̃ a

¹ Al pùorí, a Moyiir nɩ a Aarɔ̃ tɩ cen na tɩ páw a Faarawɔ̃ yel ʋ: «À ŋá n'a a Sore, a Ɩsɩrayɛl Naaŋmɩn ƴɛ̀rɛ: “Bɛr a ɩ̃ nɩbɛ bɛ cen a wɛja-kpalɛ pʋɔ tɩ maalɩ cuw a ɩ̃ ƴãw”.»

² A Faarawɔ̃ tɩ sɔw na: «Ãa n'ɩ a Sore ŋa, ɩ̃ na sàw a ʋ nʋɔr bɛr a Ɩsɩrayɛl nɩbɛ bɛ cen? Ɩ̃ bɛ bãw a Sore ŋa ɩ, ɛ́ kʋ̃ bɛr a Ɩsɩrayɛl nɩbɛ bɛ cen ɛ!»

³ A Moyiir nɩ a Aarɔ̃ tɩ lɛb'a yel: «A Ebre mɩnɛ Naaŋmɩn ɩ na tɩ nyɛ̃ ʋ. Bɛr tɩ tɩ cen a wɛja-kpalɛ pʋɔ bibie ata, tɩ maalɩ bàwr kʋ̀ a Sore tɩ Naaŋmɩn, ʋ taa wa mab kʋ tɩ nɩ a jɛ̀lmɛ̃ bàalʋ, bɩɩ nɩ a zɛbr ɛ.»

⁴ A Eziptɩ tẽw nãà tɩ yel bɛ na: «Moyiir nɩ Aarɔ̃ ɔ, bʋ̃ʋ n'ʋ so nyɩ bɔbr kɛ́ nyɩ ɩ a Ɩsɩrayɛl nɩbɛ bɛr a bɛ tome? Nyɩ lɛb cen a nyɩ tome zie.

⁵ Ƴɛrɛŋa a nɩbɛ bɛ ŋa na pãa wa yãwmɛ a, nyɩ bɔbr'a kɛ́ bɛ bɛr a bɛ tome?»

A Faarawɔ̃ dɔwl'ɩ a Ɩsɩrayɛl nɩbɛ tome

⁶ A ʋlɩ bibir nɛ a, a Faarawɔ̃ tɩ yel'ɩ à ŋá kʋ̀ a Eziptɩ tẽw nɩbɛ na bɛlɛ a tome kaar a, nɩ a Ɩsɩrayɛl nɩbɛ bɛl na ɩ a nɩ-bɛrɛ a bɛ lãw-tõ-taabɛ zu a:

⁷ «Nyɩ kʋ̃ lɛb kʋ̀ a Ɩsɩrayɛl nɩbɛ a mʋ̃ɔ a birkiri ŋmab ƴãw mɛ̃ a dãwdãw a ɩ. Bɛl mɩŋa n'a na mɩ́ cen tɩ bɔ a mʋ̃ɔ.

⁸ Ɛcɛ nyɩ na mɩ́ fɛr bɛ na ƴãw bɛ ŋma a birkiri nʋɔr na ƴãw a, mɛ̃ a dãwdãw a, nyɩ kʋ̃ siwri a birkiri nʋɔr ɛ. Ƴã-to-dem nɛbɛ! Alɛ so bɛ yere: “Nyɩ ɩ tɩ cen tɩ maalɩ bàwr kʋ̀ a tɩ Naaŋmɩn.”

⁹ Nyɩ dĩ nɩ bɛ a tome bɛ tone, ɛ́ ta cɛlɛ a ziri á ŋá zie ɩ.»

¹⁰ A tõ-tõ-nɩ-bɛrɛ bɛl na ɩ a Eziptɩ tẽw nɩbɛ a, nɩ a bɛl na ɩ a Ɩsɩrayɛl bʋʋrɛ a, tɩ yi n a nãà yir cen tɩ yel a Ɩsɩrayɛl nɩbɛ: «À ŋá n'a a Faarawɔ̃ yel: Bɛ kʋ̃ cãà kʋ̀rɛ nyɩ a mʋ̃ɔ ɩ.

¹¹ Nyɩ cen a be nyɩ na na tʋ̃ɔ́ páw a a tɩ bɔ. Ɛcɛ nyɩ bãwnɩ a, a birkiri nʋɔr bɛ siwre ɩ!»

¹² Lɛ n'a a Ɩsɩrayɛl nɩbɛ tɩ yi yɛ́r pàw a Eziptɩ tẽw za, kɛ́ bɛ wob a mʋ̃ɔ wa kʋr.

¹³ A tõ-tõ-nɩ-bɛrɛ na ɩ a Eziptɩ tẽw nɩbɛ a, tɩ canɛ bɛ na yere nɩ: «Nyɩ baarɩ a nyɩ ton! Nyɩ ŋma a birkiri lɛ nʋɔr na ƴãw a, bibir za! Mɛ̃ a lɛn daar bɛ na tɩ kʋ̀rɛ nyɩ a mʋ̃ɔ a!»

¹⁴ Bɛ mɩ́ tɩ ŋmɩɛr'ɩ a tõ-tõ-nɩ-bɛrɛ na ɩ a Ɩsɩrayɛl bʋʋrɛ bɛ na kaa ír ƴãw a, ɛ́ yere: «Bʋ̃ʋ n'ʋ so a bibie á ŋá pʋɔ nyɩ bɛ ŋma a birkiri nʋɔr bɛ na ƴãw kʋ̀ nyɩ mɛ̃ a koro za a?»

¹⁵ A tõ-tõ-nɩ-bɛrɛ na ɩ a Ɩsɩrayɛl bʋʋrɛ a tɩ wa n a Faarawɔ̃ zie wa zɛbr yere nɩ: «Bʋ̃ʋ n'ʋ so fʋ ɩrɛ tɩ à à ŋá?

¹⁶ Bɛ bɛ cãà kʋ̀rɛ tɩ mʋ̃ɔ ɩ, ɛ́ mɩ́ yel tɩ: “Nyɩ ŋma birkiri”, ɛ́ mɩ́ lɛb ŋmɩɛr tɩ ƴãw pʋɔ. A fʋ nɩbɛ sãw na!»

¹⁷ A Faarawɔ̃ tɩ sɔw bɛ na: «Ƴã-to-dem'ɩ nyɩ, ƴã-to-bul! Alɛ so nyɩ yere: “Nyɩ ɩ tɩ cen tɩ maalɩ bàwr kʋ̀ a Sore.”

¹⁸ Ƴɛrɛŋa a, nyɩ cen tɩ tone. Bɛ bɛ kʋ̀rɛ nyɩ a mʋ̃ɔ ɩ, ɛcɛ a fɛr'a kɛ́ nyɩ ŋma a birkiri a ta.»

¹⁹ A tõ-tõ-nɩ-bɛrɛ na ɩ a Ɩsɩrayɛl bʋʋrɛ a tɩ nyɛ̃ nɩ a yele a kpɛmɛ a bɛ zu, bʋ̃ʋ n'ʋ vɛ̃, bɛ tɩ yere na kʋ̀rɛ bɛ: «A birkiri nʋɔr bɛ siwre ɩ! Bibir za, nyɩ na mɩ́ ŋma n a birkiri nʋɔr na ƴãw a!»

²⁰ Bɛ na tɩ yire a Faarawɔ̃ zie wa báarɛ a, bɛ lo n a Moyiir nɩ a Aarɔ̃ na tɩ àr gùre bɛ a zu.

²¹ Bɛ tɩ yel bɛ na: «A Sore, ʋ jɩ́r a lɛ nyɩ na ɩ a, ɛ́ bãw a nyɩ yele kʋ̀ nyɩ! Nyɩmɛ nɛbɛ so a Faarawɔ̃ nɩ a ʋ tõ-tõ-nɩ-bɛrɛ bɛ cãà bɔbr kɛ́ bɛ mɩ́ nyɛ̃ tɩ ɛ. Nyɩ ƴãw bɛ nɩ zɛbr-sɔ-kpɛ̃ɛ a nũú kɛ́ bɛ kʋ n tɩ!»

²² A Moyiir tɩ lɛb'a tɩ páw a Sore yel ʋ: «Sore e, bʋ̃ʋ n'ʋ so fʋ dɔwrɩ a nɩbɛ bɛ ŋa? Bʋnʋ ƴãw n'a fʋ tõ m a ka?

²³ Fʋ na dɛ tõ m ɩ̃ wa ƴɛ̀r a Faarawɔ̃ zie a fʋ yúor ƴãw a, lɛ n'a ʋ tĩ dɔwrɛ a Ɩsɩrayɛl nɩbɛ, ɛ́ fʋ bɛ ɩrɛ bom kãw za a fʋ nɩbɛ faafʋ ƴãw ɛ!»